نغمۂ تعلیم
تعلیم سے چھٹتی ہیں جہالت کی گھٹائیں
تعلیم سے مل جاتی ہیں پُر نور فضائیں
تعلیم سے ملتی ہیں زمانے میں وفائیں
تعلیم کے زیور سے ہر اک گھر کو سجائیں
اب قوم کے بچوں کو چلو علم سکھائیں
تعلیم سے انسان کو ملتی ہے بلندی
تعلیم دکھاتی ہے ہمیں راہِ ترقی
تعلیم سے ہوتی ہے نقائص کی تلافی
تعلیم کی اک شمع ہر اک گھر میں جلائیں
اب قوم کے بچوں کو چلو علم سکھائیں
تعلیم سے ہر قوم کی عزت ہے جہاں میں
تعلیم سے الفت ہے، صداقت ہے جہاں میں
تعلیم سے انساں کی حکومت ہے جہاں میں
تعلیم کے پرچم کو چلو مل کے اٹھائیں
اب قوم کے بچوں کو چلو علم سکھائیں
تعلیم سے کھلتے ہیں ترقی کے دہانے
تعلیم نے تقدیر کے لکھے ہیں فسانے
تعلیم سے کمتر ہیں جہاں بھر کے خزانے
ہر فرد کو تعلیم کی راہوں پہ چلائیں
اب قوم کے بچوں کو چلو علم سکھائیں
تعلیم صداقت کا، عدالت کا علم ہے
تعلیم سخاوت کا، شجاعت کا علم ہے
تعلیم اخوت کا، محبت کا علَم ہے
تعلیم کے میداں میں قدم مل کے بڑھائیں
اب قوم کے بچوں کو چلو علم سکھائیں
شایانؔ مری قوم کی پہچان ہے تعلیم
تعلیم مرا دین ہے، قرآن ہے تعلیم
اللہ کا قرآن میں فرمان ہے تعلیم
شایانؔ چلو نغمۂ تعلیم سنائیں
اب قوم کے بچوں کو چلو علم سکھائیں
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
