فیملی پلاننگ

ہند کو اور بھی خوش حال بنانے کے لیے

دیش سے غربت و افلاس مٹانے کے لیے

گاؤں اور شہر کی توقیر بڑھانے کے لیے

اپنے گھر کے در و دیوار سجانے کے لیے

عصر حاضر کی حکومت نے بڑے کام کیے

کتنی تاریک فضاؤں میں جلائے ہیں دیے

نونہالوں کے لیے سب کا یہی منشا ہے

آج بھی ان کی محبت میں یہی سوچا ہے

ان کے حق میں یہ قدم آج بہت اچھا ہے

صاحب فہم و فراست کا یہی کہنا ہے

جو بھی بچہ ہو وہ بھارت کا نگہبان بنے

اپنی دھرتی کا وہ راجا بنے سلطان بنے

یہ ہے تجویز عمل اس پہ کریں گے ہم سب

اپنے دامن کو مسرت سے بھریں گے ہم سب

راہ آساں ہے قدم اس میں دھریں گے ہم سب

بزدلی ہوگی جو اس رہ سے ڈریں گے ہم سب

فرض اب یہ ہے کہ اولاد کی کثرت سے بچیں

شاد و مسرور ہمارے بھی دل و جان رہیں

عصر حاضر کی فضاؤں کا تقاضہ ہے یہی

اپنی ملت کی روایات کا منشا ہے یہی

سامنے اہل بصیرت کے بھی نقشہ ہے یہی

سب کے ہم راہ عزیز اپنا ارادہ ہے یہی

میرا بھارت بھی تو خوش حال وطن کہلائے

ایسے حالات ہوں آبادی نہ بڑھنے پائے