رونق عہد شباب ست دگر بستاں را

باغ کے لیے پھر جوانی کے زمانہ کی رونق ہے

پھول کی خوشخبری، خوش الحان بلبل کو پہونچتی ہے

اے صبا، چمن کے جوانوں کے پاس سے تیرا اگر گزر ہو

تو سرو اور گلاب اور ناز بو کو ہمارا سلام پہنچا دے

اے وہ، جو خالص عنبر کا بلا چاند پر تانے ہے

مجھ حیران کو پریشاں حال نہ لوٹا

مجھے ڈر ہے جو، لوگ تلچھٹ پینے والوں پر ہنستے ہیں

خرابات کے کام میں ایمان کو نہ لگا بیٹھیں

مردان خدا کا یار بن، اس لیے کہ نوح کی کشتی میں

ایسی خاک بھی ہے جو طوفان کو ذرا سا پانی نہیں سمجھتی

آسمان کے گھر سے باہر نکل جا، اور روٹی نہ مانگ

اس لے کہ یہ بخیل آخر میں مہماں کو مار ڈالتا ہے

اگر مے فروش کا مغبچہ، اسی طرح جلوہ دکھائے گا

تو میں پلکوں کو شراب خانہ کے دروازہ کا خاکروب بنا دوں گا

وجود کے رازوں کے ایک نکتہ سے بھی تو واقف نہ ہو سکے گا

اگر تو امکان کے دائرہ میں گھومتا رہے گا

جس شخص کی خوابگاہ انجام کار دو مٹھی خاک ہے

اس کو کہہ دو کہ اس کی کیا ضرورت ہے کہ تو سر افلاک محل بنائے

اے میرے ماہ کنعاں، مصر کی مسند تیری ملکیت ہو گئی ہے

اب وہ وقت ہے کہ تو قید خانہ کو خیر باد کہ دے

زلف کے معاملہ میں نہ معلوم تو کیا دیوانگی رکھتا ہے

کہ تو نے مشک بکھیرنے والی زلفوں کو پریشان کر رکھا ہے

آزادی کا ملک، اور قناعت کا گوشہ ایسا خزانہ ہے

جو بادشاہ کو تلوار کے ذریعہ حاصل نہیں ہو سکتا ہے

اے حافظؔ شراب پی اور رندی کر اور خوش رہ لیکن

دوسروں کی طرح، قرآن کو مکاری کا جال نہ بنا