بندے میں یہ خوبی اور خصوصیت اس وقت پیدا ہوتی ہے جب کہ انسان خدا کے اخلاق و صفات میں کمال حاصل کر لیتا ہے پھر ایسی ہی ذاتِ گرامی کو اصطلاحِ تصوف میں انسانِ کامل کہا جاتا ہے۔

جو شخص حضرت محمد رسول اللہ کے باطن کے مطابق زندگی گزارے پس وہ صوفی ہے۔

صوفی ذکرِ الٰہی سے کبھی غافل نہیں ہوتا، یادِ الٰہی کو حیات اور غفلت کو موت تصور کرتا ہے۔

صوفیانہ شان کی حامل یہ شخصیت اوروں کو راحت پہنچاتے ہوئے خود تکلیف اٹھاتے ہیں، یہ ہم کو صرف صوفیہ کی زندگی میں ہی ملتا ہے کیوں وہ اسباب سے زیادہ مسبب الاسباب پر نظر رکھتے ہیں اور اس حقیقت کا انکشاف وہی شخص کر سکتا ہے جو عارف باللہ ہو۔

فلسفہ و تصوف دونوں میں کسی قسم کا تعلق نہیں، ایک طبقہ جو عبادتِ الٰہی کو ضروری نہیں سمجھتا غلط اندازِ فکر کا حامل ہے، تصوف اس علم کا نام ہے جس میں صرف وہ امور مذکور ہوتے ہیں جو تقرب الی اللہ کے طریقے بتلائیں اور لوازم تصوف ایسے سخت ہیں کہ اہلِ فلسفہ ان کو سن لیں تو گھبرا جائیں، اوائل میں جو اہلِ تصوف تھے وہ زینت اور زرق و برق کو ترک کر کے صرف صوف یعنی کمبل پر قناعت کرتے تھے اس لیے ان کا نام ہی صوفی ہوگیا۔