سلام لکھتا ہوں شاہِ دیں کا شریکِ غم جن کا دو جہاں ہے

سلام لکھتا ہوں شاہِ دیں کا شریکِ غم جن کا دو جہاں ہے

زمین ماتم کدہ بنی ہے الم سے دل چاک آسماں ہے

غریب تشنہ دہن مسافر کو آبِ خنجر پلا کے مارا

غضب ہے بے درد ظالموں نے نہ سمجھا اتنا کہ میہماں ہے

شہید ابن علی کے ہوتے، ہوئی ہے بے نور کتنی دنیا

چھپا ہے بدلی میں چاند جب سے نظر میں وہ چاندنی کہاں ہے

ہوئے ہیں سجاد غم سے لاغر رگوں میں ایمان کی ہے طاقت

قدم ہے لغزش میں چشم پرنم جو دل کو دیکھو تو نوجواں ہے

جگر میں لالہ کے داغ دیکھا پھٹے ہوئے پیراہنِ گلوں کے

حسین ابن علی کے غم میں یہ سارا غمگین گلستاں ہے

پہنایا گردن میں طوق بھاری جناب عابد کی ظالموں نے

کسی کے منہ سے نہ اتنا نکلا بہت یہ بیمار ناتواں ہے

ہے مرتبہ مشہدِ مقدس کا کتنا اونچا نہ پوچھو محمودؔ

جہاں قدم پڑ گیے ہیں ان کے وہاں کا ہر ذرہ آسماں ہے