حکایات نوجوانانے از مرد کہ پیش حضرت سید مخدوم علی ہجویری رحمۃ اللہ علیہ آمدہ از ستم اعدا فریاد کرد۔

ہجویر کے سید (حضرت داتا گنج بخش) قوموں کے مخدوم ہیں، ان کا مزار خواجہ معین الدین چشتی کے لیے حرم کی طرح تھا۔

انہوں نے (اپنے وطن کے) کہسار کی بندشیں آسانی سے توڑ دیں اور ہندوستان کی زمین میں سجدے کا بیج بویا۔

ان کے نور و برکت سے حضرت عمر فاروق کے زمانے کی یاد تازہ ہوگئی، ان کے اقوال سے حق کی آواز بلند ہوئی۔

وہ قرآن مجید کی عزت کے پاسبان تھے، ان کی نگاہ سے باطل کا گھر اجڑ گیا۔

ان کے دم سے پنجاب کی خاک زندہ ہوگئی، ہماری صبح ان کے سورج سے جگمگا اٹھی۔

وہ عاشق تھے اور عشق کے نہایت تیز پرواز قاصد تھے، ان کی پیشانی سے عشق کے راز ظاہر تھے۔

ان کے کمالات میں سے ایک کی داستان سناتا ہوں، پورے گلشن کو ایک کلی میں چھپا کر پیش کرتا ہوں۔

ایک نوجوان جس کا قد سرو کی طرح بلند تھا، شہر مرو سے لاہور آیا۔

وہ سیدِ والا جناب کی خدمت میں پہنچا تاکہ وہ اپنے اندھیروں کو (ان کی ہدایت کے) آفتاب سے دور کرے۔

اس نے کہا کہ میں دشمنوں کی صف میں گھرا ہوا ہوں اور میں پتھروں کے درمیان صراحی (کی طرح) ہوں۔

اے آسماں پر مکاں رکھنے والے بادشاہ، مجھے دشمنوں کے درمیاں زندگی بسر کرنا سکھا دیجیے۔

وہ واقف راز بزرگ کہ جن کی ذات میں جمال بھی تھا اور جن کا پیمانِ محبت جلال سے بندھا تھا۔

بولے : اے رازِ حیات سے ناواقف اور زندگی کے آغاز و انجام سے غافل!۔

دوسروں کے اندیشوں سے خو دکو فارغ کر لے اور اپنی سوئی ہوئی قوت کو بیدار کر۔

جب پتھر خود کو شیشہ سمجھ لیتا ہے تو وہ شیشہ بن جاتا ہے اور ٹوٹنا اختیار کر لیتا ہے۔

اگر رہرو خود کو کمزور شمار کرلیتا ہے تو اپنی جان کی دولت رہزن سپرد کر دیتا ہے۔

تو کب تک خود کو پانی اور مٹی شمار کرتا رہے گا، اپنی مٹی سے طور کا شعلہ پیدا کر۔

عزیزوں سے خفا رہنا کیوں اور دشمنوں کی شکایت کرنا کیوں۔

میں سچ کہتا ہوں، سارے دشمن تیرے دوست ہیں، ان کے وجود سے تیرے بازار کی رونق ہے۔

جو شخص خودی کے مقامات سے واقف ہے، وہ اسے خدا کا فضل سمجھتا ہے کہ دشمن طاقتور ہے۔

انسان کی کھیتی کے لیے دشمن بادل ہوتا ہے، وہ اس کے امکانات کو خواب سے بیدار کرتا ہے۔

اگر ہمت مضبوط ہے تو راستے کا پتھر پانی بن جاتا ہے، طوفانی دھارے کے لیے راستے کی پستی اور بلندی کیا چیز ہے۔

حوصلے کی تلوار کے لیے راستے کا پتھر، سان بن جاتا ہے، منزل کاٹنا حوصلے کی تلوار کا امتحان ہے۔

جانور کی طرح کھانے پیٹ بھرنے سے کیا فائدہ، اگر خود میں پختگی نہ آئی تو کیا حاصل۔

خود کو خودی سے اس طرح پختہ کر کہ اگر تو چاہے تو جہان کو درہم برہم کر دے۔

اگر فنا ہونا چاہتا ہے تو اپنی خودی سے بے تعلق ہو جا، اگر باقی رہنا چاہتا ہے تو خودی کو محفوظ کر لے۔

مر جانا کیا ہے؟ خودی سے غافل ہوجانا، کیا تو سمجھتا ہے کہ یہ جان و تن کا جدا ہو جانا ہے۔

حضرت یوسف کی طرح تو خودی میں قیام کر اور غلامی سے شہنشاہی جانب قدم بڑھا۔

خودی میں غوطہ لگا اور صاحب عمل بن، مردِ حق اور واقفِ راز ہو۔

میں داستانوں سے راز کی تشریح کرتا ہوں، پھونکوں کے زور سے کلی کو کھولتا ہوں۔

(بقول مولانا روم) ”یہ بہتر ہے کہ معشوقیوں کے راز، دوسروں کی باتوں کے ذریعے بیان کیے جائیں“