نفحۂ باد یمنم آرزوست

مجھ کو ہوائے یمن کے ایک جھونکے کی آرزو ہے۔ اویس قرنی کے شورش عشق کی آرزو ہے۔ (حضرت اویس قرنی تابعی جلیل رضی اللہ عنہ کا عشق رسول مشہور ہے۔ اس لئے اس شعر میں یمن اور اویس قرن کا ذکر ہے)۔

جس محبوب کا قامت جسمانی، رشک گل ہے، اسی گلبدن کی خوشبو کی مجھے آرزو ہے (یعنی رسول اللہ کے جسم شریف کی لطافت کو رشک گل اور گلبدن سے تشبیہ دی گئی ہے)۔

سایۂ ہما سر پہ ہو یا نہ ہو (اس کی فکر نہیں البتہ) مجھے سروو سمن کے سایہ کی آرزو ہے۔ (سروو سمن سے ذات رسالت مراد ہے۔ ہما کے بارے میں مشہور ہے کہ وہ ایسا پرندہ ہے جو کسی کے سر پر سایہ فگن ہوجائے تو وہ بادشاہ بن جاتا ہے۔ شاعر گرامی کو یہاں ظل نبوی کے مقابلے میں اس کی کچھ تمنا نہیں)۔

ساقی وجام ہے، پھول ہے، اور بہار کا آغاز ہے، ایسی فضا میں دلبر تقویٰ شکن کی مجھے آرزو ہے۔ (دلبر سے محبوب و معشوق، یعنی ذات رسالت مراد ہے۔ تقویٰ شکن سے کمال حسن مراد ہے یعنی معشوقان مجازی جب حسن وجمال کے ساتھ سامنے آتے ہیں تو بڑے بڑے زاہدوں کا تقویٰ ٹوٹ جاتا ہے۔ یہاں آنحضرت کا حسن وجمال مراد ہے، جو ہر اعتبار سے مکمل تھا۔ اس کا تقویٰ شکن ہونا محض تشبیہ ہے کمال حسن کی ورنہ جمال باکمال نبوی پر نظر پڑنے سے تو دیکھنے والوں سے کفر وشرک اور فسق وفجور کے اثرات زائل ہوجاتے تھے)۔

اے محی تمہارے اس طرز شکن سے مجھے شاہ ابو الحسن کی یادآرہی ہے۔ (اسی طرز میں حضرت فرد کی غزل بھی ہے، اسی طرف اشارہ ہے)۔