سلام اللہ ما کر اللیالی

اللہ کا سلام آتا رہے اس بزرگی اور بلندی رکھنے والے بادشاہ پر جب تک راتیں آتی رہیں (یعنی پے در پے قیامت تک، یہاں ملک المکارم والمعالی سے، اللہ کے حبیب ہی مراد ہوسکتے ہیں)۔

وادی اراک پر (جہاں پیلو کے درخت ہیں) اور جو لوگ وہاں پر ہیں اور میرے گھر پر جو ریت کے اوپر لویٰ میں ہے (وادی اراک سے اغلب ہے کہ مدینہ منورہ کے قریب کا مقام مراد لیا جائے اور لویٰ سے وہ مقام مراد لیا جائے جہاں سے راستہ مدینہ کو مڑتا ہے، تو اللہ کے اس سلام میں صاحب مدینہ اور ان کے طفیل میں، وہ پوری وادی مقدس مراد ہوگی)۔

مت گھبرا اے دل کہ اس (محبوب) کی زنجیر میں پریشان حالی کے باوجود جمیعت قلبی ہے (یعنی جس محبوب کی زلف کے زنجیر میں تو قید ہے میری جمیعت خاطر کی دولت وہاں رکھی ہے)۔

تیری محبت میرے لئے ہر حال میں راحت کا سبب ہے ، اور تیرا ذکر ہر حال میں میرا انیس (ہمدم) ہے (یہاں ذاتِ باری تعالیٰ مراد لیجئے یا حبیب حق تعالیٰ مراد لیجئے، دونوں مفہوم کی گنجائش ہے)۔

میں تجھ جیسے بادشاہ کا وصال کہاں سے حاصل کرسکتا ہوں، میں تو ایک بدنام وبے پروا شرابی ہوں۔

خدا جانتا ہے کہ حافظ کا مقصد کیا ہے؟ اللہ اور ذوالجلال کا جاننا میرے لئے کافی ہے (یعنی اپنے مقصد کو ظاہر کرنا ضروری نہیں، کیونکہ میرے مقصد اور نیت سے اللہ واقف ہے)۔