عالم میں ہے اک دھوم کہ سلطان کی ہے آمد

عالم میں ہے اک دھوم کہ سلطان کی ہے آمد

ہر مور کا ہے قول سلیماں کی ہے آمد

تاریک تھی شب شمع شبستاں کی ہے آمد

روشن ہے کہ خورشید درخشاں کی ہے آمد

آمد ہے یہ اس نور کی جو نور خدا ہے

اس نور سے کیا شان خدا جلوہ نما ہے

ہر قطرہ یہ کہتا ہے کہ عالی ہمم آیا

ہر ذرہ کی آواز ہے مہر کرم آیا

ہر برگ کا ہے قول کہ صاحب حشم آیا

ہر پھول ہے خنداں کہ سراج قدم آیا

طائر بھی نشیمن میں ہیں خوش دھوم پڑی ہے

غل وحشیوں میں ہے کہ یہ شادی کی گھڑی ہے

آتی ہے بہار آمد شاہ شہدا ہے

مہمان کے لینے کو چلے قصد صبا ہے

پائی ہے جو بو اور یہی پھولوں میں ہوا ہے

جو سرو ہے وہ منتظر شاہ کھڑا ہے

ہے چشم برہ سر کو جھکاتی نہیں نرگس

پھولی ہوئی جامے میں سماتی نہیں نرگس

آمد ہے جو خورشید رسالت کی سر خاک

سجدے کو سر خاک جھکے پڑتے ہیں افلاک

ہر وقت کواکب کو بھی اس بات کی ہے تاک

آنکھوں میں لگے سرمہ خاک قدم پاک

حوریں بھی ہیں خوش عیش یہ غلماں بھی تلے ہیں

ہے بارش رحمت در فردوس کھلے ہیں

بت خانوں میں یہ کفر سے کہتی ہے ضلالت

رہنے کا ٹھکانا نہیں غارت کی ہے دہشت

بت کرتے ہیں جھنجھلا کے برہم سے اشارت

دی تونے یہ مسجود بنا کر ہمیں ذلت

کیا خوار ہوئے دیدۂ ارباب یقیں میں

شق کاش زمیں ہو کہ سما جائیں زمیں میں

میخانۂ عرفاں ہے کھلا عیش ہے ظاہر

مے خوار بھی ہیں پاک نئے شوق بھی ظاہر

نئے انداز سوالوں کے کئے ہیں پیدا

بدلے دیکھیں ہیں جو انداز کرم آج کی رات

لے لیا بخشش امت کا خدا سے اقرار

حبذا شان شہنشاہ اُمم آج کی رات

آپ کے حلقۂ گیسوئے مسلسل کے طفیل

مشکلیں حل ہوئی جتنی تھیں اہم آج کی رات

اٹھ گیا پیش احد برقع میم احمد

نظر ایک آتے ہیں امکان و قدم رات کی رات

پتلیاں حور و ملائک کی بچھی ہیں تسخیر

تا بنین فرش رہ شاہ امم آج کی رات