داستان آں بادشاه جہود کہ نصرانیاں را می کشت از بہر تعصب

اس یہودی بادشاہ کا قصہ جو عیسائیوں کو تعصب کی وجہ سے قتل کرتا تھا

یہودیوں میں ایک ظالم بادشاہ تھا

حضرت عیسیٰ کا دشمن اور عیسائیوں کو تباہ کرنے والا

حضرت عیسیٰ کا زمانہ تھا اور اس (بادشاہ) کی حکومت تھی

(لیکن) وہ حضرت موسیٰ کی جان اور حضرت موسیٰ اس کی جان تھے

بھینگے بادشاہ نے خدا کے راستے میں

ان دونوں (حضرت عیسیٰ اور موسیٰ ) للہی دوستوں کو جدا کر دیا

ایک استاد نے بھینگے سے کہا اندر آ جا

جا گھر میں سے وہ بوتل لے آ

بھینگے نے کہا ان دو بوتلوں میں سے کون سی

تمھارے پاس لاؤں، خوب کھول کر بتاؤ

استاد نے کہا دو بوتلیں نہیں ہیں ، چل

بھینگا پن چھوڑ اور زیادہ دیکھنے والا نہ بن

اس نے کہا اے استاد مجھے طعنہ نہ دیجئے

استاد نے کہا تو دونوں میں ایک کو توڑ ڈال

بوتل ایک تھی لیکن اس کو دو نظر آئیں

جب اس نے بوتل توڑ دی تو دوسری موجود نہ تھی

جب اس نے ایک توڑی نگاہ سے دونوں غائب ہو گئیں

انسان محبت اور غصہ سے (بھی) بھینگا بن جاتا ہے

غصہ اور شہوت انسان کو بھینگا بنا دیتے ہیں

(اور) روح کو راست روی سے پھیر دیتے ہیں

جب غرض آئی تو ہنر پوشیدہ ہوا

اور دل کے سینکڑوں پردے آنکھ پر پڑ گئے

جب قاضی دل میں رشوت طے کرے

تو وہ ظالم اور عاجز مظلوم میں کب فرق کر سکے گا؟

بادشاہ، یہودیت کے کینہ سے ایسا

بھینگا بن گیا کہ الامان والحفیظ !

لاکھوں مومن مظلوم مار ڈالے

کہ میں موسیٰ کے دین کی پشت و پناہ ہوں