دونوں عالم میں درخشاں ایک ماہِ نور ہے

دونوں عالم میں درخشاں ایک ماہِ نور ہے

عرش سے تحت الثریٰ تک نور سے معمور ہے

بادلوں سے نور کے بارانِ آبِ نور ہے

ذرہ ذرہ آج میرے گھر کا رشکِ طور ہے

شکر ہے دیدارِ عثماں سے یہ دل معمور ہے

آج چشمِ شوق کو حاصل ہے اس ساقی کی دید

جس کے استقبال کو موجود ہیں قطب و فرید

شکر ہے اللہ نے دکھلایا یہ روز سعید

کیوں نہ ہو ہر سو تماشائے بہارِ روزِ عید

جامِ عثمانی سے عالم مست ہے مسرور ہے

آئے ہیں در پر گدائی کے لئے شاہ و گدا

آپ ہیں کانِ کرم گنجِ عطا بحرِ سخا

آپ سے یا خواجہ ہے یہ بے کسوں کی التجا

صدقہ کچھ عثمان چشتی کا ہمیں کیجئے عطا

جھولی ہر منگتا کی بھرنا آپ کا دستور ہے

آج تختِ کیف پر وہ ساقیٔ ذیشان ہے

جس کے قدموں پر بہارِ میکدہ قربان ہے

میکشوں پر ساقیٔ اجمیر کا احسان ہے

سب کے پیمانوں میں خادمؔ بادۂ عثمان ہے

جس کو دیکھو مست ہے مسرور ہے مخمور ہے