بملازمان سلطاں کہ رساند ایں دعا را

بادشاہ دو جہاں کے غلاموں تک اور ان کے ذریعہ اس بارگاہِ عالی تک کاش یہ التجا کوئی پہنچادے کہ دونوں جہان کی سروری ملنے کے شکرانے میں حضورِ عالی اس گدائے حقیر کو اپنی نگاہوں سے دور نہ کریں۔

اے محبوب! عاشقوں کے حال پر یہ کیسی قیامت ہے کہ چہرہ تو چاند کی طرح روشن ہے اور دل پتھر کی مانند (یعنی محبوبِ حقیقی ذاتِ باری تعالیٰ کبھی تو انوار وتجلیات کا ظہور فرماتا ہے اور کبھی ان سے ایسا بے نیاز ہوجاتا ہے، جیسے سخت پتھر دل)۔

(پھر بھی رشتۂ امید ہاتھ سے نہیں چھوٹتا) اور تمام شب اس امید میں بسر ہوتی ہے کہ کسی دن صبح کی نسیم کی مانند وہ محبوب پیغام آشنائی سے اس حقیر کو سرفراز کرے گا۔ (کبھی تو اس کی بے نیازی ادھر متوجہ ہوگی)۔

حافظ سحر خیز کو خدا کے واسطے شراب (حقیقت ومعرفت) کا ایک گھونٹ عطا کر جس کو پی کر وہ تیرے حق میں دعا کرے کیونکہ دعائے صبح گاہی بڑی مؤثر ہوتی ہے۔ (خطاب یہاں پر ساقی سے ہے، جس سے مرشدِ طریقت بھی مراد لے سکتے ہیں)۔