اسوۂ رسالت

جو بات ظلم سے نہ ہوئی پیار سے ہوئی

تہذیب زندگی ترے کردار سے ہوئی

جو مہر و ماہ بھی نہ زمانے کو دے سکے

وہ روشنی ترے در و دیوار سے ہوئی

امکان کی حدوں سے پرے تک ترے قدم

پیمائش جہاں تری پرکار سے ہوئی

ساحل کی آرزو نہیں تعلیم مصطفیٰؐ

یہ ناؤ تو روزانہ ہی منجدھار سے ہوئی

مظلوم کے لہو کا مقدر بھی جاگ اٹھا

اس کی بھی قدر آپ کی تلوار سے ہوئی

پتھر بھی کھائے میرے رسولؐ کریم نے

معراج حق بھی زینۂ ایثار سے ہوئی

تخلیق کائنات بھی صدقہ حضور کا

تزئین کائنات بھی سرکار سے ہوئی

عزت ہوئی جہاں میں مظفرؔ کی آپ سے

زر سے ہوئی نہ جبہ و دستار سے ہوئی