جوگی کا برن
جوگی کا برن ہم نے لیا یار کی خاطر
کیوں یار کی خاطر ہے دل زار کی خاطر
اللہ رے حسن رخ جاناں تیرے جلوے
جو دیکھ لے اک بار وہ دل کیسے نہ تڑپے
اک لمحہ بھی آرام سے جو اس کا نہ گزرے
جو کچھ وہ کرے تھوڑا ہے دیدار کی خاطر
کیوں یار کی خاطر دل زار کی خاطر
فرصت اسے کب ہوگی تری یاد سے جاناں
جس دل پہ ہوا نقش خیال رخ تاباں
کیا کھانے کی حاجت ہے اسے غم سے جو مہماں
ہاں بھیک جو مانگے گا تو دیدار کی خاطر
کیوں یار کی خاطر ہے دل زار کی خاطر
کیا ہوگی صدا اس کی کہ اے جاں ترے قرباں
دیدار کا بھوکا ہوں نہ ہوں وصل کا خواہاں
ہا اتنی ہی سینے میں رہے آتش سوزاں
اک اور جھلک حسن طرح دار کی خاطر
کیوں یار کی خاطر ہے دل زار کی خاطر
صدقے تیرے یہ آتش دل بجھنے نہ پائے
پھک جائے کلیجہ مگر اف لب پہ نہ آئے
ہو جاؤں اگر خاک تو وہ خاک بھی اڑ جائے
بس اتنی تواضع ہے دل زار کی خاطر
کیوں یار کی خاطر ہے دل زار کی خاطر
حیرتؔ ہے اگر کوئی ہے مختار محبت
کیوں کر نہ خریدے کوئی آزار محبت
رگ رگ سے کرے کیسے نہ اظہار محبت
دل وقف رہے روئے پر انوار کی خاطر
کیوں یار کی خاطر ہے دل زار کی خاطر
- کتاب : نقش حیرتؔ عکس حیرتؔ (Pg. 53)
- Author : حیرت شاہ وارثی
- مطبع : حضرت عنبر شاہ وارثی پبلیشنز، لاہور، پاکستان (2006)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.