دل میں پیدا ارتعاشِ غم ہوا
دل میں پیدا ارتعاشِ غم ہوا
یوں سخن گستہ بہ چشمِ نم ہوا
السلام اے رحمتہ اللعالمین
السلام اے سبز گنبد کے مکیں
السلام اے رہنمائے قدسیاں
السلام اے کارسازِ بیکساں
السلام اے مرسلوں کے تاجدار
السلام اے عاجزوں کے غم گسار
بے نواؤں کو زرِ افشاں کر دیا
تو نے کانٹوں کو گلستان کر دیا
تیری رحمت ہے محیطِ بحر و بر
میرا دامانِ تمنا مختصر
ہے تری اقصائے دو عالم میں دھوم
میرے دل میں آرزوؤں کا ہجوم
بے نواؤں اور غریبوں کے حبیب
فارغ البالی مجھے بھی ہو نصیب
درد سے لبریز پیانہ میرا
آنسوؤں کا ہار نذرانہ مرا
سروری حاصل تجھے کونین کی
سرمدیت دے مجھے دَارین کی
وسعتیں بخشیں مجھے ادراک نے
پھول برسائے خس و خاشاک نے
اک فقیر بے نوا کو اے ثمرؔ
یاد فرمایا شہِ لولاک نے
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
