نازِ لب، اندازِ کل، شرم و حیا سہرے میں ہے

نازِ لب، اندازِ کل، شرم و حیا سہرے میں ہے

اور کمالِ حسن کی ساری ادا سہرے میں ہے

روئے نوشہ پہ ہے دیکھو تابناکی شمس کی

دیکھیے شب تابیِ بدرالدجیٰ سہرے میں ہے

خانداں نوشہ کا سارا بن گیا سہرے کا پھول

مجمعِ احباب کا بھی مدعا سہرے میں ہے

ماہتابِ دل نشیں ہے دل سے نوشہ پر فدا

حسن کے افلاک کا اک مہ لقا سہرے میں ہے

فیضِ خاصِ وارثِ ارثِ علی سہرا ہے یہ

جاں نثارِ وارثِ آلِ عبا سہرے میں ہے

ہیں شفیع و صائمہ تمثیلِ یک سلکِ گہر

زلفِ شبگوں ماہِ رو دو آتشہ سہرے میں ہے

ایک عکسِ آئینہ ہے ایک حسنِ آئینہ

اس لیے تو آئنہ در آئنہ سہرے میں ہے

سنبلِ لب بستہ بھی سہرے پہ آ کر کھل گئی

معجزہ سہرے کا ہے، معجز نما سہرے میں ہے

سایۂ والشمس ہے جلوہ فگن مثلِ قنات

نورِ شمعِ والضحىٰ بدرالدجىٰ سہرے میں ہے

محوِ حیرت آفتابِ نیل گوں ہے دیکھ کر

سورۂ والشمس کی ایسی ضیا سہرے میں ہے

کرتے خود سہرا رقم ہوتے جو اگر میرِ انیس

اس شاعرِ معجز رقم کا آشنا سہرے میں ہے

فیضِ بیدم ہے اثر انگیز پوری نظم پر

کہہ رہے ہیں سارے مصرے مرحبا سہرے میں ہیں