سادھو برہم الکھ لکھایا جب آپ آپ درسایا

سادھو، جب برَہم نے اپنے آپ کو ظاہر کیا تو غیب کو شہود کر دکھایا۔ جیسے بیج میں درخت دکھائی دیتا ہے اور درخت میں سایا، جیسے آسمان میں خلا (سُن = شونیہ) دکھائی دیتا ہے اور خلا میں ان گنت شکلیں، اسی طرح لامحدود کی پشت سے لا محدود نکلتا ہے (وراءالورا) اور لا محدود کے دل سے نکل کر محدود پھیل جاتا ہے، جیسے سورج میں کرن نظر آتی ہے اور کرن میں روشنی ویسے ہی پرماتما میں جیو اور جیو میں سانس اور سانس میں لفظ اور لفظ میں معنی جھلکتے ہیں۔ برہم میں جیو ہے اور جیو میں برہم دونوں الگ الگ ہیں اور دونوں ایک ہیں، وہ خود ہی بیج ہے خود ہی پیڑ ہے خود ہی سے کونپل خود ہی پھول پھل اور سایہ، وہ خود ہی سورج ہے خود ہی کرن ہے، خود ہی روشنی۔ خود ہی برہم ہے، خود ہی آسمان، خود ہی سانس ، خود ہی لفظ، خود ہی معنی۔ وہ خود ہی حد ہے اور خود ہی بے حد اور خود ہی حد اور بے حد سے باہر۔ وہ وجود مطلق ہے۔ وہ برہم اور جیو کے اندر عقلِ کل ہے، آتما میں پرماتما دکھائی دیتا ہے اور پرماتما میں جھائیں (جھلک) جھائیں میں پرچھائیں دکھائی دیتی ہے اور کبیرؔ سائیں اس نظارے میں محو ہے۔ (بعض ہندی پنڈتوں کا خیال ہے کہ یہ کبیرؔ کا پد (نظم) نہیں ہے)

(ترجمہ: سردار جعفری)