ممکن تھی کربلا میں حفاظت حسین کی

ممکن تھی کربلا میں حفاظت حسین کی

اغلب تھا جان رہتی سلامت حسین کی

لیکن خدا کی اور ہی مرضی تھی دوستو

مد نظر اسے تھی شہادت حسین کی

یہ سانحہ مفید تھا اسلام کے لئے

اس واسطے ہوئی تھی شہادت حسین کی

یورش میں دشمنوں کے بھی پڑھتے رہے نماز

کتنی تھی پر خلوص عبادت حسین کی

اہل ہنود ہوں کہ ہوں مسلم بزرگوار

سب پر ہے فرض عین اطاعت حسین کی

وہ راز سرمدی سے خبردار ہوگیا

سمجھی جہاں میں جس نے حقیقت حسین کی

کرب وبلا میں پیاس کا حملہ شدید تھا

کرتی ہے بے قرار روایت حسین کی

ہو جاؤں میں بھی پرسش اعمال سے بری

مجھ پر بھی حشر میں ہو عنایت حسین کی

کوئی طریق حق سے نہ باہر پڑا قدم

رہبر بنی شمیمؔ مشیت حسین کی