راکھی

چلی آتی ہے اب تو ہر کہیں بازار کی راکھی

سنہری سبز ریشم زرد اور گل نار کی راکھی

بنی ہے گو کہ نادر خوب ہر سردار کی راکھی

سلونوں میں عجیب رنگیں ہے اس دل دار کی راکھی

نہ پہونچے ایک گل کو یار جس گل زار کی راکھی

عیاں ہے اب تو راکھی بھی چمن بھی گل بھی شبنم بھی

جھمک جاتا ہے موتی اور جھلک جاتا ہے ریشم بھی

تماشا ہے اہاہاہا غنیمت ہے یہ عالم بھی

اٹھانا ہاتھ پیارے واہ وا ٹک دیکھ لیں ہم بھی

تمہاری موتیوں کی اور زری کے تار کی راکھی

مچی ہے ہر طرف کیا کیا سلونوں کی بہار اب تو

ہر اک گل رو پھرے ہے راکھی باندھے ہاتھ میں خوش ہو

ہوس جو دل میں گزرے ہے کہوں کیا آہ میں تم کو

یہی آتا ہے جی میں بن کے بامہن آج تو یارو

میں اپنے ہاتھ سے پیارے کے باندھوں پیار کی راکھی

ہوئی ہے زیب و زینت اور خوباں کو تو راکھی سے

و لیکن تم سے اب جان اور کچھ راکھی کے گل پھولے

دوانی بلبلیں ہوں دیکھ گل چننے لگیں تنکے

تمہارے ہاتھ نے مہندی نے انگشتوں نے ناخن نے

گلستاں کی چمن کی باغ کی گل زار کی راکھی

ادا سے ہاتھ اٹھنے میں گل راکھی جو ہلتے ہیں

کلیجے دیکھنے والوں کے کیا کیا آہ چھلتے ہیں

کہاں نازک یہ پہونچی اور کہاں رنگ ملتے ہیں

چمن میں شاخ پر کب اس طرح کے پھول کھلتے ہیں

جو کچھ خوبی میں ہے اس شوخ گل رخسار کی راکھی

پھریں ہیں راکھیاں باندھے جو ہر دم حسن کے مارے

تو ان کی راکھیوں کو دیک اے جاں چاؤ کے مارے

پہن زنار اور قشقہ لگا ماتھے اپر بارے

نظیرؔ آیا ہے بامہن بن کے راکھی باندھنے پیارے

بندھا لو اس سے تم ہنس کر اب اس تیوہار کی راکھی