ردیف کاٹنا اور چوٹ کرنا

ردیف کاٹنا : قوالی کے جدید مقابلوں میں ’’ردیف کی تکرار‘‘ کی بہ نسبت ’’ردیف کاٹنے‘‘ کے مقابلے زیادہ مقبول ہوئے، ان میں دونوں قوال رات بھر کسی ایک ہی ردیف کو دہرانے کے بجائے اس کلام کی ردیف دہراتے ہیں جس ردیف پر سامنے والے نے گانا ختم کیا، اس طریقے کو ’’ردیف کاٹنا‘‘ کہا گیا، سامنے والے کی ردیف کاٹ کر قوال پھر کوئی نئی چیز چھیڑ دیتا ہے، اب دوسرا قوال اس نئی چیز کی ردیف کاٹتا ہے یعنی اس نئی چیز کی ردیف، قافیہ، بحر اور طرز پر نئے مضامین کے ساتھ کلام پڑھتا ہے، اس میں ایک اچھائی یہ ہے کہ سامعین رات بھر کسی ایک ہی ردیف کی اکتا دینے والی تکرار سے دو چار ہونے کے بجائے ہر ٹرن میں ایک نئی اور دلچسپ ردیف سے لطف اندوز ہوتے ہیں جو قوال ردیف کاٹنے میں ناکام ہو جائے اس کی شکست تسلیم کر لی جاتی ہے، اس دور میں قوالی لکھنے والے شعرا نے ایسی ایسی مشکل زمینوں اور بحروں میں اشعار نکالے ہیں کہ سابقہ اردو شاعری میں اس کی مثال بہت کم ملتی ہے، ان مقابلوں میں قوال حضرات اول تو اپنے حافظے کا کمال دکھاتے ہیں لیکن یہ بھی حقیقت ہے کہ ان قوالوں کے ساتھ کئی کئی شاعر لگے ہوتے ہیں جو مقابلوں کے موقعوں پر فی البدیہ کہہ کر دیتے ہیں اور قوالوں کا کمال یہ کہ سازکی آڑ میں پرچہ رکھ کر اس صفائی سے کلام پڑھتے ہیں کہ نہ پرچہ بازی کا شبہ ہوتا ہے اور نہ اُن کی روانی میں فرق آتا ہے جن قوالوں میں پرچہ بازی کی یہ صفائی نہیں ہوتی وہ مصرعہ پڑھتے ہوئے اتنی بار اٹکتے ہیں کہ اچھا خاصہ مذاق بن جاتے ہیں۔

چوٹ کرنا : ردیف کی تکرار اور ردیف کاٹنے کے مقابلوں میں کلام کا معیار برقرار رکھنا مشکل ہوتا ہے، اس لیے کچھ قوال حضرات نے مقابلوں میں ’’چوٹ “ کا طریقہ اپنایا، اس میں ردیف کی تکرار یا ردیف کاٹنے کے بجائے چند قطعات یا کچھ اشعار تحت اللفظ پڑھ دیے جاتے ہیں، جن کے مضامین میں سامنے والے پر کوئی چوٹ ہوتی ہے، ان قطعات کے پڑھنے کے بعد قوال حضرات اپنے اپنے مخصوص اور مقبول آئیٹم پیش کرتے ہیں، چوٹ کا یہ سلسلہ عوام میں بے حد مقبول ہوا کیوں کہ اس سے سامعین کچھ دیر چھیڑ چھاڑ کا مزا بھی لے لیتے ہیں اور دیگر کلام سے بھی لطف اندوز ہو پاتے ہیں۔