چمن پیرائے کن نے جب سجایا باغِ امکاں کو

چمن پیرائے کن نے جب سجایا باغِ امکاں کو

کیا ہر گل سے پہلے بو فزا تیرے گلِ جاں کو

اسی اک پھول نے مہکا دیا عالم کے بستاں کو

یہی کہتے سنا ہر سو چمن میں فضلِ یزداں کو

ترے فیضِ قدم نے کردیا گلشن بیاباں کو

بنایا تختہ خلدِ بریں عالم کے میداں کو

خزاں کا دخل تھا باغِ جہاں میں سر بسر تجھ بن

بسانِ چوب آتش دیدہ تھا ہر اک شجر تجھ بن

نہ غنچہ تھا نہ گل تھا اور نہ تھا برگ و ثمر تجھ بن

نہ پایا تھا کہیں بادِ بہاری کا اثر تجھ بن

تری فیضِ قدم نے کر دیا گلشن بیاباں کو

بنایا تختۂ خلد بریں عالم کے میداں کو

تم آئے گلشنِ عالم میں کیا اے سرو محبوبی

کہ آئے باغ گیتی میں سراسر خلد کی خوبی

کہاں گل میں یہ نکہت تھی کہاں سبزہ میں اسلوبی

فقط تیرے سبب سے صورتِ گل رنگ میں ڈوبی

ترے فیضِ قدم نے کردیا گلشن بیاباں کو

بنایا تختۂ خلد بریں عالم کے میداں کو

گھٹا اک کفر کی چھائی ہوئی تھی باغِ عالم پر

عرب کیا سطحۂ گیتی تھا خارِ ستان سے ابتر

قدم آئے تمہارے جس گھڑی اس باغ میں سرور

ہوا ہوکر اڑی گلشن سے یہ کہتی ہوئی صر صر

ترے فیضِ قدم نے کردیا گلشن بیاباں کو

بنایا تختۂ خلدِ بریں عالم کے میداں کو

شہا تجھ بن تھا گلزار جہاں اجڑا ہوا بالکل

نہ یہ غنچہ کا کھلنا تھا نہ یہ خوش لہجۂ بلبل

ہوئے تازہ ترے ابرو کرم سے سوسن و سنبل

یہ کس خوبی سے شاخِ سرو پر ہے نغمۂ صلصل

ترے فیضِ قدم نے کردیا گلشن بیاباں کو

بنایا تختۂ خلدِ بریں عالم کے میداں کو

بناکر آپ کو صناع قدرت کیوں نہ نازاں ہو

بہارِ باغ ہو زینت وہ گلزارِ امکاں ہو

کرم یہ آپ کا ممتاز پر محبوبِ یزداں ہو

کہ یہ جاکر مدینہ میں شہ دیں یوں غزل خواں ہو

ترے فیضِ قدم نے کردیا گلشن بیاباں کو

بنایا تختۂ خلدِ بریں عالم کے میداں کو