چراغ پر اشعار

عاشق نہ ہو تو حسن کا گھر بے چراغ ہے

لیلیٰ کو قیس شمع کو پروانہ چاہیے

مری آرزو کے چراغ پر کوئی تبصرہ بھی کرے تو کیا

کبھی جل اٹھا سر شام سے کبھی بجھ گیا سر شام سے

مرے داغ دل وہ چراغ ہیں نہیں نسبتیں جنہیں شام سے

انہیں تو ہی آ کے بجھائے گا یہ جلے ہیں تیرے ہی نام سے

نہیں آتی کسی کو موت دنیائے محبت میں

چراغ زندگی کی لو یہاں مدھم نہیں ہوتی

بیدمؔ تمہاری آنکھیں ہیں کیا عرش کا چراغ

روشن کیا ہے نقش کف پائے یار نے

وہ ظلمتیں ہیں رہ زیست میں قدم بہ قدم

چراغ دل بھی جلائیں تو کچھ سجھائی نہ دے

میں اندھیری گور ہوں اور تو تجلی طور کی

روشنی دے جا چراغ روئے جانانہ مجھے

جلا ہوں آتش فرقت سے میں اے شعلہ رو یاں تک

چراغ خانہ مجھ کو دیکھ کر ہر شام جلتا ہے

میں جلاتا رہا تیرے لیے لمحوں کے چراغ

تو گزرتا ہوا صدیوں کی سواری میں ملا

مرے آنسوؤں کے قطرے ہیں چراغ راہ منزل

انہیں روشنی ملی ہے تپش دل و جگر سے

بجھ رہے ہیں چراغ اشکوں کے

کیسے تابندہ رات کی جائے

لگتے ہیں یہ مہر‌‌ و ماہ و انجم

دہلی کے چراغ ہی کا پرتو

کشش چراغ کی یہ بات کر گئی روشن

پتنگے خود نہیں آتے بلائے جاتے ہیں

مرے ماہ منور تیرے آگے

چراغ دیر کیا شمع حرم کیا

وہ کیا حیات ہے جو ترک بندگی نہ ہوئی

چراغ جلتا رہا اور روشنی نہ ہوئی

مرے نشیمن میں شان قدرت کے سارے اسباب ہیں مہیا

ہوا صفائی پہ ہے مقرر چراغ بجلی جلا رہی ہے

مہر خوباں خانہ افروز دل افسردہ ہے

شعلہ آب زندگانیٔ چراغ مردہ ہے

ہوا گل مری زندگی کا چراغ

نمایاں جو شام مصیبت ہوئی

بڑے خلوص سے مانگی تھی روشنی کی دعا

بڑھا کچھ اور اندھیرا چراغ جلنے سے

گئے پہلو سے تم کیا گھر میں ہنگامہ تھا محشر کا

چراغ صبح گاہی میں جمال شمع انور میں

صبح نہیں بے وجہ جلائے لالے نے گلشن میں چراغ

دیکھ رخ گلنار صنم نکلا ہے وہ لالہ پھولوں کا

چاند سی پیشانی سندور کا ٹیکا نہیں

بام کعبہ پر چراغ اس نے جلا کر رکھ دیا

نہ لالہ زار بنانا مزار کو نہ سہی

چراغ کے آگے کبھی شام کو جلا دینا

فراق میں ہیں ہم انداز دل کا پائے ہوئے

یہ وہ چراغ ہے جلتا ہے بے جلائے ہوئے

نہیں لخت جگر یہ چشم میں پھرتے کہ مردم نے

چراغ اب کر کے روشن چھوڑے ہیں دو چار پانی میں

سانسوں کی اوٹ لے کے چلا ہوں چراغ دل

سینے میں جو نہیں وہ گھٹن راستے میں ہے

داغ سوزاں چھوڑ کر عاشق نے لی راہ عدم

پسرو تم کو چراغ رہ گزر درکار تھا

اندھیرے لاکھ چھا جائیں اجالا کم نہیں ہوتا

چراغ آرزو جل کر کبھی مدھم نہیں ہوتا

حاجت شمع کیا ہے تربت پر

ہم کہ دل سا چراغ رکھتے ہیں

جھونکے نسیم صبح کے آ آ کے ہجر میں

اک دن چراغ ہستیٔ عاشق بجھائیں گے

چراغ گور نہ شمع مزار رکھتے ہیں

بس ایک ہم یہ دل داغ دار رکھتے ہیں

ہزار رنگ زمانہ بدلے ہزار دور نشاط آئے

جو بجھ چکا ہے ہوائے غم سے چراغ پھر وہ جلا نہیں ہے

آگے قدم بڑھائیں جنہیں سوجھتا نہیں

روشن چراغ راہ کئے جا رہا ہوں میں

اپنا بنا کے اے صنم تم نے جو آنکھ پھیر لی

ایسا بجھا چراغ دل پھر یہ کبھی جلا نہیں

میں وہ گل ہوں نہ فرصت دی خزاں نے جس کو ہنسنے کی

چراغ قبر بھی جل کر نہ اپنا گل فشاں ہوگا