معین الارواح اردو ترجمہ مونس الارواح

حدِّ قیاس سے زیادہ حمد و سپاس اس صانع قدیم جلّ جلالہ کو جس نے اپنی قدرت کاملہ سے تمام انبیا اور رسول کو اہل انام کا ہادی اور رہنما مقرر فرمایا اور احاطۂ تحریر سے باہر شکر و ثنا اس خالقِ رحیم عمّ نوالہ کو جس نے اپنی صفت شاملہ سے اولیا اور مشائخ کو دین اسلام کا مقتدا اور پیشوا بنایا۔ اے صاحب، اے خداوند، اے بادشاہ جب کہ انبیائے مرسلین اور ملائکہ مقربین کی زبان تیری تعریف میں عاجز ہے، اس ضعیفہ کی کیا مجال کہ تیرے اوصاف میں زبان کھولے۔

اشعار

اے بہ و صفت بیانِ ماہمہ ہیچ

ہمہ آں توزانِ ماہمہ ہیچ

ہر چند بیند خیالِ ماہمہ نقص

ہرچہ گوید زبان ماہمہ ہیچ

مابکنہ حقیقت نہ رسیم

ایں یقین و گمانِ ماہمہ ہیچ

اور صلوات طیبات بے انتہا اس پر جس کا لقب سیدالاولین والآخرین رحمۃ للعالمین ہے۔ اور تحّیات زاکیات اس کے واسطے جو باعث ہستی دوجہاں اور شفیع گروہِ عالمیاں ہے۔

رباعی

سلطانِ رُسل کزہمہ ہاپاک آمد

ذ آتش سببِ خلقت افلاک آمد

در شانِ شریف او حدیث قدسی

لو لاک لما خلقت الافلاک آمد

اور آپ کی آل پاک اور اصحاب کبار پر جو اختر برجِ شرافت اور گوہر درجِ ہدایت ہیں، رضوان اللہ تعالیٰ علیہم اجمعین۔ جان کہ حضرتِ سبحانہ تعالیٰ نے وجود اولیا کو موجب ثبات قیامِ عالم بنایا ہے اور اس فرقہ کی محبت اور ارادت کو نجات کا وسیلہ مقرر فرمایا ہے۔ مومنین و مومنات کو ان کے سلسلوں سے متعلق کر کے قیامت میں رہائی اور رستگاری کا سبب گرداناہے، اس دن کہ جس کی شان میں آیت کریمہ

یَومَ یَفِرُّ المَرْءُ مِنْ اَخِیْہِ وَاُمِّہِ وَاَبِیْہِ وَصَاحِبَتِہ وَبَنیْہِ

ترجمہ : اس دن یعنی قیامت کے روز بھاگے کا مرد اپنے بھائی اور ماں اور باپ اور اپنے بیٹے اور بیٹی سے۔

وارد ہے اور اس روز کی مقدار پچاس ہزار سال کے برابر ہوگی اور اہل عالم کو طرح طرح کے غم اور ہول اور مصیبتیں لاحق ہوں گی اور مریدوں کے حلقے اپنے پیروں کے جھنڈے کے نیچے کھڑے ہوں گے اور بزرگانِ دین کی حمایت میں اُن آفات سے امن میں رہیں گے۔ ہزار حمد و ثنا ہے کارساز بندہ نواز کو کہ حلقۂ اردات سلسلۂ شریفہ چشتیہ کو کہ ممالک وسیع ہندوستان بلکہ معمورۂ جہان میں رواج رکھتاہے اور بہت اولیائے نامدار عالم مقدار اس سلسلہ میں ہوئے ہیں، اِس فقیرہ حقیرہ بنت شاہجہان بادشاہ غازی کے گوش دل و جان میں ڈالا ہے، یہ عاجزہ اگر برسرمو زبان رکھتی ہو اس عطیہ عظیمہ کے شکر سے عاجز ہے اوریہ عاصیہ قطب المشائخ، خلاصۃ الاصفیا، گزیدہ بارگاہِ کبریا، حضرت خواجہ معین الدین حسن سنجری چشتی قدس اللہ سرہ العزیز کے مریدانِ بااعتقاد سے ہے اور وہ حضرت خواجہ عثمان ہارونی قدس اللہ سرہ کے مرید ہیں اور وہ حضرت خواجہ حاجی شریف زندانی کے اور وہ حضرت خواجہ مودود چشتی کے اور وہ حضرت خواجہ ابو یوسف چشتی کے اور وہ اپنے پدرِ بزرگوار حضرت خواجہ ابو یوسف چشتی کے اور وہ اپنے پدربزرگوار حضرت خواجہ محمد چشتی کے اور وہ اپنے والدماجد حضرت خواجہ ابو احمد ابدال چشتی کے اور وہ حضرت خواجہ شیخ اسحاق شامی چشتی کے اور وہ حضرت خواجہ ممشاد ومینوری کے اور وہ حضرت خواجہ ہیبرۃ البصری کے اور وہ حضرت خواجہ حذیفہ مرعشی کے اور وہ حضرت سلطان ابراہیم ادہم بلخی کے اور وہ حضرت فضیل ابن عیاض کے اور وہ حضرت خواجہ عبدالواحد بن زید کے اور وہ حضرت خواجہ حسن بصری رحمۃ اللہ علیہ کے اور وہ حضرت امیر المومین امام المتقین علی ابن ابی طالب کرم اللہ وجہہ کے اور وہ حضرت خیرالخلق احمد مجتبیٰ محمد مصفطیٰ صلی اللہ علیہ وآلہ کے مرید تھے، اس سلسلہ متبرکہ کا شجرہ طیبہ سفیۃ الاولیا سے جو اس حقیرہ کے بھائی اور مرشد صاحب ظاہر و باطن سعادت پژوہ سلطان محمد داراشکوہ قادری مد اللہ ظلہ کی تصنیفات سے ہے، نقل کیا اور اس رسالہ کا مونس الارواح نام رکھا۔ امیدوار ہے کہ حضرت خواجہ غریب نواز رحمۃ اللہ علیہ کی عنایت بیغایت مریدان صادق الاعتقاد کے حال پر مبذول رہے اوردنیا و آخرت میں دستگیری کرے۔ واللہُ الْمُوَ فِقُ فِیْ کُلّ الاُمُوْرِ

نقل ہے کہ حضرت سلطان الاولیا، سیدالاتقیا، سراج العارفین، معین الملت والدین، محمد حسن الحسنی السنجری الچشتی قدس اللہ سرہ مشائخ کبار میں کرامت اور کمال اور درجات عالیہ کے ساتھ مشہور و معروف ہیں، ولادت باسعادت ولایت سجستان میں ہوئی اور دیار خراسان میں نشو و نما پائی۔ آپ کے پدربزرگوار نقاوہ دودمانِ نبوی خلاصہ خاندانِ مصطفوی تاج السالکین حضرت خواجہ غیاث الدین حسن سنجری چشتی رحمتہ اللہ علیہ صاحبِ زہد و تقویٰ عابد و پارسا تھے، جب انہوں نے انتقال فرمایا حضرت خواجہ معین الدین چشتی قدس اللہ سرہ کی عمر پندرہ برس کی تھی۔

والد ماجد کی میراث سے آپ کو ایک باغ اور ایک پن چکّی پہنچی تھی، آپ اس کے محصول سے اپنی اور متعلقین کی اوقات بسری کرتے تھے، کہتے ہیں کہ وہاں ایک مجذوب اہل حال صاحب کشف و کمال رہتا تھا، اس کو ابراہیم قندوزی کہتے تھے ایک روز حسب ایمائے غیبی خواجہ صاحب کے باغ میں آیا، آپ درختوں کو پانی دے رہے تھے جب مجذوب کو دیکھا سامنے جاکر رسم ادب و تعظیم بجالائے اور اس کے ہاتھ چوم کر ایک سایہ دار درخت کے نیچے بٹھلایا اور چند خوشہ ہائے انگور پیش کئے، ابراہیم نے کھا کر ایک کھل کا ٹکڑا بغل سے نکالا اور اس پر دانت مار کر حضرت خواجہ صاحب کو کھلایا، کھاتے ہی آپ کے دل میں ایک نورظاہر ہوا اور دنیا و ما فیھا کی محبت دل سے زائل ہوئی، باغ اور ملک کو فروخت کر کے فقرا و مساکین کو نفقہ کیا اور سمر قند و بخارا کی طرف روانہ ہوئے، ایک مدت تک وہاں رہ کر علم ظاہری کی تکمیل فرمائی اور قرآن مجید حفظ کیا پھر عراق و عرب کی طرف متوجہ ہوئے۔ جب قصبہ ہارون میں کہ نواحی نیشاپور میں ہے، پہنچے منبع جو دو احسان قطب آسمان عرفا خواجہ عثمان ہارونی قدس اللہ سرہ العزیز کی خدمت میں حاضر ہوئے، خواجہ ہارونی رحمۃ اللہ علیہ اکابر مشائخ سے ہوئے ہیں، لکھا ہے کہ ایک وقت حضرت خواجہ عثمان کا گزر مغوں کے مسکن میں ہوا وہاں بہت بڑا آتش خانہ تھا، اس میں ہر روز بیس چھکڑے لکڑیاں ڈالی جاتی تھیں اس کے قریب فروکش ہوئے، آپ کا خادم چاہتا تھا کہ افطار کے واسطے روٹی پکائے، آگ لینے کے واسطے جب ادھر گیا مغوں نے پہچانا کہ مسلمان ہے، مانع ہوئے۔ خادم نے آکر حضرت سے حال عرض کیا۔ آپ وضو کر کے آتش کدے کی طرف تشریف لے گئے، مختار نام، جو آتش پرستوں کا سردار تھا، اس کی گود میں ایک سات برس کا لڑکا تھا، آپ نے اس مغ سے پوچھا کہ تم لوگ اس آگ کی پرستش کس واسطے کرتے ہو اور جوکہ آگ اور کل مخلوق کا خالق ہے اس کی عبادت نہیں کرتے، اس نے جواب دیا کہ ہمارے دین میں آگ کا بڑارتبہ ہے اورہم اس واسطے اس کی پرستش کرتے ہیں کہ قیامت کے روز ہم کونہ جلائے، آپ نے کہا کہ اتنے سال سے تم آتش پرستی کرتے ہو ایسا بھی ہوسکتاہے کہ تم آگ کو ہاتھ پر رکھو اور نہ جلائے، اس نے کہا کہ آگ کی خاصیت جلانا ہے۔ ایسا نہیں ہوسکتا یہ کہہ کر آپ نے اس لڑکے کو اس مغ کی بغل سے اپنی گود میں لے کر آگ کا قصد فرمایا۔ مغوں نے شور کیا کہ اے شیخ یہ کیا کرتاہے۔ حضرت شیخ بسم اللہ الرحمن الرحیم پڑھ کر زبان پرلائے قُلنَا یانَارکُوْنِیْ بَرْداً وَّ سَلاَماً عَلیٰ اِبْرَاھِیْمَ وَاَرادُوا بِہ کَیْداً فَجَعَلْنَا ھُمُ الْاٰخِرِیْنَ۔

ترجمہ : ہم نے کہا کہ اے آگ ٹھنڈی ہو جا اور ابراہیم پر سلامتی اور انہوں نے ابراہیم کے ساتھ فریب کا ارادہ کیا پس اس کو بہت خسارہ پانے والوں میں سے کیا۔

اور آگ میں داخل ہوئے، کئی ہزار آتش پرست وہاں موجود تھے۔ سب نے غل مچایا تھوڑی دیر بعد آپ معِ طفل آگ سے باہر آئے اور لڑکے اور آپ کے جامہ ٔمبارک پر بھی آگ کا اثر نہ پہنچا ۔مغوں نے لڑکے سے پوچھا تونے اس آتش خانہ میں کیا دیکھا، کہاکہ وہاں ایک باغ تھا، اس میں طرح طرح کے پھول کھلے تھے اور عجیب بہار تھی۔ مغوں نے جب یہ کرامت دیکھی سبھوں نے اخلاص کی روسے اپنا سرپائے مقدس پر رکھا اور صدق دل سے کلمہ پڑھ کر مسلمان ہوئے، آپ نے مختار کا نام شیخ عبداللہ اور لڑکے کا نام ابراہیم رکھا۔ یہ دونوں کامل ولی ہوئے پھر مغوں نے اس آتش خانہ کو خانۂ خدا بنایا اورعبادت میں مشغول ہوئے۔ ڈھائی برس تک آپ وہاں مقیم رہے۔ حضرت خواجہ عثمان ہارونی کی وفات مکہ معظمہ میں ماہ شوال کی چھٹی تاریخ واقع ہوئی۔ الغرض حضرت خواجہ معین الدین رحمۃ اللہ علیہ نے بیس سال اور چھ ماہ حضرت شیخ قدس اللہ سرہ کی خدمت میں ریاضت اور مجاہدہ کے ساتھ بسر کئے اور کام کو انجام پر پہنچایا۔ آپ سفر و حضر میں اپنے پیر ومرشد کا جامۂ خواب اور چھاگل اور جانماز وغیرہ اپنے سر پر لئے پھرتے تھے، پھر حضرت مرشد سے خرقۂ خلافت حاصل کر کے قصبہ سنجر میں تشریف لائے۔ دو ماہ اور پندرہ روز وہاں رہ کر قصبہ جیلان میں پہنچے اورحضرت غوث الثقلین محبوب سبحانی شیخ محی الدین عبدالقادر جیلانی قدس اللہ روحہ کی خدمت میں حاضر ہوئے۔ قصبۂ جیل بغداد شریف سے سات روز کی راہ ہے۔ آپ پانچ مہینے اورسات روز حضرت غوث الاعظم رحمۃ اللہ علیہ کی صحبت میں رہے۔ خواجہ صاحب کا حجرۂ متبرکہ اس مقام فرخ فرجام میں اب تک موجود ہے، پھر وہاں سے ہمدان میں اور ہمدان سے تبریز میں پہنچے اور وہاں کے بزرگوں سے ملاقات کی۔ نقل ہے کہ حضرت شیخ فریدالدین مسعود گنج شکر رحمۃ اللہ علیہ نے فرمایا کہ میں نے اپنے پیر حضرت خواجہ قطب الدین احمد بن موسیٰ اوشی سے سنا کہ فرماتے تھے کہ میرے پیر و مرشد حضرت خواجہ معین الدین چشتی علیہ الرحمۃ ریاضت و مجاہدہ عظیم رکھتے تھے۔ سات روز کے بعد ایک روٹی کے ٹکڑے کو جو پانچ مثقال سے زیادہ (ایک مثقال ساڑھے چارماشہ کا ہوتاہے) نہ ہوتا تھا، پانی میں بھگوکر افطار کرتے تھے اور شیخ نظام الدین بدایونی قدس اللہ سرہ سے منقول ہے کہ حضرت خواجہ دوتائی بخیہ زدہ پہنتے تھے اور ہر جنس کے پرانے کپڑوں سے پیوند لگاتے تھے اور شیخ شکر گنج نے فوائد الفواد میں تحریر فرمایا ہے کہ

’’میں نے اس دوتائی کو دیکھا ہے۔ لکھا ہے کہ وہ جامہ متبرکہ حضرت شیخ نظام الدین کو ملا‘‘

اور کہتے ہیں کہ خرقہ بھی پایا اور حضرت خواجہ غریب نواز نے جب حضرت خواجہ عثمان علیہ الرحمہ والغفران سے خرقہ حاصل کیا آپ کی عمر شریف باون سال کی تھی اور مشغولی کامل رکھتے تھے اور اکثر قدم تجرید و تفرید کے ساتھ سفر کرتے اور جہاں پہنچتے اکثر قبرستان میں رہتے اور ہر روز قرآن مجید کے دو ختم لازم فرئے تھے اور آپ چاہتے تھے کوئی شخص آپ کے حال سے واقف نہ ہو۔ جب کوئی مطلع ہوجاتا پھر وہاں توقف نہ فرماتے اور اظہار کرامت و خوارق سے اجتناب رکھتے تھے اور حضرت خواجہ ہارونی رحمۃ اللہ علیہ نے فرمایا کہ معین الدین، اللہ تعالیٰ کا محبوب ہے اور مجھے اس کے مرید ہونے سے فخر ہے اور جب آپ اپنے پیر برحق سے مرخص ہوئے بغداد شریف اور تبریز اور استرباد اور ہرات میں ایک مدت تک قیام پذیر رہے۔ اکثر راتوں کو شیخ الاسلام شیخ عبداللہ انصاری رحمۃ اللہ علیہ کے بقعۂ شریفہ میں رہتے اور دن کو سیر میں گذارتے تھے اور ایک مقام میں کم قیام فرماتے تھے اور ایک خادم کے سوا دوسرا خدمت میں نہیں رہتاتھا اور اکثر صبح کی نماز عشا کے وضو سے ادا کرتے تھے۔ جب ہرات میں شہرت پائی قدم مبارک سے سبزوار کو رونق بخشی۔ وہاں کا حاکم محمد یادگار نام بے دیانتی اور بدخلقی اور ظلم کے ساتھ مشہور تھا۔ آپ اس کے باغ میں تشریف لاکر حوض کے کنارے پر بیٹھے۔ وہ بھی وہاں آیا، جب اس کی آنکھ حضرت پر پڑی، اس کے تمام اعضا میں لرزہ پڑا اوراوندھے منہ گر کر بیہوش ہوگیا اور اس کے رفیقوں پر خوف غالب ہوا۔ آپ نے اس حوض کا پانی اس کے منہ پر مارا، وہ ہوش میں آیا پھر حضرت نے بلند آواز سے فرمایا کہ تونے توبہ کی۔ اس نے عجز تمام کے ساتھ کہا کہ میں نے توبہ کی اورجو لوگ اس کے ہمراہ تھے، وہ تائب ہوئے۔ پھر آنے فرمایا کہ وضو کر کے دوگانۂ شکر ادا کرو سب نے ادا کیا اور پھر محمد یادگار اپنے تابعین کے ساتھ آپ کا مرید ہوا اور جو کچھ اس کے تصرف میں تھا راہِ خدا میں صرف کیا پھر حضرت خواجہ وہاں سے بلخ کو تشریف لے گئے۔ اس جگہ ایک حکیم تھا، ضیاؤالدین نام، وہ اہلِ تصوف کی طرف سے بداعتقاد تھا۔ کہتا تھا کہ علم تصوف ایک ہذیان ہے کہ تب زدہ اور دیوانہ زبان پر لاتے ہیں اور آپ کے خادم کے ساتھ تیر و کمان اور چقماق اور نمکدان کے ساتھ رہتا تھا۔ جب کبھی آبادی سے دور پڑتے، جنگل میں گزرتے اور قوت کے واسطے شکار کرکے بے شبہ لقمہ سے افطار فرماتے ایک دن ایک کلنگ کا شکار کیا تھا۔ جب شہر میں داخل ہوئے جہاں حکیم ضیاؤالدین علم حکمت کا درس کہتاتھا، وہاں آپ کا گزر ہوا۔ ایک درخت کے نیچے بیٹھے خادم کباب بناتاتھا اورحضرت مخدوم نماز میں مشغول تھے۔ حکیم نے دیکھ کر چاہا کہ وہاں جاکر بیٹھے اور کباب سے ایک حصہ پائے۔ آپ کے دیدار کے مشاہدے سے حکیم کے دل میں اثرِ عظیم پیدا ہوا۔ جب آپ نماز سے فارغ ہوئے حکیم نے سلام کیا اور خادم نے حضرت کی خدمت میں کباب حاضر کئے۔ آپ حکیم کی خواہش پر واقف ہوئے اور بسم اللہ کہہ کر کباب سے ایک ران عطا کیا اور آپ کباب کھانے میں مشغول ہوئے، اس کے کھاتے ہی ضیاؤالدین کے سینہ سے فلسفیات کی تاریکی یکبارگی زائل ہوئی۔ نورِ معرفت دل میں چمکا اوربیخودی طاری ہوئی۔ اس حال میں آپ نے اس کباب کا کچھ گوشت دہن مبارک سے جھوٹا کر کے اس کے منہ میں ڈالا، وہ ہوش میں ہوا۔حاصل کلام فلسفہ کی تمام کتابوں کو پانی میں ڈال کر اپنے شاگردوں کے ساتھ تائب اور آپ کا مرید ہوا۔ بعدہٗ آپ نے لاہور کا قصد فرمایا۔ پھر دہلی میں تشریف لائے۔ چند روز وہاں اقامت کی۔ جب خلقت کا ہجوم بہت ہوا، اجمیر کی طرف متوجہ ہوئے۔ نقل ہے کہ جب آپ اپنے پِیر سے نعمت حاصل کر کے مکہ معظمہ میں پہنچے اور اس جگہ سے مدینہ منورہ کو تشریف لے گئے، ایک مدت تک وہاں مشغول رہے، ایک روز حضرت رسالت پناہ صلی اللہ علیہ و آلہ واصحابہ وسلم کے روضہ مقدسہ سے آواز آئی کہ اے معین الدین تو ہمارے دین کا معین ہے، ہندوستان کی ولایت تجھ کو حوالہ ہوئی۔ وہاں جاکر اجمیر میں اقامت کر، اس سر زمین میں کفر کا بہت غلبہ ہے۔ تیرے جانے سے اسلام قبول ہوگا۔ یہ سن کر حضرت خواجہ صاحب کو حیرت ہوئی کہ اجمیر کدھر ہے۔ اس فکر میں آپ کو کچھ غنودگی پیداہوئی اور حضرت رسول مقبول کو واقعہ میں دیکھا۔ حضرت سیدالثقلین نے ایک طرفۃ العین میں تمام عالم مشرق سے مغرب تک خواجہ صاحب کو دکھایا اور اجمیر کے قلعہ اور پہاڑوں کا نشان بتلایا اور ایک انار عطا کرکے فریا کہ جامیں نے تجھے خدا کو سونپا۔ القصہ آپ نے مدینہ منورہ سے ملک ہند کا عزم مصمم فرمایا اور آپ شہروں کی سیر کرتے ہوئے اور مشائخ اور درویشوں سے ملتے ہوئے آتے تھے اور چالیس آدمی معتقدین اور مریدوں سے ہمراہ تھے۔ اس وقت اجمیر کا حاکم پتھورانام کاتھا۔ اس کی ماں علم نجوم سے بہرہ ٔوافر رکھتی تھی۔ اس نے آپ کے وہاں پہنچنے سے بارہ برس پہلے پتھورا سے کہا تھا ایک مرد بزرگ پیدا ہوگا جس کے سبب تیری دولت اور سلطنت بربادہوگی۔ اس سبب سے وہ ہمیشہ اندوہ گیں رہتاتھا اور پتھورا کی والدہ نے آپ کا حلیہ لکھ کر اس کو دیا تھا، اس نے وہ حلیہ لکھوا کر جابجا بھیجا تھا اور حکم دیا تھا کہ جس کو اس حلیہ کے مطابق پاؤ اس کو گرفتار کر لاؤ۔

روایت ہے کہ جب آپ قصبہ سِمانہ میں تشریف لائے پتھورا کے آدمیوں نے آپ کو اس حلیہ کے مطابق پاکر از راہِ فریب ،تملّق و تواضع سے پیش آکر کہا کہ ہم نے آپ کے واسطے ایک مناسب جگہ معین کی ہے، آپ وہاں تشریف رکھیں۔ خواجہ صاحب نے مراقبہ کیا اور مکاشفہ کے عالم میں حضرت رسولِ کریم علیہ افضل الصلوٰۃ والتسلیم کو دیکھا کہ فرماتے ہیں کہ معین الدین اِس گروہ ناہنجار کے قول کا اعتبار نہ کر یہ تجھ کو مضرت پہنچانا چاہتے ہیں۔ آپ نے اس امر سے خبردار ہوکر ان سے انکار کیا اوراپنے ہمراہیوں کو اِس حال سے اطلاع بخشی پھر اجمیر کا قصد فرمایا۔ جب آپ اجمیر میں پہنچے چاہا کہ ایک درخت کے تلے قیام کریں، ایک شخص نے آواز دی کہ یہاں راجہ کے اونٹ باندھے جاتے ہیں اورکہیں ٹھہرو۔ آپ نے فرمایا کہ اچھا ہم اورجگہ جاتے ہیں بعدہٗ حضرت خواجہ صاحب اَنا ساگر کے کنارے پر پہاڑ کے متّصل فروکش ہوئے اورراجہ کے اوُنٹ جووہاں باندھے گئے ،ہر چند ساربانوں نے اُٹھایا اپنی جگہ سے نہ ہلے۔ پرتھوی راج یہ بات سُن کر بہت ملول ہوا۔ لکھا ہے کہ اس وقت کئی ہزار بتخانہ ساگر کے کنارے پر تھے اور اُن میں کئی مَن روغن اورپھولوں کا روزمرّہ صرف تھا۔ نقل ہے کہ جب اَناساگر کے کنارے قیام پذیر ہوئے، ایک خادم نے ایک شکار کے کباب تیار کئے۔ ہنود کا جگر آتشِ غیرت سے کباب ہوا اور آپ کے آدمی جب وُضو اورغسل کے واسطے اُدھر گئے، وہ لوگ مانع ہوئے ۔ خواجہ والا صفات نے جب یہ بات سنی ایک مرید سے کہا کہ اِس چھاگل میں تالاب سے پانی بھرلا۔ جب اُس نے بھرا تو تمام ساگر کا پانی خشک ہوگیا اوراُس شہر اور اُس کے حوالی میں جہاں کوئی چشمہ یا پانی تھا بے آب ہوا، بلکہ چوپایوں اوربچہ دارعورتوں کا دودھ بھی پستانوں میں سوکھ گیا۔ کہتے ہیں کہ ایک جن جس کو پتھورا اوراُس کا باپ اوراہل شہر پوجتے تھے اوراپنا اقبال و دولت اُس کی بدولت جانتے تھے اورچند پرگنہ اس کے خرچ کے واسطے وقف کئے تھے وہ جن ترساں اور لرزاں آپ کے پاؤں پر آگرا اورمسلمان ہوا ۔حضرت نے مناٰدی اس کا نام رکھا۔ الحاصل جب یہ خبر پتھورا کو پہنچی اُس کی والدہ نے کہا کہ یہ وہی شخص ہے جس کے آنے کی خبر میں نے تجھے دی تھی ۔خبر دار اس شخص سے کچھ جھگڑا نہ کرنا بلکہ اُس کو بہت خوش رکھنا۔ روایت ہے کہ رانی پتھورا نے اجے پال جوگی کے پاس جو بڑا جادوگر تھا، اپنا آدمی بھیجا۔ اُس نے یہ جواب دیا کہ اُس صاحب جاہ سے یوں عرض کرنا کہ آپ اطمینان رکھیں ،یہ سب جادو ہے، میں اس کا علاج بخوبی تمام کروں گا۔ یہ سُن کر پتھورا نے کہلا بھیجا کہ میں وہاں جاتاہوں تواپنا بندوبست کرکے جلد آ ۔راجہ اثنائے راہ میں حضرت خواجہ صاحب کی نسبت ایذارسانی کا ارادہ کرتاتھا ،اندھاہوجاتاتھا اورجب اِس قصدسے باز آتا بینائی پاتاتھا۔ اس طرح سات بار بینا اورنابینا ہوا۔ آخر ارادۂ فاسد دل سے باہر کیا اورخدمت میں حاضر ہوا ۔اجے پال بھی سات سو مارِ خونخوار جو جادو سے اُس کے مسخر تھے اورایک ہزار پانچ سو چکّر کہ ہَوا میں مُعلق ہوکر دشمنوں کے سرپر گرتے تھے اورسات سو شاگردوں کے ہمراہ آپہنچا اورطرح طرح کے جادو چلائے مگر کوئی کارگر نہ ہوا اورجب چکروّں کو ہَوا پر پہنچاکر آپ کی طرف پہنچتا تھا وہ برگشتہ ہوکر اُس کے شاگردوں پر گرکر ہاتھ پاؤں توڑتے تھے اور زخمی کرتے تھے اورجوسانپ جادو کے زور سے چلاتاتھا وہ سب زمین میں سماجاتے تھے اورلکھا ہے کہ اجے پال جب کسی سے جنگ کرتا،کوئی شخص اُس سے لشکر غنیم کے مغلوب کرنے کے واسطے مدد چاہتا وہ اُن چکّروں کو کوسوں تک رواں کرتاتھا ،وہ جاکر دُشمنوں کے سر اُڑا دیتے تھے۔ القصّہ جب اجے پال ہر طرح سے عاجز ہوا تو اُس نے فی الحال ہرن کی کھال ہَوا پر پھینکی وہ معلق ٹھہرگئی اورآپ دم کھینچ کر اورجست مار کر اُس پر جابیٹھا اوردم بدم آسمان کی طرف اڑاجاتاتھا اوراُس کے آدمی بہت خوش ہوتے تھے۔ حضرت سرور اولیا نے تھوڑی دیر کے بعد مراقبہ سے سراُٹھا کر فرمایا کہ اجے پال کہا ں تک پہنچاہے۔ آپ کے معتقدین سے ایک نے عرض کیا کہ ایک پرندہ کے برابر معلوم ہوتاہے ۔پھر آپ نے ایک لمحہ کے بعد استفسار کیا کہ اب کتنی بلندی پر ہے ،کہا کہ نظر سے غائب ہے ۔خواجہ خواجگان نے اپنے نعلین کو اشارہ کیا وہ فی الفور ہَوا کی طرف اڑا اور جوگی کے سر پر پہنچ کر زدوکوب شروع کردیا۔ اجے پال کے نالہ وفریاد کی آواز حاضرینِ جلسہ سنتے تھے۔ المختصر وہ نعلین اُس کو مارتے مارتے ہَوا سے زمین پر اُتار لائے۔ اجے پال حضرت کے پاؤں پر گِرا اورامان چاہی۔ آپ نے اشارہ سے منع فرمایا۔ ضربیں موقوف ہوئیں۔ جب پتھورا اور اجے پال نے یہ حال دیکھا تضّرع اورزاری کرنے لگے اورساگر کے پُر آب ہونے اوراونٹوں کے بارے میں التجا کی۔ خواجہ صاحب نے اجے پال سے فرمایا کہ چھاگل کو اٹھالا۔ اس نے ہر چند زور کیا اُٹھا نہ سکا۔ پھر آپ نے شادی جن سے ایما کیا وہ اُٹھا لا یا۔ آپ نے اس سے تھوڑا سا پانی ساگر کی طرف چھڑکا ۔اُس فیض مآب کے فیض سے سب حوض اور چشمے اور کنویں پُر آب ہوگئے اور اونٹ بھی اُٹھ کر چراگاہ کو گئے۔ اِن کرامتوں کے ظاہر ہونے اورمطلع ہوجانے سے مخالفین بہت حیران اورپشیمان ہوئے اورکہا کہ ہم نے تمام عمر اس جن کی پرستش اوراجے پال کی خدمت کی اوراِ ن کے واسطے خزانے صرف ہوئے مگر کچھ کام نہ آیا۔ الغرض اجے پال نے دست بستہ عرض کیا کہ حضرت کو سرِ مقامات میں کہاں تک رسائی ہے۔ آپ نے مراقبہ کیااور روح مظہر عالم ملکوت میں داخل ہوئی۔ اجےپال بہت مجاہدہ اورریاضت کئے ہوئے تھا۔ اُس کی روح کو قوتِ استدراج حاصل تھی ۔اُس کی روح آپ کی روحِ مبارک کے پیچھے پیچھے جارہی تھی یہاں تک کہ وہ پہلے آسمان پر گزری۔ حضرت خواجہ چشتی ؒ کی روح نے بالائے فلک عروج فرمایا اوراجے پال کی روح آسمان پر نہ جاسکی ۔تضّرع وزاری کی کہ مجھے بھی ہمراہ لے چلئے آپ کی روح مقدس اُس کی روح کو ساتھ لے کر عرش معلیٰ تک پہنچی اور آپ کی روح کی برکت سے اجے پال کی روح کے سامنے سے حجاب اُٹھ گیا تھا ۔فرشتے ہر مقام پر جو حضرتِ خواجہ صاحب کی تعظیم وتکریم کرتے تھے ،یہ سب دیکھتے تھے۔ جب روح مطہر منزل قرب پر پہنچی اجے پال کی روح آگے جانے نہ پائی۔ بہت گِڑگڑائی اورعرض کیا کہ مجھے تنہا نہ چھوڑئے کہ میں بھی حضرت حق جل وعلا کی قدرت کا تماشا کروں ۔حضرت حقیقت آگاہ کی روح نے فرمایا کہ توجب تک صدق دل سے خدائے مطلق اوررسول برحق پر ایمان نہ لائے گا، آگے داخل نہ ہوپائے گا۔ اجے پال کی روح نے خلوص دل کے ساتھ کہا لا الہ الا اللہ محمد الرسول اللہ اورایمان لایا ۔پھر التماس کیا کہ یاحضرت ایک یہ تمنّا اورہے کہ میں قیامت تک زندہ رہوں۔ آپ نے مناجات کی، آواز آئی کہ تیری دعا قبول ہوئی۔ پھر خواجہ صاحب نے اپنا ہاتھ اجے پال کے سر پر رکھ کر فرمایا کہ تو قیامت تک زندہ رہے گا۔ القصّہ دونوں روحوں نے دوزخ اوربہشت اورعرش وکرسی وغیرہ کی سیر کر کے عالم سفلی کی طرف رجوع کیا ۔جب آپ نے آنکھ مراقبہ سے کھولی اجے پال کلمہ طیبہ کہتا ہوا قدموں پر گرا۔ وہاں ایک خلقت کا ہجوم تھا ۔یہ حال دیکھ کر سب حیرت میں آئے اوررائے پتھورا اوراُس کے گروہ کے آدمی نادم وشرمندہ ہوکر گھر کو روانہ ہوئے۔ کہتے ہیں کہ اجے پال اب تک زندہ ہے اوراجمیر کے کوہستان میں اکثر مشغول عبادت رہتاہے اورحضرت خواجہ ؒ کے روضۂ مبارک کو آیا کرتاہے۔ منقول ہے کہ آپ نے رائے پتھورا کو اسلام کی ہدایت فرمائی۔ وہ کج رائے شقی ازلی ایمان نہ لایا اورآپ کی بددعا سے لشکر اسلام کے ہاتھوں گرفتار ہوکر داخلِ جہنم ہوا۔ اِس کا ذکر آگے آئے گا۔ انشا ء اللہ تعالیٰ۔

قصہ کوتاہ اجے پال اورشادی جن آپ کو بہت منت اور عاجزی کرکے شہر میں لائے ۔آپ نے شادی جن کا مقام بخوشی تمام اختیار فرمایا اوروہاں عبادت خانہ اورمطبخ بنایا اورجہاں باورچی خانہ تھا، اب وہاں آپ کا روضۂ منورہ ہے ۔حضرت قطب الدین بختیار کاکی سے مروی ہے کہ میں بیس سال تک حضرت خواجہ خواجگان قدس اللہ سرہٗ کی خدمت میں رہا، ہرگز نہ دیکھا کہ کسی کو اپنے پاس آنے دیا ہو اورجب مطبخ میں کچھ نہ رہتا تو خادم آکر عرض کرتا۔ آپ مصّلیٰ اٹھا کر فرماتے کہ اِتنا خرچ لے کہ آج اورکل کے واسطے کفایت کرے ۔خادم اُسی قدر لیتا۔ ہمیشہ درویشوں کو وظیفہ آپ کی طرف سے پہنچتا تھا اورجو کوئی مسافر یا مریض آتا دل کا مقصد پاتا ۔مصّلیٰ کے نیچے ہاتھ ڈال کر جو کچھ ملتا عطا فرماتے اورچارہ جوئی کرتے۔ حضرت قطب الاقطاب سے مذکور ہے کہ ایک شخص پتھورا کے یہاں سے مرید ہونے کے ارادے سے حاضر ہوا ۔آپ نے اس کو مرید نہ کیا۔ وہ واپس گیا اورپتھورا سے آپ کا شکوہ کیا ۔اُس نے ایک شخص آپ کے پاس بھیجا اورپیغام دیا کہ آپ نے اِس شخص کو کس واسطے مرید نہیں کیا۔ فرمایا کہ اس کی تین وجہیں ہیں ۔ اوّل یہ کہ وہ بڑا گنہگار ہے۔ دوسرے یہ کہ ہم اُس آدمی کو کلاہ نہیں دیتے جو دوسرے کے سامنے سرجھکادے ۔تیسری یہ کہ ہم نے لوح محفوظ میں لکھا دیکھا ہے کہ وہ اِس جہان سے بے ایمان جائے گا۔ راجہ نے جب یہ بات سنی غضبناک ہوکر کہا کہ یہ درویش غیب کی باتیں کہتا ہے۔ اِس سے کہہ دو کہ اس شہر سے باہر چلا جائے۔ حضرت ولی اللہ نے جب یہ پیغام سنا متبسم ہوکر فرمایا کہ اُس سے کہہ دینا کہ ہمارے اورتیرے درمیان تین دن کی مہلت ہے۔ یا ہم چلے جائیں گے یا تو ۔چنانچہ ایساہی ہوا کہ تین روز کے بعد سلطان معزالدین بن سام کا لشکر اسلام اجمیر میں آپہنچا اور فتحیاب ہوکر راجہ کو گرفتار کیااور وہ شخص جو مرید ہونے کے واسطے آیا تھا اسی تلکہ میں دریا میں ڈوب کر مرگیا ۔اورپتھورا پر آپ کے خشمگیں ہونے کا سبب اس طرح بھی لکھا ہوا دیکھا کہ پتھورا ایک مسلمان کو رنجیدہ کرتاتھا اوروہ آپ کے پاس شکایت لایا۔آپ نے اپنا آدمی بھیج کر اُس کو اِس فعل شینع سے منع فرمایا مگر وہ باز نہ آیا۔ جب آپ اِس بات سے واقف ہوئے، غصہ میں آکر کہا کہ ہم نے پتھورا کو زندہ گرفتار کرکے دیا۔ اُنہیں دنوں میں سلطان غوری لشکر جرّار کے ساتھ نواحیٔ اجمیر میں آپہنچا اور پتھورا لشکر اسلام سے مقابلہ کرکے زندہ گرفتار ہوا ۔تبھی سے ہندوستان میں دین اسلام نے قوت پائی اورکفر وضلالت کی جڑ اُکھاڑی گئی ۔ الحمد للہ علی ذالک

حضرت خواجہ غریب نواز رحمۃ اللہ علیہ کے بعض کلمات قدسی آیات

فرمایا کہ عاشق کا دل محبت کا آتشکدہ ہے جو کچھ اُس میں آئے جل جائے اورناچیز ہوکس واسطے کہ کوئی آگ آتشِ محبت سے زیادہ نہیں اورندّیاں جب جاری ہوتی ہیں ،اُن سے شور اورآواز پیدا ہوتی ہے اورجب دریا میں مل جاتی ہیں آواز نہیں ہوتی۔ اسی طرح جب طالب ذات حق سے واصل ہوتاہے خاموش رہتاہے اورجوش وخروش دنیوی زائل ہوجاتاہے اورفرمایا کہ میرے پیرومرشد نے فرمایا کہ خدائے تعالیٰ کے ایسے دوست ہیں کہ اگر دنیا میں تھوڑی دیر بھی محجوب ہوں نابود ہوجائیں اورجس شخص میں یہ تین خصلتیں ہوں گی اللہ تعالیٰ اُس کو دوست رکھے گا۔ اوّل سخاوت۔ سخاوت دریا کی مانندہے ۔دوسری شفقت ۔ شفقت آفتاب کی مثال ہے کہ تمام جہان میں اس کا نور اورفیض پہنچتاہے۔ تیسری تواضع، زمین کی تواضع کی طرح اورفرمایا کہ نیکوں کی صحبت ،کار نیک سے بہتر ہے۔ اورمرید توبہ میں اس وقت ثابت قدم ہوتاہے کہ بائیں طرف کا فرشتہ بیس برس تک اُس کا کوئی گناہ نہ لکھے اورصوفی فقر کا مستحق جب ہوتاہے کہ عالم فانی میں اُس سے کچھ باقی نہ رہے اورمُحب وہ ہے کہ مطیع ہو اوراِس بات سے ڈرے کہ دوست مجھ کو نکال نہ دے اورعارف کا ایک مرتبہ یہ ہے کہ جب وہ اُس مقام پر پہنچتا ہے تو تمام عالم اورجو کچھ اُس میں ہے اسے اپنی دو انگشت کے درمیان دیکھتاہے۔

اورعارف وہ ہے کہ جو کچھ وہ چاہے وہ سامنے آجائے اور جس چیز سے کلام کرے اس سے جواب پائے اورفرمایا کہ ہم برسوں اِس کام کے درپے رہے آخر کار ہیتہ کے سِوا کچھ نصیب نہ ہوا اورارشاد کیا کہ گناہ اتنا ضرر نہیں رکھتا جتنا برادرمسلمان کو خوار رکھنا اورجب تک محبت، حق کے صیقل سے دُنیا کے زنگار ،دل کے آئینہ سے دُور نہ کرے اوراللہ تعالیٰ کے ذکر سے موانست نہ پکڑے اورجب تک غیر کی ہستی درمیان سے نہ اُٹھے بندہ ہر گز واصل نہیں ہوسکتا اورخدائے عزّوجل کوپہنچاننے کی شناخت خلقت سے بھاگنا اورمعرفت کے حال میں خاموش رہنا ہے اورسالک جب تک معرفت کو یاد نہ کرے عارف نہیں اورعارف وہ شخص ہے کہ غیر خدا کو دل سے اُٹھادے کہ یگانہ ہوجاے جس طرح دوست یگانہ ہے اوراہل محبّت وہ ہیں کہ اُن کے اورحق ِتعالیٰ کے درمیان کوئی حجاب نہ ہو اورعارف وہ ہے کہ اندوہگین اوردرد مند ہو اورجس نے نعمت پائی سخاوت وکرم سے۔اور چار چیزیں گوہر نفس ہیں۔ اوّل درویشی کو تونگری دکھلائے۔ دوسری گر سنگی کہ سیری ظاہر کرے۔ تیسری اندوہگینی کہ خُرمی کا پیرا یہ رکھتی ہو۔ چوتھی وہ کہ دشمن کے ساتھ دوستی کرے۔ اورفرمایا کہ حضرت خواجہ عثمان علیہ الرحمۃ فرماتے تھے کہ مومن وہ ہے کہ تین چیزوں کو دوست رکھے۔ پہلی چیز فقر وفاقہ۔ دوسری چیزبیماری۔ تیسری چیز موت جو شخص ان تین چیزوں کو دوست رکھے گا اللہ تعالیٰ اوراُس کے فرشتے اُ س کو دوست رکھیں گے اوربہشت اُس کی جگہ ہوگی اوردرویش وہ ہے کہ جوکوئی اہل ایمان اُس کے پاس حاجت لائے اُس کو محروم نہ رکھے اورعارف وہ ہے کہ جہان سے دل برداشتہ رہے اورمتوکل وہ ہے کہ خلق سے رنج ومحنت کو منقطع کرے نہ کسی سے حکایت کرے نہ شکایت۔ اورعارف ترین خلق وہ ہے کہ متحیر ہو اورعارف وہ ہے کہ جب صبح کو اٹھے رات کی یاد نہ آوے اورارشاد کیا کہ موت کودوست رکھنا اورراحت کو چونڑنا اوریاد مولا کے ساتھ مانوس ہونا عارف کی علامت ہے اورفاضل ترین اوقات وہ ہے کہ وسواس کا دروازہ خاطر پر بندھا ہوا ہو اور علم بحر محیط ہے اورمعرفت اُس کی ایک ندّی ہے پس خدا ئے بزرگ کہاں اوربندہ کہاں ،اللہ تعالیٰ کو علم ہے اوربندے کو معرفت اوراہل معرفت آفتاب کی مانند ہیں کہ تمام عالم پر ٹکتی ہیں اورآدمی منز ل گاہِ قرب میں نہیں پہنچتا مگر اہتمام نماز سے اس لئےکہ نماز مومن کی معراج ہے اورارشاد کیا کہ میں ایک مدّت تک کعبہ کے گرد طواف کرتاتھا جب سے واصل حق ہوا ہوں کعبہ میرے گرد طواف کرتاہے اوربیان فریاکہ جسد حضرتِ آدم علیہ السلام سے لغزش واقع ہوئی تمام چیزوں نے حضرت آدمؑ پر زاری کی مگرزروسیم نے نہیں کی، روئے حق تعالیٰ نے فرمایا کہ تم کیوں نہیں روئے کہاکہ الٰہی جو تیرا عاصی ہو ہم اُس پر گریہ نہیں کرتے اللہ تعالیٰ نے فرمایا کہ اپنی عزت وجلال کی قسم کہ میں تمہاری قدرت وقیمت اورجو کچھ تمہاری قسم سے ہو فرزند آدم پر آشکارا کروں گا اوراُن کو تمہارا غلام بناؤں گا ۔ اورفرمایا کہ میں نے ریاض میں لکھا دیکھا ہے کہ ایک وقت حضرت رسولﷺ ایک جماعت پر گزرے وہ جماعت ہنستی تھی۔ آپ نے ان کو سلام کیا۔ سب تعظیم کو اٹھے اورسلام کا جواب دیا ۔پھر حضرت سرورِ کائنات علیہ الصّلٰوۃ نے فرمایا کہ کیا تم گور کی منزل سے گزرچکے ہو کہا نہیں، پھر فرمایا کہ عذاب ودوزخ سے رہا ہوگئے ہو کہا نہیں۔ ارشاد کیا پھر تم کیوں ہنستے ہو سبھوں نے توبہ کیاپھر اُن کو کسی نے خنداں نہ دیکھا اورحضرت خواجہ صاحب نے فرمایا کہ عارف اس کو کہتے ہیں کہ ہر روز اُس پر سو ہزار تجلی نازل ہو اورایک شمّہ اظہار نہ کرے اورصاحب معرفت وہ ہے کہ سب علم جانے اورہزارمعانی بیان کرے اورہروقت دریائے معرفت میں شناوری کرے کہ ایک موتی اسرارا لٰہی کے موتیوں سے باہر لادے اوراگر جو ہری مبصر کے سامنے بیان کرے معلوم ہو کہ وہ عارف ہے اوراہل محبت کی توبہ تین طرح پر ہے اول ندامت دوسری قطع معاملت تیسری ترک معصیت۔ اورخدائے عزو جل کے دوست تین صفت کے ساتھ قائم ہیں ۔ایک قوتِ صائم یعنی روزہ رکھنے کی قوت، دوسری نماز دائم، تیسری ذکر قائم ۔ اورطریق محبت میں عارف وہ ہے کہ کسی چیز پر اُس کو عجب وتکبر نہ ہو اس لئے کہ دعویٰ اورتسلیم جمع نہیں ہوسکتے اورفرمایا کہ ہم سانپ کی طرح کینچلی سے باہر آئے اورجب نگاہ کی توعشق اورعاشق کو ایک دیکھا اورارشاد کیا کہ جب درویش کو عبادت میں حلاوت پیدا ہو وہ حلاوت اُ س کے واسطے حجاب ہوگی اورعارف کا درجہ یہ ہے کہ عُجبِ طاعت سے اجتناب کرے اوربیان فرمایا کہ جب ہم بہت محنت کے بعد اُس بارگاہ میں پہنچے کچھ زحمت نہ تھی۔ تمام راحت پائی اورہم نے اہل دنیا کو دیکھا تو اُن کو دنیا کے ساتھ مشغول پایا اورجب اہل عقبیٰ کی طرف نظر کی تو ان کو عقبیٰ کی قید میں محجوب مطلق دیکھا اورمحبت میں صادق وہ ہے کہ جب اس پر کوئی بلا پہنچے تو خوشی اوررغبت سے اُ س کو قبول کرے اورفرمایا کہ میں نے آثار الاولیا میں لکھا دیکھا کہ ایک وقت رابعہ بصری اورمالک دنیار اورشیخ حسن بصری اورشیخ شفیق بلخی رحمۃ اللہ تعالیٰ علیہم ایک جگہ میں بیٹھے ہوئے تھے اورصدق باطن میں بات چلی تھی ۔ہر شخص ایک ایک بات کہتاتھا جب رابہر کی نوبت آئی تو کہا کہ محبت کی راہ میں سچا وہ ہے کہ جب اُس کو کوئی دردوالم پہنچے تو دوست کے مشاہدے میں اس کو فراموش کرے اوربیان کیا کہ ایک بار میں ایک بزرگ کے ساتھ ایک قبر کے پاس بیٹھا تھا اورصاحب گور کو عذاب ہورہاتھا۔ اُس بزرگ نے جب یہ حال مشاہدہ کیا تو نعرہ مارا اورجان بحق تسلیم ہوا ۔تھوڑی دیر گزری تھی کہ پگھلا اورپانی ہوکر پدید ہوا پھر فرمایا کہ اے عزیز واگر خفتگان زیر خاک کا حال کہ اسیر مورومار اورزندان گور کے گرفتاری ہیں جانو کہ اُ ن پر کیامعاملہ گزرتاہے ہیت سے نمک کی طرح پگھل جاؤ اورکسی نے آپ سے سوال کیا کہ بقاکیا ہے، جواب پایا کہ بقاعین حق ہے ۔پھر پوچھا کہ تجرید کیا چیز ہے فرمایا کہ غیر سے قطع کرنا اوردوست سے ملنا اورخواجہ قطب الدین بختیار کاکی قدس اللہ سرہٗ العزیز نے تذکرہ کیا کہ میں بیس سال تک حضرت خواجہ بزرگ علیہ الرحمۃ کی خدمت بابرکت میں رہا کسی پر اُن کو غصہ کرتے ہوئے نہیں دیکھا مگر ایک روز کہیں جاتے تھے، آپ کا ایک مرید تھا شیخ علی نام ، راہ میں اُس کو ایک شخص نے پکڑااورکہا کہ جب تک تو میرا روپیہ نہ دے گا میں تجھ کو نہ چھوڑوں گا ۔جب آپ وہاں پہنچے تواُ س کو منع کیااور اُ س نے نہ مانا۔ آپ نے غصہ میں آکر چادر جودوش مبارک پر تھی، زمین پر ڈال دی ۔فی الحال وہ زرو دینار سے بھر گئی۔ ارشاد کیا کہ جتنا تیرا آتا ہے اُتنا لے لے۔ اُ س نے چاہا کہ حق سے زیاہ لے اورہاتھ بڑھا یا ۔وہ ہاتھ فوراًخشک ہوگیا ۔چلاّ یا کہ میں نے توبہ کی ۔آپ نے دعافرمائی ۔اُس کا ہاتھ حالت اصلی پر آگیا ۔ نقل ہے کہ ایک دن ایک شخص ظاہراً ارادت کے واسطے اورباطناً آپ کے قتل کے ارادے پر سرِ مجلس آکر بیٹھا ۔ اُس کی بغل میں چھری تھی ۔آپ جب اُس کی طرف دیکھتے تھے تبّسم فرماتے تھے آخر فرمایا کہ اے درویش جو شخص درویشوں ے پاس آتاہے یا روئے خدا سے یا روئےخطا سے ،تیرا آنا کس وجہ سے ہے ۔جب اُس نے یہ بات سُنی اُٹھا اورہاتھ باندھ کر اپنے ارادہ فاسد کا اقرار کیا اورچھری بغل سے نکال کر ڈال دی اورخلوص نیت سے آپ کا مرید ہو ا۔کہتے ہیں کہ اُ س نے پنتالیس حج اداکئے۔ نقل ہے کہ ایک دن حضرت خواجہ چشتی رحمۃ اللہ علیہ حق سبحانہ تعالیٰ کی یاد میں مستغرق تھے اورعالم علوی اُن پر منکشف ہورہاتھا۔ اِ س اثنا میں ایک مرید نے آکر والیٔ ملک کا شکوہ کیا کہ وہ مجھ کو شہر سے نکالتا ہے ۔آپ نے پوچھا کہ وہ اِ س وقت کہاں ہے ،کہا سَوارہوکر میدان کی طرف گیا ہے فرمایا کہ جاوہ گھوڑے سے گرِ کر مرگیا۔ جب وہ شخص وہاں سے چلا سُنا کہ والیِ ٔ مذکور اُسی طرح راہی ملکِ عدم ہوا خواجہ قطب الدین بختیار ؒ نے فرمایا کہ میں بیس برس تک حضرت پیر کی صحبت میں رہا ہرگز نہ سنا کہ کبھی آپ نے اپنی صحتِ جسمانی چاہی ہو اکثر زبان الہام بیان پر آتاتھا کہ الٰہی جہاں کہیں درد ومحنت ہو معین الدین کے نامزد کر۔ میں نے عرض کیا کہ یاحضرت یہ کیا دعاہے، فرمایا کہ جب کسی مسلمان کو بلا ئےسخت اوربیماری میں مبتلا کرتے ہیں اُس کی صحتِ ایمان کی دلیل ہے وہ گناہوں سے ایسا پاک ہوتاہے جیسا طِفلِ مادرداز۔ ایضا ًنقل ہے کہ ایک دن آپ شیخ اوحدالدین کرمانی اورشٰخر الشیوخ شہاب الدین سہروردیؒ کے ساتھ بیٹھے ہوئے تھے ۔اِ س درمیان میں سلطان شمس الدین التمش عالم صغرسنِّی میں تیر وکمان لئے ہوئے اُدھر سے آ نکلا ۔آپ کی نظر مبارک اُس پر پڑی ،فرمایا کہ یہ لڑکا بادشاہ دہلی ہوگا، آخر ایساہی ہوا۔ منقول ہے کہ ایک روز آپ اپنے اصحاب کے ساتھ ایک جلسہ میں تھے اور سلوک میں بات تھی ۔جب داہنی طرف نگاہ کرتے تھے کھڑے ہوجاتے اورحاضرین اِس امر میں حیران تھے۔ جب وہاں سے واپس آئے مریدوں میں سے ایک نے عرض کیا کہ آپ کے باربار اُٹھنے کا کیا باعث تھا۔ فرمایا کہ اُس طرف میرے مرشد برحق رحمۃ اللہ علیہ کا مزار مبارک تھا۔ جب میں اُدھر نظر کرتاتھا اورمرقد منّورہ کو مشاہدہ کرتاتھا بے اختیار تعظیم کو اٹھتاتھا۔ نقل ہے کہ حضرت خواجہ بزرگوار ہررات کو خانٔہ کعبہ کے طواف کے لئے جاتے تھے اورحج کرنے والے ہمشہ آپ کو طواف میں دیکھتے تھے اورگھر کے آدمیوں کو یہ گمان نہ ہوتاتھا کہ آپ عبادت خانہ میں تشریف رکھتے ہیں آخر معلوم ہوا کہ آپ ہر شب مکہ شریف کو تشریف لے جاتے ہیں اورفجر کی نماز جماعت خانہ میں ادا فرماتے ہیں۔ روایت ہے کہ حضرت خواجہ صاحب ستّر سال تک نہیں سوئے ۔پہلوئے مبارک زمین سے نہ لگا اورآپ صائم الدہر اورقائم اللیل تھے اورحضرت کا وضو قضائے حاجت کے سوا اورسبب سے زائل نہیں ہوتاتھا اورآپ ہمیشہ آنکھیں بند کئے ہوئے مراقبہ میں مشغول رہتے تھے اورجب آنکھ کھولتے تھے جس پر نظر پڑجاتی واصل خدا ہوجاتاتھا اورجس فاسق کی طرف دیکھتے وہ گناہوں سے توبہ کرتاتھا۔ مروی ہے کہ حضرت خواجہ عثمان علیہ الرحمۃ والغفران نے فرمایا کہ جو کوئی معین الدین یا اُس کے مریدوں کا مرید ہوگا معین الدین ہر گز بہشت میں پاؤں نہ رکھے گا جب تک اُن کو اپنے ہمراہ نہ لے گا اور قیامت تک جو اُس کے سلسلہ میں داخل ہوگا اُس کو نجات کی امیدہے اورحضرت ولی الہند رحمۃ اللہ علیہ نے فرمایا کہ ایک دن میں خانۂ کعبہ میں مشغول تھا ۔غیب سے آواز آئی کہ اے معین الدین ہم تجھ سے خوش ہیں اورہم نے تجھے بخشا ۔میں یہ سن کر بہت خوش ہوا اورعرض کیا الٰہی اگرچہ بیچارہ معین الدین کو آتش دوزخ سے بے خوف کیا لیکن یہ عاجز ایک عرض رکھتاہے اگر قبول ہو، غیب سے صدا آئی کہ تو ہمارادوست ہے، مانگ جو کچھ چاہتاہے۔ میں نے کہا کہ یارب جو میرےمرید ہیں اورجو میرے مریدوں اورفرزندوں کے مرید ہیں اُن کو بھی بخش دے ۔الہام ہوا کہ ہم اُن سب کی خطا سے درگزرے ۔لکھا ہے کہ حضرت صاحبِ سماع تھے اور مدام شراب عشق الٰہی سے مست رہتے تھے ،جو کوئی اُن کے پاس بیٹھتا اہل سماع ہوجاتا۔ کہتے ہیں کہ حضرت کبھی ہندی راگ بھی سنتے تھے اورآپ حافظِ کلامِ مجید تھے اورہر روز دوختم کرتے تھے اورہر ختم پر صدائے غیبی سُنتے تھے کہ ہم نے قبول کیا۔ منقول ہے کہ جب حضرت خواجہ عثمان غفراللہ لہ وَلِوالِدیہ نے خواجہ صاحب قدس اللہ سرہٗ کو اپنی جگہ بٹھلایا، فرمایا کہ تونے درویشوں کا خرقہ پہنا ہے تجھ کو چاہئے کہ درویشوں کے کام کرے اور درویشی فاقہ کھینچناہے اوررنج و الم اہل دیکھنا،فقرے کے نزدیک غم وشادی برابر ہے اورراحت وجراحت یکساں ،درویش کو چاہئے کہ غریبوں اورفقیروں سے محبت کرے اورمسکینوں اوردرویشوں سے صحبت رکھے اوراہل دُنیا سے محترز رہے، جب ایسا کیا حضرت ذوالجلال کا مقرب ہوا پھر حضرت خواجہ صاحب کا ہاتھ پکڑکر کہا الٰہی معین الدین کو قبول فرما اوراپنے درگاہ کا مقرب کر، غیب سے آواز آئی کہ ہم نے اُس کا نام اپنے محبوبوں کے زمرے میں لکھا ہے اوراُ س کوسر قومِ مشائخ کیا۔ نقل ہے کہ جو کوئی تین دنِ تک آپ کی ملازمت میں رہتاتھا ولی اللہ اورصاحب کرامت ہوجاتاتھا۔ مرقوم ہے کہ بغداد میں سات ترسا صاحبِ ریاضت اوراہل مجاہدہ تھے اوروہ چھہ مہینے کے بعد ایک لقمہ طعام کھاتے تھے ۔ خلق اُن کی متعقد تھی۔ جو کوئی اُن کے پاس جاتا اُ س سے بات کرتے۔ ایک دن وہ ساتوں خدمت گرامی میں حاضر ہوئے جب نظر مبارک اُن پر پڑی ہیبت سے پائے مقّدس پر گرے ۔آپ نے ارشاد کیا کہ تعجب ہے کہ تم غیر خدا یعنی آگ کی پرستش کرتے ہو کہا کہ ہم اس واسطے آگ کی پوجا کرتے ہیں کہ قیامت میں ہم کو نہ جلائے اورحرمت نگاہ رکھے۔ آپ نے فرمایا کہ تم اگر اللہ تعالیٰ کی عبادت کرو تو وہ آتش دوزخ سے بھی نجات دے اورتمہاری آبرو بھی نگاہ رکھے ۔انہوں نے جواب دیا کہ تم خدا کو پوجتے ہو اگر آگ تم کو نہ جلائے تو ہم ایمان لائیں۔ فرمایا کہ آگ ہم کو تو کیا ہماری جوتیوں کو بھی نہیں جلا سکتی۔ انہوں نے کہا کہ اگر ہم اپنی آنکھ سے ایسا دیکھیں تو ضرور دین اسلام قبول کریں۔ آپ نے اپنی پاپوش کو آگ میں ڈال دیا اورفرمایا اے آتش معین الدین کی کفش کو ہر گز نہ جلانا۔ معاًوہ آگ سرد ہوگئی اورپاپوش کو ذرا بھی ضرر نہ پہنچا ۔پھر غیب سے آواز ہوئی کہ آگ کی کیا مجال جوہمارے دوست کی پاپوش کو جلائے۔ جب ترساؤں نے یہ حال دیکھا ڈرے اورفی الحال کلمہ طیّبہ پڑھا اورآپ کے مرید ہوکر اولیا میں شامل ہوئے۔روایت ہے کہ ایک دفعہ حضرت خواجہ رحمۃ اللہ علیہ مسافر تھے اورکہیں کفرستان میں پہنچے۔ کُفّار کو خبر ہوئی کہ چند مسلمان آئے ہیں سب تکواریں کھینچ کر آپ کی طرف دوڑے ۔جب اُن کی نظر آپ کے روئے مبارک پر پڑی یکبارگی فریاد کی ،ہم سب حضرت کے فرمانبردار ہیں، ہم پر شفقت و کرم کیجئے کہ ہم مسلمان ہوجائیں۔ آپ نے کلمہ شہادت اُن کو تلقین کیا پھر وہاں کے تمام اہل کُفر اسلام میں داخل ہوئے۔ کہتے ہیں کہ آپ کے عہد میں کفار بے شمار مسلمان ہوئے اورجب آپ اجمیر کو جاتے تھے لاہور سے دہلی پہنچے اورچند روز وہاں اقامت کی پھر اجمیر کا قصدفرمایا۔ مروی ہے کہ سلطان شمس الدین طاب ثراہ کے عہد میں آپ دو بار دہلی تشریف لائے تھے اورمولانا مسعود نے مولانا احمد آپ کے خادم سے روایت کی ہے کہ آپ جب پہلی مرتبہ اجمیر سے دہلی میں تشریف لائے پھر اجمیر میں رونق افروز ہوکر متاہل ہوئے اس کی تفصیل یوں ہے کہ سید وجیہ الدین محمد مشہدی خطۂ اجمیر میں داروغہ تھے ۔اِ ن کی ایک دختر صاحب عصمت اورباجمال تھی ۔مبارک بی بی عصمت نام ،وہ حدِّ بلوغ پر پہنچی تھی، سید صاحب موصوف چاہتے تھے کہ کسی بزرگ زادے سے اُس کا نکاح کردیں مگر اس کے لایق کوئی شخص نہیں ملتاتھا۔ اسی فکر میں رہتے تھے ایک رات حضرت امام جعفر صادق رضی اللہ عنہ کو خواب میں دیکھا کہ فرماتے ہیں کہ اے فرزند جگر پیوند حضرت نبوت پناہ صلی اللہ علیہ وسلم کا ایما اس طرح پر ہے کہ تواس دختر نیک اخترکو ہمارے نورِ نظر معین الدین حسن سنجری ؒ کے عقد نکاح میں لائے ۔سیّدوجیہ الدین صاحب نے یہ واقعہ خواجۂ دین پر ظاہر کیا۔ آپ نے فرمایا کہ اگرچہ میری عمر آخر ہوئی ہے مگر جبکہ حضرت سیّد انام علیہ واٰلہ والصّوٰۃ والسلام کا یہی اشارہ ہے میں انکار نہیں کرسکتا۔ روایت ہے کہ نکاح کے بعد حضرت سات سال تک زندہ رہے ۔عمر مبارک ستانوے سال کی تھی ،اورآپ کی رحلت دوشنبہ کے دن چھٹی ماہ رجب المرجب؁ ۶۳۳ چھ سو تینتیس ہجری میں واقع ہوئی۔ یہ مقدمہ سیرالعارفین سے لکھا گیا۔ ماہ رجب کی چھٹی تاریخ کو آپ کا عرس بڑی دھوم دھام سے ہوتاہے۔ ختے کثیر اطراف ممالک سے زیارت کو آتی ہے اورفیض پاتی ہے ۔ یہ فقیرہ حقیرہ بھی تاریخ مذکورہ پر اُس عالی مرتبت کا عرس کرتی ہے۔ اورایک نسخہ میں یوں لکھا ہے کہ آپ تاہل کے بعد سترہ سال تک رونق افروز عالم دنیا رہے اورسنِ شریف ایک سو سترہ برس تک پہنچاتھا ۔اورملفوظات میں آیا ہے کہ انتقال کے بعد آپ کی پیشانی نورانی پر لکھا ہوا ظاہر ہوا ھٰذَا حَبِیْبُ اللہِ مات فِیْ حُبِّ اللہِ شیخ عبدالحق دہلوی نے بھی اخبارلاخیار میں اسی طرح قلم بند فرمایا ہے ۔اورایک قول سے ماہ ذی الحجہ اورسِن مذکور میں آپ کی رحلت ہوئی ۔قول اوّل صحیح ہے۔ اوراجمیر میں آپ اپنی اقامت کی جگہ مدفون ہوئے ہیں ۔پہلے مرقد منّور خشتی تھا، ایک زمانہ کے بعد اُس پر پتھر کا صندوق بنایا گیا اورقبر شریف کو بدستو رچھوڑا، اِس سبب سے مرقدِ معلیٰ اونچا ہے۔ اوّل خواجہ حسین ناگوری نے عمارت کی بعدہٗ اوربادشاہ ہوں نے خانقاہ کا دروازہ بنوایا۔ منقول ہے کہ جب آپ اِس جہان فانی سے عازم عالمِ جاودانی ہوئے بزرگان دین سے ایک جماعت نے حضرت سرورِ عالم ﷺ کو عالمِ رویا میں دیکھا کہ فرماتے ہیں کہ خدا کا دوست معین الدین حسن سنجری آتاہے، ہم اُس کے استقبال کے واسطے کھڑے ہیں۔ اورکہتے ہیں کہ ایک بزرگ نے رحلت کے بعد آپ کو خواب میں دیکھا، دریافت کیا کہ نزع اورقبر کا حال اورفرشتوں کا سوال کیوں کر تھا، فرمایا کہ خدائے رحیم وکریم کے فضل سے سب آسان ہوامگر جب مجھ کو عرش کے نیچے لے گئے آواز آئی کہ تو اِتنا کس واسطے ڈرا، میں نے کہا کہ الٰہی تیری قہّاری اورجبّاری سے ۔ فرمان آیا کہ اے معین الدین ؒ جو شخص دسویں ماہ ذی الحجہ کو سورہ بقرہ پڑھے اُس کو خوف سے کیا کام ،میں نے تجھے بخشا اوراپنے واصلوں سے کیا۔ اوراجمیر کی وجہ تسمیہ یہ ہے کہ آجانام راجہ نے جو حدِّ غز نیں تک تصرف رکھتاتھا اجمیر کو آباد کیا اورمیرہند میں پہاڑ کو کہتے ہیں اوراوّل جو دیوار ہندوستان میں پہاڑ پر بنائی گئی وہ کوہ اجمیر ہے اورپہلے جو حوض ہندوستان میں کھوداگیا پُہکر ہے جو اجمیر سے چودہ کوس پر ہوگااورانیس الارواح میں حضرت خواجہ صاحب ؒنے اپنی بیعت کا حال اس طرح تحریر فرمایا ہے کہ بغداد شریف میں خواجہ جنید قدس اللہ سرہٗ کی مسجد میں یہ درویش خواجہ عثمان علیہ الرحمۃ کی قدم بوسی سے مشرف ہوا ،مشائخ کبار حاضر تھے، اس عاصی نے زمین پر سر رکھا اورکھڑا ہوا۔ خواجہ عثمان قدس اللہ سّرہٗ العزیز نے فرمایا کہ دو رکعت نماز پڑھ، میں نے پڑھی، کہا کہ قبلۂ رو ہوکر بیٹھ۔ میں بیٹھا پھر ارشاد کیا کہ سورہ بقرہ پڑھ، بندہ حکم بجالا یا۔ فرمایا کہ ساٹھ بار سبحان اللہ کہہ، میں نے کہا پھر آپ کھڑے ہوئے اورآسمان کی طرف منہ کر کے میرا ہاتھ پکڑا اورکہا کہ آتجھ کو خداسے واصل کروں اورکلاہ چار تُرکی دست مبارک سے میرے سر پر رکھا اوراپنا خاص کمبل مرحمت کیا ،پھر فرمان ہوا کہ بیٹھ، یہ احقر بیٹھ گیا پھر ارشاد کیا کہ ہزار بارسورہ اخلاص پڑھ ۔میں نے حسب فرمان عمل کیا۔ پھر فرمایا کہ ہمارے خانوادے میں یہی ایک شبانہ روز مجاہدہ ہے ،جا ایک رات دن ریاضت کر، میں نے ایسا ہی کیا جب صبح ہوئی خدمت سراپا برکت میں حاضر ہوا اورسرعجز زمین پر رکھا۔ فرمایا کہ بیٹھ، عاصی بیٹھا، ارشاد کیا کہ آسمان کی طرف دیکھ ۔میں نے دیکھا ،فرمایا تو کہاں تک دیکھتاہے۔فدوی نے عرض کیا کہ عرش عظیم تک پھر کہاکہ زمین کی طرف دیکھ ۔خاکسارنے دیکھا فرمایا کہ کہاں تک نظر آتاہے۔ اِس عاجز نے عرض کیا کہ تحت الثریٰ تک ،پھر ارشاد ہوا کہ ہزار بارسورۂ اخلاص پڑھ، جب میں پڑھ چکا فرمایا کہ آسمان کی طرف دیکھ ،میں نے تعمیل حکم کی، ارشاد کیا کہ کہاں تک منکشف ہوا ۔میں نے کہا کہ حجاب عظمت تک ،پھر حکم ہوا کہ آنکھیں بند کر، میں نے بند کیں، فرمایا کھول۔ میں نے کھول لیں، پھر دو انگلیاں مجھ کو دکھلائیں اورفرمایا کہ تو کیا دیکھتاہے، فقیر نے عرض کیا اٹھارہ ہزا عالم ،پھر کہا کہ تیرا کام پورا ہوا، پھر ایک اینٹ سامنے موجود تھی ،ارشاد کیا اُس کو اٹھا، جب میں نے اٹھایا ایک مٹھی دینار تھا۔ گوہر افشاں ہوئے کہ لے جا اورفقیروں کو صدقہ کر ،درویش نے اسی طرح کیا۔ پھر فرمان ہوا کہ چند روز ہماری صحبت میں رہ، میں نے کہا بسر وچشم حاضر ہوں، پھر حضرت مشیخت مآب علیہ الرحمۃ دمشق کی طرف مسافرہوئے اوریہ فرمانبردار خدمت میں ہمراہ تھا۔ الغرض ایک شہر میں پہنچے، ایک جماعت کو پایا کہ یہ لوگ ہستی سے بے خبر تھے۔ سننے میں آیا کہ یہ لوگ ہمیشہ دریائے تحیر میں غرق رہتے ہیں ،ہر گز ہوشیار نہیں ہوتے ،پھر وہاں سے حرمین شریفین کا قصد فرمایا جب مکہ معظمہ میں پہنچے کعبہ شریفہ کے پرنالے کے نیچے کہ قبولیتِ دعا کی جگہ ہے میرا ہاتھ پکڑکر میرے حق میں دعا کی۔ آواز آئی کہ ہم نے معین الدین کو قبول کیا۔ جب مدینہ منورہ میں پہنچے حضرت سرورکائنات ﷺ کے روضۂ مقدسہ کی زیارت کی اورمجھ سے فرمایا کہ سلام کر، میں نے سلام کیا۔ مرقد معلّیٰ سے آواز پیدا ہوئی کہ وعلیک السلام یا قطب المشائخ جاکہ توکمال کو پہنچا،پھر وہاں سے بخارا میں پہنچے، میں وہاں کے بزرگوں سے ہم صحبت رہتاتھا، الغرض احقر دس برس تک حضرت پیرومرشد کےساتھ سفر میں رہا ،پھر آپ وہاں سے بغداد کو تشریف لے گئے اورمعتکف ہوئے۔ چند روز کے بعد پھر مسافرہوئے ،دس سال اورسفر میں رہے ۔یہ درویش حضرت کا جامہ خواب اورچھاگل ساتھ لئے پھرتاتھا۔ جب بیس برس پورے ہوئے پھر بغداد میں آکر آپ نے اقامت کی اورمجھ سے فرمایا کہ اب میں باہر نہیں نکلوں گا، تجھ کو چاہئے کہ ہر روز چاشت کے وقت میرے پاس آیاکرے کہ علم فقر کی تعلیم اوردوسرے فوائد بیان کروں۔ میں ہر روز خدمت میں حاضر ہوتاتھا اورجو کچھ زبان فیض بیان سے سنتاتھا لکھ لیتا تھا، الحاصل اِس عاصی نے اٹھائیس روز تک حاضر ہوکر اٹھائیس مجلس لکھی اوراُس مجموعہ کو انیس الارواح کے ساتھ موسوم کیا۔