روح_رواں مدینہ رشک_جناں مدینہ

روح رواں مدینہ رشک جناں مدینہ

سیاح دوجہاں ہے تجھ میں نہاں مدینہ

دل عرش کبریا ہے دل میں عیاں مدینہ

ہے لا مکاں کے گھر سے بہتر مکاں مدینہ

محبوب حق ترا ہے خود میہماں مدینہ

ہر ایک اہل ایماں قربان ہورہا ہے

دل صدقے کر رہا ہے جان اپنی کھو رہا ہے

تجھ پر نزول رحمت ہر وقت ہو رہا ہے

قرآں ہے خلق جس کا وہ تجھ میں سو رہا ہے

خلق عظیم کا ہے بے شک نشاں مدینہ

جب ظلمتیں گھٹانے وہ آفتاب آیا

رحمت کی چھائی بدلی گھر کر سحاب آیا

طے کر کے آسماں کے لاکھوں حجاب آیا

واں اک جھلک دکھا دی یاں بے نقاب آیا

وادی کہاں وہ ایمن کی اور کہاں مدینہ

کہف الوری ہے توہی اللہ رے تیرا رتبہ

قدسی فلک سے آکر دیتے ہیں در پہ پھیرا

اے مظہر رسالت آئینہ تجلی

اے جلوہ گاہ صدق و عدل حیا و اتقا

اے بوسہ گاہ طفل و پیر و جواں مدینہ

اس درجہ کیوں پریشاں مسعود آج تو ہے

جلوہ نبی کا پیہم آنکھوں کے روبرو ہے

مخلوق کی زباں پر آواز ہائے ہو ہے

شور نشور برپا نوابؔ چار سو ہے

کچھ غم نہیں ہے اپنا کہف اماں مدینہ