سنتو سہج سمادھی بھلی

سنتو سہج سمادھی ہی بھلی ہے۔ جب سے محبوب مل گیا ہے میں نے کسی اور سے لو نہیں لگائی ہے۔ نہ آنکھ بند کرتا ہوں نہ کان، نہ جسم کو تکلیف پہنچاتا ہوں۔ کھلی آنکھوں سے ہنس ہنس کر اس کے حسن کا جلوہ دیکھتا ہوں۔ جو بولتا ہوں وہ نام ہے، جو سنتا ہوں وہ تسبیح، جو کرتا ہوں وہ عبادت، مرے لیے گھر اور گلستاں ایک سا ہے، دوئی باقی نہیں ہے، میں جہاں بھی جاؤں وہ طوافِ شوق ہے اور جو کچھ کروں وہی اس کی خدمت ہے۔ میری نیند میرا سجدہ ہے، میں کسی اور دیوتا کی پوجا نہیں کرتا۔ دل مسلسل اس کے نام کا گیت گاتا ہے۔ اور کوئی ناپاک لفظ زبان پر نہیں آتا، اٹھتے بیٹھتے، اس کی یاد تازہ رہتی ہے اور ساز کی لےَ ٹوٹنے نہیں پاتی۔ کبیرؔ کہتے ہیں کہ میں نے اپنے دل کی دیوانگی کو ظاہر کر دیا ہے۔ میں انبساط کی اس منزل میں ہوں جہاں دکھ اور سکھ دونوں بے معنی ہیں۔

(ترجمہ: سردار جعفری)