جان ما از سر گذشتہ عشق او بر سر گرفت

ہماری جان نے ازل سے اس کے عشق کو قبول کیا ہے، اس لیے میں دونوں جہانوں میں ہر غم سے آزاد ہوں، کیوں کہ ہم نے اپنے محبوب کو پا لیا ہے۔

ہماری جان برسوں سے محبوب کی گلی میں پڑی تھی پھر اچانک محبوب آئے اور ہماری جان میں جان آ گئی۔

جو مرد جواں ہوتا ہے وہی اس راہ حق میں مرد عاشق ہو جاتا ہے اور پھر جو عاشق ہو جاتا ہے وہ صرف ایک ہی کا ہو کر ہر طرح کے خوف و خطر سے آزاد ہو جاتا ہے۔

اس کے لیے ترک دنیا آسان ہوگا جس کے لیے ایک ہی مرتبہ اللہ کے جمال نے اس کا مقصد پورا کیا یا اسی ہی کے فضل و کرم سے پورا ہوا۔

اگر کسی کو فقیر جیسی ملکیت میسر آ جائے تو دونوں جہانوں کا بادشاہ ہو جائے کیوں کہ اس طرح وہ پیغمبری کی حقیقت کو پا جاتا ہے۔

اگر کسی کو اللہ تعالیٰ پر توکل ہو تو بے شک پورے جہان کے زر و زیور پر اس کا تسلط اور قبضہ ہوگیا۔

عاشق کے سامنے ساتوں دوزخ بھی آتے ہوئے گریزاں ہوتے ہیں کیوں کہ عاشق نے اس جہاں میں اللہ کے نور کا خنجر تھام رکھا ہے۔

عاشقوں کو جب اللہ تعالیٰ کے نور کا ذرہ نظر آتا ہے تو وہ اس نور کی رمق سے متوالے ہو کر دیوانگی کو قبول کر لیتے ہیں۔

میں نے دوست کے لیے دونوں جہاں دل و جان سے ترک کر دیے اور اسی وجہ سے میرا محبوب اب میرے دل و جاں کے حجرے میں آ گیا ہے، میرے لیے اس سے بڑی اور کیا خوشی ہوسکتی ہے۔

احمد کے نور کے سوا یقیناً کسی صورت میں روشنی نہیں اور یہ سب اسی نور احمد ہی میں سے ہے جو اس قدر عالی مرتبت ہوا ہے۔

اس محبوب کے جلوہ سے تمام چہرے پاک و تازہ ہوجاتے ہیں اور عاشق کا ہر سجدہ اسی دلبر کی طرف لے جانے والے محبوب ہی کی چوکھٹ پر ہوتا ہے۔