در شرحِ اسرار اسمائے علی مرتضیٰ

مسلمانوں میں سب سے پہلے اور بہادروں کے سردار حضرت علی ہیں اور عشق کے لیے آپ کی ذات سرمایۂ ایمان ہے۔

انہیں کے خاندان سے محبت کی وجہ سے میں زندہ ہوں اور دنیا میں موتی کی طرح چمک رہا ہوں۔

میں نرگس ہوں اور نظارے کے لیے بیتاب ہوں اور ان کے چمن میں مثل بو آوارہ ہوں۔

اگر میری خاک سے زمزم ابل رہا ہے تو یہ انہیں کی وجہ سے ہے۔

اگر میرے انگور کی بیل سے شراب ٹپک رہی ہے تو یہ بھی انہیں کے سبب ہے۔

میں خاک ہوں اور ان کی محبت سے آئینہ ہوگیا ہوں، یہاں تک کہ میرے سینہ میں موجود صدا دیکھی جاسکتی ہے۔

ان کے چہرے سے پیغمبرِ خدا فال لیتے تھے اور خدا پرست ملت نے انہیں کی شان و شکوہ سے شوکت و عظمت حاصل کی ہے۔

ان کا قول ہمارے واضح دین کی قوت ہے، انہیں کے عطیہ سے کائنات زیر آئین ہے۔

خدا کے رسول نے انہیں ”بو تراب“ نام دیا اور خدا نے قرآن میں ”یداللہ“ (اللہ کا ہاتھ) کہا۔

جو شخص زندگی کے رازوں سے واقف ہے وہ جانتا ہے کہ حضرت علی کے ناموں کے راز کیا ہیں۔

وہ تاریک مٹی جس کا نام جسم ہے، عقل اس کے ستم سے آہ و فریاد کر رہی ہے۔

آسمان پر پہچنے والی فکر اس کی وجہ سے زمین بوس ہے اور اسی سے آنکھ اندھی اور کان بہرے ہیں۔

ہوس کی دو دھاری تلوار اس نے ہاتھ میں اٹھا رکھی اور اس رہزن کی وجہ سے راہ چلنے والوں کے دل ٹوٹ گئے ہیں۔

شیرِ خدا (حضرت علی) نے اس خاکی جسم کو تسخیر کرلیا اور اس بے نور مٹی کو اکسیر بنا دیا۔

حضرت علی مرتضیٰ کہ جن کی تلوار سے حق روشن ہے، وہ ”بو تراب“ (مٹی کے باپ) جسم کے ملک کو فتح کرنے کی وجہ سے ہیں۔

جس نے ملکوں کو فتح کیا (اس کی فاتحانہ حیثیت اپنی کراری کی وجہ سے ہے) اس کے گوہر کے لیے آبرو اس کی خودداری ہے۔

جو بھی دنیا میں (حضرت علی کی طرح اپنے جسم پر فتح پا کر) بو تراب ہوگیا وہ (حضرت علی کے مثل) سورج مغرب سے پھر واپس لوٹا سکتا ہے۔

جس نے جسم کے گھوڑے پر زین کس لیا وہ سلطنت کی انگوٹھی پر مینہ کی طرح پیوست ہوگیا۔

یہاں اس کے قدموں کے نیچے خیبر کی شان و شوکت ہے تو وہاں اس کا ہاتھ جام کوثر تقسیم کرتا ہے۔

خود آگاہی سے وہ اللہ کا ہاتھ بن جاتا ہے اور اللہ کا ہاتھ بن کر شہنشاہی کرتا ہے۔

اس کی ذات علوم کے شہر کا دروازہ بن جاتی ہے، حجاز چین اور روم اس کے فرماں بردار ہوتے ہیں۔

اپنے جسم خاکی پر حکمران ہونا چاہیے تاکہ تو اپنی انگور کی بیل سے شفاف شراب پی سکے۔

خاک ہوجانا پروانے کا طریقہ ہے، مٹی کا باپ ہونا یہی مردانگی ہے۔

اے کہ تو پھول کی طرح نازک بدن ہے، پتھر بن تاکہ چمن کی دیوار کے لیے بنیاد بنے۔

اپنی خاک سے ایک نیا انسان پیدا کر اور اس انسان کے لیے ایک نئی دنیا بنا۔

اگر تو نے اپنی خاک سے دیوار و در نہ بنائے تو کوئی اور اس سے اینٹیں بنالے گا۔

تو بد اصل آسمان کے ستم سے تنگ ہے اور تیرا جام پتھر کے ظلم کا فریادی ہے۔

یہ نالہ، فریاد اور ماتم کب تک اور یہ مسلسل سینہ پیٹنا کب تک۔

عمل میں زندگی کا مضمون پوشیدہ ہے تخلیق کی لذت، زندگی کا قانون ہے۔

اٹھ اور ایک نئی دنیا کا خالق بن، آگ کو آغوش میں لے لے اور حضرت ابراہیم جیسا نعرۂ حق لگا۔

ناموافق دنیا سے بنائے رکھنے کا مطلب ہے میدان میں اپنے ہتھیار ڈال دینا۔

وہ خود دار مرد جو پختہ کار ہو جاتا ہے، اس کے مزاج کے مطابق زمانہ خود کو بناتا ہے۔

اگر زمانہ خود کو اس کے مزاج کے مطابق نہ بنائے تو وہ مرد آسمان سے جنگ پر تیار ہوجاتا ہے۔

وہ عالم موجودات کی بنیاد کھود ڈالتا ہے اور ذرا ت کو نئی ترکیب دیتا ہے۔

زمانے کی گردش کو درہم برہم کر دیتا ہے اور نیلے آسمان کو الٹ پلٹ کر دیتا ہے۔

وہ اپنی طاقت سے ایک ایسا زمانہ ظاہر کرتا ہے جو موافق ہوتا ہے۔

اگر دنیا میں مردانہ وار زندگی ممکن نہ ہو تو اس کے لیے جواں مردوں کی طرح اپنی جان دے دینا ہی زندگی ہے۔

جو قلب سلیم کا مالک ہوتا ہے وہ بڑی بڑی مہموں کے ذریعے اپنا زور آزماتا ہے۔

عشق مشکل چیزوں کے ساتھ کشمکش سے خوش ہوتا ہے، حضرت ابراہیم کی طرح وہ شعلوں سے پھول چن کر مسرت محسوس کرتا ہے۔

میدان عمل کے جواں مردوں کے قوت کے امکانات ان کی شکل پسندی سے ظاہر ہوتے ہیں۔

پست ہمتوں کا ہتھیار بس کینہ ہے زندگی کا صرف یہی ایک سا فون ہے۔

(یعنی) زندگی اس قوت کا نام ہے جو ظاہر ہو، اس کی اصل غالب اور بر تر ہونے کا ذوق ہے۔

بے جا معانی کے رجحان سے زندگی کے خون میں سردی آجاتی ہے، جیسے زندگی کے موزوں شعر میں سکتہ واقع ہو جائے۔

جو شخص ذلت کی گہرائی میں پڑا ہوا ہے وہ اپنی توانائی کو قناعت کہتا ہے۔

ناتوانی زندگی کے لئے ایک رہزن ہے، اس کے بطن میں خوف اور چھوٹ پنپتے ہیں۔

اس کا باطن اچھے اوصاف سے خالی ہے، اس کے دودھ سے برائیاں فربہ ہوتی ہیں۔

اے عقل سلیم رکھنے والے ہوشیار رہ! کمزوری کا یہ دشمن طرح طرح گھات لگاتا ہے۔

اگر تو عقل مندی ہے تو اس کا دھوکہ نہ کھا، وہ (کمزوری) ہر زمانے میں گرگٹ کی طرح نیا رنگ بدلتی ہے۔

نظر رکھنے والے اس کی شکل نہیں پہچانتے، اس کے چہرے پر طرح طرح کے پردے پڑے ہیں۔

کبھی اس پر رحم اور نرمی پردہ ڈالتے ہیں اور کبھی انکساری کی چادر اسے چھپاتی ہے۔

کبھی وہ مجبوری میں چھپی ہوتی ہے، کبھی وہ معذوری میں پوشیدہ ہوتی ہے۔

وہ تن آسانی کی شکل میں اپنا چہرہ دکھاتی ہے اور قوت رکھنے والوں کے ہاتھ سے دل چھین لیتی ہے۔

سچائی، توانائی کے ساتھ جڑواں ہے، اگر تو اپنے سے آگاہ ہو جائے تو یہی جمشید کا پیالہ ہے۔