روئے رسول مصحف حق لا کلام ہے

روئے رسول مصحف حق لا کلام ہے

دو صفحہ پر قرآن کا مطلب تمام ہے

مضموں کمر شریف کے باندھے ہیں بیشتر

فکر رسا ہے یا کہ یہ عنقا کا دام ہے

شیریں لبوں کے وصف سے شیریں سخن ہوں میں

مصری نبات سمجھیں مرا وہ کلام ہے

عزو شرف اور شکل و شمائل میں لا کلام

بے مثل ذات حضرت خیرالانام ہے

زاہد نہ تو نے پی جو مئے حب احمدی

تو تیرے زہد خشک کو میرا سلام ہے

ٹھوکر کے ایک اشارہ سے مردے جیے ہزار

معجز نما حضور کا نازک خرام ہے

بیخود ہے دل جو گیسوئے حضرت کے شوق میں

ہوتی صباحِ زیست کوئی دم میں شام ہے