شنیدن آں طوطی حرکت آں طوطیان و مردن آں طوطی در قفس و نوحۂ خواجہ بر وے

طوطی کا اس طوطی کی حرکت کو سننا اور اُس کا مرجانا اور مالک کا اُس پر رونا

جب اُس پرندنے سنا کہ اس طوطی نے کیا کیا

وہ بھی کپکپایا اور گرا اور ٹھنڈا ہو گیا

مالک نے جب اُس کو اِس طرح پڑا ہوا دیکھا

تڑپ گیا اور ٹوپی زمین پر پٹخ دی

جب اُس کو اِس حالت اور اِس رنگ میں دیکھا

مالک تڑپا اور گریباں چاک کر لیا

بولا کہ اے حسین اور اچھّی پیشانی والی طوطی!

ہائے، تجھے یہ کیا ہوا، تو ایسی کیوں ہو گئی؟

ہائے افسوس! میرے خوش اِلحان پرندے

ہائے افسوس! میرے ساتھی اور میرے ہمراز

ہائے افسوس! میرے خوش آِواز پرند

میری روح کی راحت اور میری جنّت

اگر (حضرتِ) سلیمانؑ کے پاس ایسا پرند ہوتا

وہ پھر کب اُن پرندوں میں مصروف ہوتے؟

ہائے افسوس! پرند جس کو میں نے سستا خریدا

بہت جلد میں نے اُس کے دیدار سے مُنہ موڑ لیا

اے زبان! تو سراسر میرا نقصان ہے

تو ہی چونکہ بات کرنیوالی ہے، تجھے کیا کہوں؟

اے زبان! تو آگ بھی ہے اور خرمن بھی

کب تک اِس خرمن میں تو آگ لگاتی رہے گی؟

پوشیدہ طور پر جان تجھے فریاد کرتی ہے

اگر چہ تو اُس سے جو کہتی ہے وہ وہی کرتی ہے

اے زبان! بے شمار خزانہ تو ہے

اے زبان! لا علاج مرض بھی تو ہے

سیٹی بجا نیوالی اور پرندوں کے لئے دھوکے کا سبب تو ہے

ہجر کی وحشت میں محبّت بھری بھی تو ہے

اے بے امان! تو مجھے کب امن دیگی؟

اے کہ تونے میری دشمنی میں کمان پر چلّہ چڑھا رکھا ہے

اب تونے میرے پرند کو اڑا دیا ہے

ظُلم کی چراگاہ میں چرنا کم کردے

یا میرا جواب دے یا انصاف کر

یا مجھے خوشی کے اَسباب یاد دلا

ہائے افسوس! میرے اندھیرے کو ختم کرنیوالے نور

ہائے افسوس! میرے دن کو روشن کرنیوالی صبح

ہائے افسوس! میرے خوش پرواز پرند

انتہاء سے میری اِبتداء تک تلف ہوگیا

نادان (انسان) ہمیشہ رنج کا خوگر ہے

اُٹھ، اور لاَْ اُقْسِمْ کو فی کبد تک پڑھ لے

تیرے چہرہ کی وجہ سے میں رنج سے خالی ہوا

میں تیری نہر میں میل سے صاف تھا

ہائے افسوس! دیدار کا خیال ہے

اپنے موجودہ وجود سے جُدا ہونا ہے

اللہ کی غیرت تھی اور اللہ کے سامنے چارہ نہیں ہے

کونسا دل ہے جو اللہ (تعالیٰ) کے حُکم سے سو ٹکڑے نہیں ہے؟

غیرت یہ ہے کہ وہ سب سے غیر ہے

جو کہ بیان اور مکروحیلہ سے بالا تر ہے

ہائے افسوس! میرے آنسودریا ہوتے

تاکہ حَسین معشوق پر نثار ہوتے

میری طوطی میرے عقلمند پرند

میرے فکر اور رازوں کے ترجمان

اُس نے مجھے عطا کیامیں نا شکرا ثابت ہوا

پہلے وہ بولی یہانتک کہ مجھے (خدا) یاد آیا

وہ طوطی (روح) جس کی آواز وحی سے ہے

وجود کی اِبتداء شے پہلے اُسکی اِبتداء ہے

وہ طوطی تیرے اندر پوشیدہ ہے

تو اِس پر اور اُس پر اُس کا عکس دیکھتا ہے

وہ (عکس) تیری خوشی برباد کر رہا ہے تو اُس سے خوش ہے

تو اُس کے ظلم کو اِنصاف کی طرح قبول کر رہا ہے

اے وہ کہ تونے جان کو جسم کے لئے جلا دیا ہے

تونے جان کو جلا دیا اور جسم کو روشن کیا

میں جل چکا ہوں، کوئی جلنا چاہے

تو مجھ سے پھونس میں آگ لگا لے

جلا ہوا آگ کے قابِل کب ہو سکتا ہے؟

ایسا جلا ہوا لے جو آگ کو قبول کرنیوالا ہو

ہائے افسوس، ہائے افسوس، ہائے افسوس

ایسا چاند اَبر کے نیچے چھپ گیا

کیسے دم ماروں کیونکہ دل کی آگ تیز ہوگئی ہے

ہجر کا شیر غضبناک اور خونریز ہو گیا ہے

وہ جو کہ ہوش کی حالت میں تنداور مست ہے

اُس کا کیا حال ہوگا جب وہ ہاتھ میں پیالہ تھام لے

وہ مست شیر جو اپنے آپے سے باہر ہو

وہ جنگل کے میدان سے بڑھ جاتا ہے

میں قافیہ کی فکر میں ہوں اور میرا محبوب

مجھ سے کہتا ہے، سوائے میرے دیدار کے کچھ نہ سوچ

اے میرے قافیہ سوچنے والے! آرام سے بیٹھ

تو میرے رو برو خوش نصیبی کے ہم معنیٰ ہے

حرف کیا ہوتا ہے جو تو اُس کی فکر میں ہے

آواز کیا ہوتی ہے، انگور کی ٹٹی کا کانٹا

حرف اور آواز اور بولی کو میں مٹا دیتا ہوں

تاکہ اِن تینوں کے بغیر تجھسے بات کروں

وہ بات جو آدمؑ سے میں نے پوشیدہ رکھی

رے اَسرارِ جہاں! تجھ سے میں کہونگا

وہ بات جو میں نے خلیلؑ سے نہ کہی

اور وہ بات جو جبرئیلؑ (بھی) نہیں جانتا

وہ بات جو مسیحاؑ نے نہ کہی

(اور) اللہ نے غیرت کی وجہ سے (بغیر فنا حاصل کئے ہوئے سے) نہ کہی

(لفظِ) ما کیا ہے لغت میں اثبات اور نفی ( کے معنیٰ میں) ہے

میں اِثبات نہیں ہوں، میں بے ذات ہوں اور نفی

میں نے ہستی فنا میں پائی

اِس لئے ہستی کو فنا میں لپیٹ دیا

تمام بادشاہ اپنے غلام کے غلام ہیں

تمام لوگ اپنے مُردہ کے لئے مُردہ ہیں

تمام بادشاہ اپنے آگے جھکنے والے کے سامنے

اپنے عاشق کے تمام عاشق، عاشق ہوتے ہیں

شکاری، پرندوں کا شکار بنتا ہے

تاکہ اچانک اُن کا شکار کرے

معشوق، عاشقوں پر دِل سے عاشق ہوتے ہیں

تمام معشوق، عاشقوں کا شکار ہوتے ہیں

جس کو تو عاشق دیکھے، اُس کو معشوق سمجھ

کیونکہ نسبت کی وجہ سے وہ یہ بھی ہے اور وہ بھی ہے

اگرچہ دنیا میں پیاسے پانی تلاش کرتے ہیں

پانی بھی دنیا میں پیاسوں کو تلاش کرتا ہے

جبکہ وہ عاشق ہے، تو چپ رہ

جب اُس نے تجھے کان دئے ہیں کان (توہمہ تن) بن جا

بند باندھ لے جب سیلاب طُغیانی پر آئے

ورنہ خرابی اور بربادی کر دے گا

میں کیا غم کروں کہ ویرانی ہوگی

شاہی خزانہ ویرانہ میں ہی ہوتا ہے

اللہ میں ڈوبا ہوا چاہتا ہے کہ زیادہ ڈوب جائے

سمندر کی موج کی طرح جان زیر وزبر ہو جائے

دریا کے نیچے بہتر ہوگا یا دریا کے اوپر

اُس کا تیر زیادہ پسندیدہ ہوگا یا ڈھال

اے دل تو وسوسہ کا مارا ہوا ہوگا

اگر تونے خوشی اور مصیبت میں فرق کیا

اگر تیری مراد میں شَکر کا ذائقہ ہے

کیا بے مُرادی محبُوب کی مُراد نہیں ہے؟

اُسکا ہر ستارہ چاندوں کا خون بہا ہے

عالم کا خون بہانا اُس کے لئے درست ہے

ہم نے قیمت اور خون بہا پا لیا ہے

ہم جان کی بازی ہارنے کی طرف دوڑے ہیں

اے (طالب!) عاشقوں کی زندگی مرنے میں ہے

دل گم کئے بغیر، تو دِل نہ پائے گا

میں نے سونا زوانداز سے اُسکی دلجوئی کی

اُس نے ناراضی کی وجہ سے مجھ سے بہا نہ کر دیا

میں نے کہا یہ عقل اور جان آخر تجھ میں غرق ہے

بولا۔ جا جا مجھ پر جادو نہ چلا

مجھے معلوم نہیں تو نے کیا سوچ رکھا ہے؟

اے دوئی والے تونے دوست کو کیا سمجھ رکھا ہے

اے پست ہمّت! تونے مجھے بے قدر سمجھا

اِس لئے کہ تونے مجھے سَستا خریدا ہے

جو سَستا خریدتا ہے، سَستا دے ڈالتا ہے

ایک بچّہ موتی، ایک روٹی کی ٹکیا میں دے دیتا ہے

عِشق میں ڈوب جا کہ اِس میں غرق ہیں

اگلے پچھلوں کے عشق

میں نے اُس کو مجملاً بتایا، میں نے تفصیل نہیں کی

ورنہ عقلیں جل جائیں اور زبان بھی

میں جب لَبْ کہتا ہوں (مطلب) لَبِ دریا ہوتا ہے

میں جب لا کہتا ہوں تو اِلّا مراد ہوتا ہے

میں مٹھاس سے تُرش رُو ہو کر بیٹھ جاتا ہوں

میں اپنی باتوں کی کثرت کی وجہ سے چپ ہو جاتا ہوں

تاکہ ہماری مٹھاس دونوں جہاں میں

تُرشروئی کے پردہ میں پوشیدہ رہے

تاکہ ہر کان میں یہ نہ آۓ

علم لدنی کے سو رازوں میں سے ایک کہہ دیتا ہوں