یہ ہے عرض اے رحمت خاص و عام

یہ ہے عرض اے رحمت خاص و عام

علیہ الصلوٰۃ و علیہ السلام

مجھے مقصد زندگی دیجیے

بلا لیجیے پیش باب السلام

بہت دن سے ہے قلب اندوہ گیں

بہت دن سے نظریں نہیں شاد کام

نہیں زندگی میں کوئی کیف بھی

الم لے کے آتی ہے ہر صبح و شام

خدا جانے کب تک رہوں صرف جور

خدا جانے کب تک ہو قصہ تمام

یہی بس ہے حسرت یہی آرزو

مدینہ کی گلیاں ہوں اور صبح و شام

بجز آپ کے اور کس سے کہے

کہ بہزادؔ ہے آپ ہی کا غلام