یہ قلبِ غم زدہ آباد و شاد تجھ سے ہے

یہ قلبِ غم زدہ آباد و شاد تجھ سے ہے

ہمارا شہر عروس البلاد تجھ سے ہے

بنا ہوا ہے درِ گنج بخش صحنِ حرم

ہیں فیض یاب یہاں نکتہ دانِ ہست و عدم

وہ دیکھو خواجۂ اجمیر آئے بیٹھے ہیں

فریدِ حق بھی یہیں آس پاس رہتے ہیں

ترے کلام سے پردے اٹھے حقیقت کے

سراغ اہلِ وفا کو ملے محبت کے

عیاں ہیں اہل تمنا پہ صحو و سکر کے راز

نگاہ دار ہے تیری نگاہِ ناز و نیاز

کھلا ہے یہ کہ ملامت ہے فکر راست روی

ہے ہر مقام سے آگے مقامِ راہِ نبی

عطا ہوا تجھے فاروق سا جلال و جمال

دیئے ہیں فقر محمد کے مرتضیٰ نے کمال

جوانِ مرد کی مانند حال ہے میرا

تری نگاہِ کرم میں مآل ہے میرا

جوانِ مرد کی مانند حال ہے میرا

ترئ نگاہِ کرم میں کمال ہے میرا

تو گنج بخش ہے، داتا ہے پیرِ کامل ہے

ظفرؔ کو خاک ترے در کی مرہم دل ہے