کبیرؔ کب سے بھیے بے راگی

سوال: کبیرؔ تم کب سے بیراگی ہوئے۔ تم کس کے عشق میں مبتلا ہو۔

جواب: جب وچتر کا میلا نہیں لگا تھا۔ جب وحدت میں کثرت کے جلوے دکھانے والے نے اپنا کھیل نہیں شروع کیا تھا۔جب گرو اور چیلے کی تفریق نہیں تھی، جب زمین اور آسمان (سکل =سنسار)کا پھیلاؤ نہیں تھا، جب پُرُش (ذاتِ مطلق) تنہا تھا، اے گورکھ ناتھ کبیرؔ تب ہی سے بیراگی ہیں تب ہی سے ہم ’برہم‘ کے عشق میں مبتلا ہیں۔ ہم نے یوگ اس وقت سیکھا تھا جب برہما کے سر پر تاج نہیں تھا، (تخلیق کائنات کا حق نہیں پایا تھا)۔ جب وشنو کے ماتھے پر ٹیکا نہیں تھا (دنیا کو پالنے کا ادھیکار نہیں ملا تھا۔) جب شور کی شکتی پیدا نہیں ہوئی تھی۔ ہم کاشی (بنارس) میں ظاہر ہوئے اور رامانند نے ہمیں شعور کی روشنی عطا کی۔ احدیت کی پیاس (لامحدود کو حاصل کرنے کا شوق) اور اس سے ملنے کی تڑپ ہم ساتھ لائے تھے۔ اس سادہ سے ہم سادگی ہی کے ساتھ مل سکیں گے اور بھگتی (محبت) کا طوفان امنڈ آئے گا۔ اے گورکھ ناتھ سنو کبیرؔ کہتے ہیں کہ اس کے سنگیت کی آواز کے ساتھ ساتھ بڑھے چلو۔

(ترجمہ: سردار جعفری)