کہے کبیرؔ وِچاری کے جا کے بَرن نہ گاؤں

کہیں کبیرؔ سوچ وچار کے بعد کہتے ہیں کہ وہ جس کی نہ کوئی ذات پات ہے نہ کوئی ٹھکانہ، جوجسم سے پاک اور صفات سے بے نیاز ہے، اس کامل سے ساری کائنات بھری ہوئی ہے۔ وہ خالق ہے جس نے مسرت اور سعادت کا کھیل شروع کیا ہے اور اوم کے لفظ سے کائنات کی تخلیق کی ہے۔ زمین مسرت ہے، آسمان مسرت ہے، چاند کا نور اور سورج کی روشنی مسرت ہے، ازل مسرت ہے، ابد مسرت ہے، ارتقا مسرت ہے، اندھیرا مسرت ہے، اجالا مسرت ہے، سمندر مسرت ہے، اس کی لہریں مسرت ہیں، مسرت ہیں گنگا اور جمنا اور سرسوتی کے دھارے۔ خالق ایک ہے، زندگی اور موت، ہجر اور وصال سب اس کے کھیل ہیں۔ کھیل پانی کا، کھیل مٹی کا، کھیل سارے جہاں کا، کھیل زمین اور آسمان کا، کائنات کی سرشت میں کھیل ہے اور کھیل ہی ساری کائنات ہے، کبیرؔ کہتے ہیں کہ ساری دنیا اس کا (حسین و جمیل) کھیل ہے۔ لیکن کھیلنے والے کو کئی نہیں پہچانتا۔

(ترجمہ: سردار جعفری)