آپ حسرت مٹائیں گے خواجہ

لوگ ہر سو سے آئیں گے خواجہ

دلی مطب سنائیں گے خواجہ

داد دل کی جو نہ پائیں گے خواجہ

تو کسے منہ دکھائیں گے خواجہ

آپ حسرت مٹائیں گے خواجہ

حق سے مقصد دلائیں گے خواجہ

تم پہ قربان چاند تارے ہیں

آپ اللہ کے پیارے ہیں

اور نبی پاک کے دلارے ہیں

آپ ہی کے ہمیں سہارے ہیں

آپ حسرت منائیں گے خواجہ

حق سے مقصد دلائیں گے خواجہ

وہ ہے غم جو کہا نہیں جاتا

بے کہے بھی رہا نہیں جاتا

نہ کہوں تو سہا نہیں جاتا

جو چھپوں تو چھپا نہیں جاتا

آپ حسرت مٹائیں گے خواجہ

حق سے مقصد دلائیں گے خواجہ

التجا یہ قبول فرمائیں

حسرتیں سب کے دل کی بر آئیں

جو مطالب ہیں ان کے سب پائیں

لوگ کہتے ہوئے یہاں آئیں

آپ حسرت مٹائیں گے خواجہ

حق سے مقصد دلائیں گے خواجہ

پیش آتا ہے چرخ چالوں سے

دل ہے غمگین غم کے نالوں سے

دوست احباب ساتھ والوں سے

آپ واقف ہیں دل کے حالوں سے

آپ حسرت مٹائیں گے خواجہ

حق سے مقصد دلائیں گے خواجہ

فیض سے آپ کے یہ ہند آباد

دل کو آئے نہ کیوں تمہاری یاد

شاد ہوتے ہیں یاں دل ناشاد

اس لیے آپ سے یہ ہے فریاد

آپ حسرت مٹائیں گے خواجہ

حق سے مقصد دلائیں گے خواجہ

درِ اقدس پہ ہیں جو یاں خادم

رہیں تا حشر شاد اور خرم

یہ شجر صحن کے رہیں قائم

یو ہیں نوبت بجا کرے دائم

آپ حسرت مٹائیں گے خواجہ

حق سے مقصد دلائیں گے خواجہ

روز یا رب ہو یہ سوا لنگر

ہر مریضوں کی ہو شفا لنگر

درد دل کی ہو یہ دوا لنگر

صدق دل سے ذرا پیا لنگر

آپ حسرت مٹائیں گے خواجہ

حق سے مقصد دلائیں گے خواجہ

غمِ دنیا نے کر دیا مجنوں

ہے بہت جس سے میرا حال زبوں

رنج دل پر ہزار سہتا ہوں

آپ کی یاد ہو تو کہتا ہوں

آپ حسرت مٹائیں گے خواجہ

حق سے مقصد دلائیں گے خواجہ

مانتا کچھ دل خراب نہیں

رنج سہنے کی اس میں تاب نہیں

دن کو چین اور شب کو خواب نہیں

ہند میں آپ کا جواب نہیں

آپ حسرت مٹائیں گے خواجہ

حق سے مقصد دلائیں گے خواجہ

رنج سے دل جگر بریدہ ہے

غم سے یہ آپ آب دیدہ ہے

جس میں خواجہ ترا عقیدہ ہے

دل کا اوصاف وہ حمیدہ ہے

آپ حسرت مٹائیں گے خواجہ

حق سے مقصد دلائیں گے خواجہ

تم علی فاطمہ کے ہو دلبر

جد امجد تمہارے پیغمبر

اس کی فریاد بھی سنو سرور

ہے بہت حال ضبطؔ کا ابتر

آپ حسرت مٹائیں گے خواجہ

حق سے مقصد دلائیں گے خواجہ