حسن عمل

ہے جائے عمل دنیا اور منظر عبرت بھی

کر آپ بھی کچھ اور دے اوروں کو نصیحت بھی

دنیا کی محبت ہی ہے اصل برائی کی

آغاز میں ذلت ہے انجام میں حسرت بھی

جذبات کی سب قیدیں احساس کے دم سے ہیں

آرام کی گھڑیاں بھی ایام مصیبت بھی

واقع میں نہیں کچھ بھی سب حد نظر تک ہے

آبادی کی رونق بھی ویرانے کی وحشت بھی

افسانہ ہے اور وہ بھی معلوم نہیں کب تک

جمشید کی عشرت بھی قارون کی دولت بھی

انجام کو دیکھو تو ذلت کی نمائش تھی

فرعون کی عزت بھی نمرود کی سطوت بھی

بے رنگ سے خاکے تھے تصویر جوانی کے

وہ عشق زلیخا بھی یوسف کی صباحت بھی

بیکار ہیں سب باتیں جز حسن عمل غافل

یہ جسم کی زینت ہے اور روح کی راحت بھی