مرحبا اے پیک مشتاقاں بدہ پیغام‌ دوست

خوش آمدید اے عاشقوں کے قاصد دوست کا پیغام دے، تاکہ میں رغبت سے دوست کے نام پر جان قربان کر دوں۔

ہمیشہ دیوانہ اور عاشق ہے قفس میں بلبل کی طرح، میری طبیعت کی طوطی دوست کے بادام اور شکر کے شوق میں۔

اس کی زلف جال ہے اور اس جال کا دانہ اس کا تل ہے اور میں، دانہ کی امید میں دوست کے جال میں پھنس گیا ہوں۔

حشر کے دن کی صبح تک مستی سے سر نہیں اٹھا سکتا، ہر وہ شخص جس نے میری طرح ازل میں دوست کے جام سے ایک گھونٹ پی لیا۔

میں نے اپنی حالت کی تفصیل کا ایک خط لکھا ہے لیکن، اس سے زیادہ اصرار کرنا دوست کے لئے درد سر ہوگا۔

میرا میلان وصال کی طرف ہے اور اس کا ارادہ فراق کی جانب ہے، میں نے اپنے مقصد کو چھوڑ دیا تا کہ دوست کا مقصد پورا ہو جائے۔

اگر موقع مل جائے تو آنکھ میں توتیا کی طرح لگا لوں، اس راستہ کی خاک کو جو دوست کے قدموں سے مشرف ہوتی ہے۔

اے حافظؔ درد اور غم میں جلتا رہ اور علاج نہ کر، اس لئے کہ دوست کے لاعلاج درد سر کا کوئی علاج نہیں ہے۔