فرستادن شاه رسولاں بہ سمرقند بآوردن زرگر

بادشاہ کا ایلچیوں کو سمرقند روانہ کرنا، اس سنار کی تلاش میں

پھر ایک دو قاصد اس طرف روانہ کیے

جو ماہر، کارگزار اور بہت نیک تھے

وہ دونوں سردار سمر قند میں آئے

اس سنار کے پاس بادشاہ کی طرف سے خوشخبری لے کر

کہ اے نازک کام کرنے والے استاد پوری شناخت والے!

شہروں میں تیری خوبی پھیلی ہوئی ہے

اب فلاں بادشاہ نے زیور گھڑنے کے لیے

تجھے چنا ہے کیونکہ تو (زر گری میں) سردار ہے

اب یہ جوڑا اور سونا ، چاندی لے

(اور) جب تو آئیگا، خاص اور ہم نشیں ہوگا

مرد نے جب بہت سا مال اور جوڑا خلعت تو دیکھا

تو فریفتہ ہوگیا (اور) شہر اور اولاد سے جدا ہو گیا

مرد، خوشی خوشی راستے پر پڑ گیا

(اس سے) بے خبر کہ بادشاہ نے اس کی جان کا ارادہ کیا ہے

عربی گھوڑے پر بیٹھا، اور خوشی خوشی دوڑا

(اور) اپنے خون کے عوض کو شاہی جوڑا سمجھا

افسوس کہ ہنسی خوشی سفر کرنے والا

اپنے پاؤں سے بری موت کی طرف روانہ ہوا ہے

اس کے خیال میں تو حکومت و عزت اور سرداری تھی

ملک الموت نے کہا کہ جا ہاں یہ سب چیزیں تو حاصل کرے گا

جب وہ مسافر راستہ طے کر کے آ پہنچا

تو طبیب اس کو بادشاہ کے سامنے لایا

اس کو بادشاہ کے سامنے بڑے ناز کے ساتھ لے گیا

تا کہ اس کو طراز کی شمع کے سر پر جلا دے

بادشاہ نے اس کو دیکھا اور بہت تعظیم کی

(اور) سونے کا خزانہ اسکے سپرد کر دیا

پھر طبیب نے اس سے کہا اے بڑے بادشاہ!

وہ لونڈی اس سردار (سنار) کو دیدے

تاکہ لونڈی اس کے وصل سے خوش ہو جائے

اور اس کے وصل کا پانی اس آگ کا دافع ہو

بادشاہ نے وہ چاند سے مکھڑے والی اس کو بخش دی

ان دونوں وصل چاہنے والوں کا نکاح کر دیا

چھ مہینہ (کی مدت) تک انہوں نے مقصد بر آری کی

یہاں تک کہ اس لڑکی کو پوری صحت ہوگئی

اس کے بعد اس (طبیب ) نے اس کے لیے شربت بنایا

جس کو وہ پیتا اور لڑکی سامنے گھلتا تھا

جب مرض کی وجہ سے اس کا حسن نہ رہا

تو لڑکی کی جان اس کے وبال میں نہ رہی

چونکہ، بدصورت اور ناگوار اور زرد رو ہو گیا

آہستہ آہستہ اس کے دل میں (عشق) ٹھنڈا ہو گیا

وہ عشق ، جو رنگ کی خاطر ہوتا ہے

عشق نہیں ہوتا ، انجام کار ذلت ( و رسوائی) ہوتی ہے

کاش وہ عار (حسن ظاہری) پائیدار ہوتا

تاکہ اس پر یہ ظلم نہ ہوتا

اس کی نہر جیسی آنکھوں سے خون بہنے لگا

(اور) اس کا چہرہ اس کی جان کا دشمن بنا

مور کے دشمن اس کے پر ہوئے

(اور) بہت سے شاہوں کو ان کی شان و شوکت نے مارا

اس نے کہا، میں وہ ہرن ہوں کہ میری ناف سے

اس صیاد نے میرا صاف خون بہا دیا

اے (مخاطب) میں جنگل کی وہ لومڑی ہوں کہ گھات میں بیٹھ کر

پوستین کے لئے انہوں نے میرا سر کاٹ لیا

میں وہ ہاتھی ہوں کہ پیلباں کے زخم نے

ہڈیوں کی خاطر میرا خون بہا دیا

جس نے مجھے مجھ سے کم تر کی خاطر مار ڈالا

اس کو معلوم نہیں کہ میرا خون رائیگاں نہ جائے گا

مصیبت آج مجھ پر اور کل اس پر ہے

مجھ جیسے آدمی کا خون یوں رائیگاں کیسے ہو سکتا ہے

اگرچہ دیوار لمبا سایہ ڈالتی ہے

لیکن وہ سایہ پھر اس کی طرف لوٹتا ہے

یہ دنیا ایک پہاڑ ہے اور ہمارا فعل آواز

آوازوں کی گونج ہماری طرف لوٹتی ہے

یہ کہا اور فوراً زیر زمین چلا گیا

وہ لونڈی درد و غم سے نجات پا گئی

اس لئے کہ مردوں سے عشق پائیدار نہیں ہے

اس لئے کہ مردہ ہماری طرف واپس آنے والا نہیں ہے

زندہ کا عشق روح اور آنکھ (باطن و ظاہر ) ہیں

ہر وقت غنچہ سے بھی زیادہ ترو تازہ رہتا ہے

اس زندہ کا عشق اختیار کر جو سدا رہنے والا ہے

اور جانفرا شراب سے مجھے سیراب کرنے والا ہے

اس کا عشق اختیار کر کہ تمام نبیوںؑ نے

اس کے عشق سے عزو شرف پایا

تو یہ نہ کہہ کہ ہماری رسائی اس بادشاہ تک نہیں ہے

کریموں پر بڑے کام دشوار نہیں ہوتے