الفت_آل_پیمبر ہو تو اس عنوان سے

الفت آل پیمبر ہو تو اس عنوان سے

حق کو جیسے دین سے یا دین کو قرآن سے

کربلا کے ناخدا نے مصطفیٰ کی شان سے

کشتئ حق کو بچایا کفر کے طوفان سے

ظلم کو پسپا کیا مظلومیت کی شان سے

فتح کی تاریخ لکھی ہار کے عنوان سے

ساری دنیا کو جگا کر چین سے سوئے حسین

پوچھ لو یہ کربلا کے گرم ریگستان سے

سرزمین کربلا کے پاک سجدوں کی قسم

گردن اسلام خم ہے شاہ کے احسان سے

نوک نیزہ پر تلاوت کتنی معنی خیز تھی

مر کے بھی اعلان حق کرتے رہے قرآن سے

عرصۂ محشر میں جامہ جب مجھے لایا گیا

شہ نے فرمایا خطا ہوتی ہی ہے انسان سے