سب رسولوں میں سوا کیوں نہ ہو رتبہ تیرا

سب رسولوں میں سوا کیوں نہ ہو رتبہ تیرا

تو ہے محبوب خدا چاہنے والا تیرا

انبیا لاکھ جہاں میں ہوئے پیدا لیکن

مرتبہ حق نے کیا افضل و اعلیٰ تیرا

امتِ احمد مرسل میں کیا ہے پیدا

کس زباں سے ہو ادا شکر خدایا تیرا

بخشوائے گا تو ہی داورِ محشر سے ہمیں

یا نبی کافی ہے ہم سب کو وسیلہ تیرا

اس قدر چشم کو حاصل ہو مرے بینائی

نظر آنے لگے ہر چیز میں جلوا تیرا

ہم یہ سمجھے کہ نہاں ابر میں خورشید ہوا

چھپ گیا زلفوں میں جس دم رخِ زیبا تیرا

آرزو یوسفؔ خستہ کی یہی ہے مولیٰ

اس کے لب پر ہو دمِ نزع بھی کلمہ تیرا