درفش کاویانی

ضحاک کے دورحکومت میں اصفہان میں ایک لوہار رہتا تھا جس کا نام کاوہ تھا- اس کے چاربچے ضحاک کے سانپوں کی نذر ہو گئے- ضحاک کے ظلم و جورسے عوام بھی پریشان تھی- بادشاہ کے ظلم و جورکو دیکھ کرکاوہ کے دل میں جوش پیدا ہوا- اس نے اپنی دکان بند کردی اور اپنی دھونکنی کو پھاڑ کر اس کا جھنڈا بنا لیا- ایرانی دیکھتے ہی دیکھتے اس کے جھنڈے کے ارد گرد جمع ہو گئے اورسب نے مل کر ضحاک کو سبق سکھانے کی ٹھان لی- کاوہ اس فوج کو لے کرآگے بڑھا- جمشید بادشاہ کے بیٹے فریدون نے بھی اس کا ساتھ دیا- انہوں نے ضحاک کی فوج کے دانت کھٹے کر دیے- کاوہ کی جیت کا ڈنکا پورے ایران میں بج گیا اور اس نے فریدون کو ایران کے تخت پر بٹھا دیا-

اس روز سے یہ جھنڈا مبارک مانا جانے لگا- فریدون نے اس کو قومی پرچم بنانے کا اعلان کیا- اس پرچم کی فریدون کے بعد کے بادشاہوں نے بھی بہت تعظیم کی- یزدگرد ثالث کے دورحکومت میں یہ جھنڈا ہرجنگ میں فوج کے آگے آگے ہوتا تھا- حضرت عمر کے دورمیں یہ پرچم مسلمانوں کے ہاتھ آیا- اس پرجڑے جواہرات کو بانٹ دیا گیا اورچمڑا جلا دیا گیا-