زائرو پیش کرو جب شہ_ذیشاں کو سلام

زائرو پیش کرو جب شہ ذیشاں کو سلام

ہم غریبوں کا بھی سلطان غریباں کو سلام

یاد رکھنا حرم پاک کے جانے والو

اس گنہ گار کا بھی رحمت یزداں کو سلام

خوابگاہ شہ کونین یہ ہر لحظہ درود

سحر و شام میرے حاصل ایماں کو سلام

جس سے ہوتی ہیں میری ہجر کی راتیں روشن

حرم قدس کی اس شمع شبستاں کو سلام

گنبد خضریٰ کا ہر روز جو کرتی ہیں طواف

ان شعاعوں کو اور اس مہر درخشاں کو سلام

در اقدس پہ جو مصروف گہر باری ہو

نگہ شوق کا اس دیدۂ گریاں کو سلام

نگہ سرور کونین پڑی ہے جس پر

اس رہ منزل و کوہسار و بیاباں کو سلام

محو آرام ہیں جس خاک پہ اصحاب احد

ایک مہجور کا اس گنج شہیداں کو سلام

جس میں ہے خلد در آغوش قبا کی مسجد

اس خیاباں کو سلام اس چمنستاں کو سلام

ان کی رحمت سے میسر ہوں وہ دن کاش حمیدؔ

خود کریں عرض شہنشاہ رسولاں کو سلام