پرتھم ایک جو آپے آپ نراکار نرگن نِرجاپ

ازل میں وہ اکیلا تھا اور اس کا اپنا وجود ہی اس کے لیے کافی تھا، وہ جس کا نہ رنگ ہے نہ روپ ہے، وہ جو بے صفات ہے۔ نہ تو ابتدا تھی، نہ ارتقا (مدھ = وسط) نہ انتہا، نہ اندھیرا تھا، نہ دھندلکا تھا، نہ اجالا۔ نہ زمین تھی، نہ ہوا تھی۔ نہ آسمان، نہ آّگ تھی نہ پانی، نہ گنگا جمنا ور سرسوتی کے دھارے تھے، نہ سمندر تھا نہ موجیں۔ نہ گناہ تھا، نہ ثواب، نہ وید پران تھے نہ قرآن۔ کبیرؔ سوچ بچار کے بعد کہتے ہیں کہ تب کوئی حرکت اور جنبش نہیں تھی، ذات مطلق (پرم پُرُش= ذاتِ اعلیٰ) اپنی خودی کی نامعلوم اور لا محدود گہرائیوں میں کھوئی ہوئی تھی۔

خالق (کرتا =کرتار)نہ کچھ کھاتا ہے نہ پیتا ہے۔ وہ نہ مرتا ہے نہ جیتا ہے، اس کا نہ کوئی روپ ہے نہ ریکھا (لکیر) نہ رنگ ہے نہ بھیس۔ نہ اس کی ذت پات ہے نہ گوتر، اس کی شان بیان سے باہر ہے۔ نہ مشسّکل ہے شکل (نہ خوبصورت ہے نہ بدصورت) اس کا کوئی نام نہیں ہے۔ نہ وہ رنگ میں اسیر رہا اور نہ رنگ سے آزاد ہے۔ اس کا کوئی مقام نہیں ہے۔

(یہ نظم اگر ایک طرف ان معنوں میں خالص و یدانت ہے کہ برہما مکمل عدم اور مکمل خاموشی (شونیہ) ہے تو دوسری طرف ’ہمہ اوست‘کی تشریح ان معنوں میں ہے کہ کائنات کی کسی چیز سے الگ اس کا وجود نہیں۔ وہ سب کچھ ہے الگ کچھ نہیں ہے۔)

(ترجمہ: سردار جعفری)