رخ پر آتے ہی بنا عرش کا تارا سہرا

رخ پر آتے ہی بنا عرش کا تارا سہرا

نور اللہ کا اللہ کا سایا سہرا

آنکھ کا نور ہے یا نور نظر کا سہرا

بن کے تا حشر رہے باپ کا سایا سہرا

دور سے اے نگہ شوق بلائیں لے لے

کس ادا سے ہے نقاب رخ زیبا سہرا

زجر و مد کے لیے رخسار ہیں دونوں مہ و مہر

موج ہے سلک گہر حسن کا دریا سہرا

لگی آنکھیں ہیں حسینوں کی ادھر آ مالن

خوب تو نے گل نرگس کا بنایا سہرا

رخ نوشہ کی طرف کیوں نہ بڑھائے سو ہاتھ

ہے بہت شربت دیدار کا پیاسا سہرا

چھیڑنے کو نگہ شوق کی بنتا ہے حجاب

کوئی دیکھے تو ذرا شوخ ہے کتنا سہرا

آج پھولوں کی طرح تاروں کی حسرت نکلی

ضو فشانی سے بنا عقد ثریا سہرا

تیرے چہرے سے یہ ہٹنے کا نہیں اے نوشاہ

رہ گیا بن کے تری زلف کا سایا سہرا

دیکھنے میں یہ قیامت سے سوا ہے دو ہاتھ

ابھی سمٹے تو بنے آنکھ کا تارا سہرا

ہیں ہر اک تار سے سو تار نظر وابستہ

حسن تزئیں سے بنا آج تماشا سہرا

پر خمار آنکھ کا نوشاہ کے نظارہ ہو

صبح ہوتے در مے خانہ کرے وا سہرا

لے بلائیں رخ نوشہ کی الٰہی دن رات

بن کے گیسو یونہی لہرائے خدایا سہرا

ایک دزدیدہ نظر ہنس کے ادھر بھی نوشہ

آج لایا ہے دکھانے نئی دنیا سہرا

نوشہ کی مست نگاہوں سے نہ لے کام ریاضؔ

نہ بڑھائے اثر نشۂ صہبا سہرا