نارنگی

اب تو ہر باغ میں آتی ہے چلی نارنگی

ہے ہر ایک پیڑ پہ مصری کی ڈلی نارنگی

حسن والوں کی بھی سینہ کی پھلی نارنگی

دیکھ کر اوس کی وہ انگیا کی پلی نارنگی

ہم نے تو آج یہ جانا کہ چلی نارنگی

جب نظر آئی مجھے شوخ کے سینے کی بہار

کھٹا میٹھا سا لگا ہونے میرا دل یک بار

جا پڑا ہاتھ جو سینے کی طرف کھو کے قرار

اس قدر تھیں وہ کچیں شوخ ستم گار کی تیار

جس قدر سیب ہو یا جیسے پھلی نارنگی

جن دنوں شوخ کے عالم کا نیا موسم تھا

جب ہی مل لیتے تو دل کیا ہی سدا پھل پاتا

اب جو وہ وقت گیا تو ہے یہی حیف آتا

آہ اس ہاتھ سے اس حسن کی ڈالی کو جھکا

ہم نے افسوس جبھی توڑ نہ لی نارنگی