آناں کہ خاک را بہ نظر کیمیا کنند

اے کاش مجھ پہ بھی وہ نگاہ کرم کریں

کرتے ہیں اک نظر میں جو مٹی کو کیمیا

اچھا ہے ان طبیبوں سے مخفی ہو میرا درد

اپنے وہ گنج غیب سے میری کریں دوا

معشوق جب اٹھاتا نہیں اپنا خود نقاب

کیوں پیش کر رہے ہیں خیالی وہ ماجرا

رندی وزہد سے جو میسر نہیں وہ حسن

بہتر ہے اپنا چھوڑ دیں خود اس پہ مدعا

واقف ہیں راز عشق سے جو اہل معرفت

رکھتے ہیں ان سے ربط جو ہیں ان سے آشنا

در پردہ ان کے فتنوں کا ہے ایک سلسلہ

جب تک اٹھےگا پردہ نہ جانے کریں وہ کیا

سن کر یہ بات چیخ اٹھے پتھر بھی کیا عجب

کرتے ہیں خوش ادائی سے اظہار مدعا

در پردہ سو گناہ سے بہترہے مے کشی

بیکار ایسا زہد ہے جو محض ہو ریا

پوشیدہ حاسدوں سے تو رہ کیونکر اہل خیر

کرتے ہیں کام جس میں خدا کی ہو بس رضا

حافظؔ ہمیشہ وصل نہیں ہے نصیب میں

ہوتے ہیں لطف شاہ سے کم بہرہ ور گدا