نصرت فتح علی خان

’’سہرا یہ حقیقت کا نصرتؔ کو سنانے دو‘‘

نصرت فتح علی خاں پاکستان کے بڑے قوال، موسیقار، موسیقی ڈائریکٹر اور بنیادی طور پر قوالی کے گلوکار تھے، نصرت کو اردو زبان میں صوفی گلوکار اور جنوبی ایشیا کے سب سے بڑے قوالی کے گلوکار کے طور پر جانا جاتا ہے، انہوں نے پاپ و کلاسیکی موسیقی کو ’’یک جاں‘‘ کرکے موسیقی کو نئی بلندی بخشی، انہیں شہنشاہ قوالی بھی کہا جاتا ہ، انہوں نے اپنی پہلی پرفارمنس ریڈیو پاکستان کے سالانہ موسیقی کے پروگرام ’’جشنِ بہاراں‘‘ کے ذریعے دی، ان کی پہلی کامیاب قوالی ’’حق علی علی‘‘ تھی جو دنیا بھر میں ان کی پہچان کا ذریعہ بنی، نصرت زیادہ تر اردو، پنجابی جبکہ کبھی کبھی فارسی، بِرج بھاشہ اور ہندی زبان میں بھی گاتے تھے، انہوں نے اپنی زندگی میں کئی البم ریلیز کیے، جس میں قوالی کے 125 آڈیو البم شامل ہیں، جس کی وجہ سے ان کا نام ’’گنیز بک آف ورلڈ ریکارڈ‘‘ میں بھی درج کیا گیا، نصرت نے اپنی تمام عمر قوالی کے فن کو سیکھنے اور اسے مشرق و مغرب میں مشہور کرنے میں لگا دی، انہوں نے صوفیوں کے پیغام کو دنیا کے کونے کونے تک پہنچایا اور ان کے فیض سے خود انہیں بے پناہ شہرت نصیب ہوئی۔

نصرت کے باپ دادا اٹھارویں صدی کے آخر میں اپنے مرشد حضرت شیخ کے ساتھ افغانستان سے ہندوستان آئے تھے، وہ افغان کے شاخ نورزئی سے تعلق رکھتے تھے، جالندھر کے قریب ایک بستی میں پیر نے قدم روک لیے، مریدوں نے وہیں ڈیرہ ڈال دیا، بعد میں یہ جگہ ’’بستی شیخ‘‘ کے نام سے مشہور ہوئی، ہجرت کرنا بزرگوں کا پسندیدہ عمل ہے، دنیا میں زیادہ تر وہی افراد کامیاب ہوئے ہیں جنہوں ہجرت کیا ہو، بڑے بڑے صوفی ایک شہر سے دوسرے شہر ایک ملک سے دوسرے ملک میں رہتے ہیں، ہندوستان کا کوئی علاقہ ایسا نہیں جہاں کسی صوفی کے قدم نہ پڑے ہوں، حضرت داتا گنج بخش، خواجہ معین الدین چشتی، حضرت شمس تبریزی سبزواری، قطب الدین بختیار کاکی، بابا فریدالدین گنجِ شکر، حضرت نظام الدین اؤلیا، حضرت سیدنا امیر ابوالعلا، حضرت میاں میر ایسے روشن ستارے ہیں جن کی چمک سے مردہ دل بھی روشن ہو جائے۔

حضرت شیخ بھی افغانستان سے اسی نیک کام کے لیے جالندھر آئے تھے، نصرت کے پوروَج ان کے لیے محفلِ سماع برپا کرتے تھے، صوفیانہ کلام کا خزانہ لٹاتے تھے، ہندوستانی کلچر میں موسیقی کو بہت اہمیت حاصل تھی، سننے والا اس کے جادو میں محو ہو جاتا تھا، فقیروں نے شاید اسی لیے قوالی کا انتخاب کیا تھا، مصلحت یہ تھی کہ موسیقی سن کر لوگ جمع ہوں گے اور سُروں میں چھپی ہوئے پیغام انہیں اپنی سچائی میں جکڑ لے گا۔

حضرت شیخ نے اپنا پیغام اور صوفیانہ کلام نصرت کے بزرگوں کی زبانی لوگوں کے سامنے پیش کیا، جالندھر کے آس پاس میں حضرت شیخ کے ساتھ ساتھ ان کے مریدوں کا نام بھی گونجنے لگا، حضرت شیخ درویش کی وفات کے بعد نصرت کے پرکھوں نے مزار کی دیکھ بھال اپنے ذمہ لی اور قوالی کی روایت دن بدن اپنے عروج کی طرف بڑھتی رہی، عارفانہ کلام، حمد، نعت، منقبت کے ذریعے قوالی مقبول ہوتی رہی اور یہ خاندان اپنے مخصوص انداز گائیکی سے نام پیدا کرتا رہا، اس گھرانے نے مختلف وقتوں میں مختلف نامور استاد گائیک پیدا کیے جو کسی نہ کسی شخص کے ذہن میں اب بھی محفوظ ہیں۔

نصرت کے دادا حاجی معروف افغانستان سے ہجرت کر کے ہندوستان آئے تھے، چار پشتوں تک ان کی ترتیب کچھ یوں ہے۔

1- حاجی معروف

2- محمد شریف

3 - امانت خان

4 - سعادت داد

سعادت داد کے دو بیٹے تھے۔

1 - صاحب داد

2 - خالق داد

خالق داد کا نسب اس طرح چلا۔

1 - خالق داد

2 - جہانگیر خان

3 – میراں بخش

4 - مولیٰ بخش

مولیٰ بخش کے چار بیٹے تھے۔

فتح علی خان

مبارک علی خان

نوازش علی خان

سلامت علی خان

مولیٰ بخش کے چاروں بیٹے اپنے اپنے فن میں منفرد تھے، ان کے پاس آواز کی صلاحیتوں کی ایک غیر معمولی حد تھی اور وہ کئی گھنٹوں تک اعلیٰ درجے کی شدت میں قوالی پیش کر سکتے تھے، 1947ء کے بعد یہ لوگ پاکستان آ گئے، نصرت کے باپ داداؤں نے وہاں موسیقی اور گانا سیکھا اور اسے بطور پیشہ اپنایا، نصرت اپنے پیتا فتح علی خاں کے پانچ بچوں میں بڑے بیٹے تھے۔

قوالی کو اگر گلدستہ کہا جائے تو یہ اپنے اپنے رنگ کے پیارے پیارے پھول تھے جن کی اپنی خوشبو اور اپنا رنگ تھا، فتح علی خان اور مبارک علی خان کے بعد سلامت علی خان کا نام ہارمونیم پلیئر کی حیثیت سے بڑا مشہور تھا، کہتے ہیں کہ برصغیر میں ان جیسا ہارمونیم بجانے والا شاید ہی کوئی دوسرا ہو، سلامت علی خان نے بڑے غلام علی خان، توکل حسین، چھوٹے غلام علی خان اور نزاکت علی خان کے ساتھ سنگت کی اور ان استادوں سے داد وصول کی لیکن اس فن میں کمال حاصل کرنے کی بھی ایک دلچسپ کہانی ہے۔

گزرے ہوئے زمانے کی بات ہے کہ برصغیر میں ایک مشہور گانے والی الٰہی جان ہوا کرتی تھی، بہت گن گیان والی عورت تھی، گاتی تھی تو پرندے ہوا میں رک جاتے تھے، علمِ موسیقی سے پوری طرح واقف، بڑے سے بڑا سارنگی بجانے والا اس کے ساتھ سنگت سے خوف کھاتا تھا جو کچھ وہ گلے سے ادا کرتی تھی، سارنگی والے کے لیے تاروں سے نکالنا مشکل ہو جاتا تھا، ایک بار وہ بستی شیخ آکر فتح علی خان کی مہمان ہوئی، گانے کی محفل ہوئی، ہارمونیم پر سنگت کرنے کے لیے سلامت علی خان آگے آئے تو الٰہی جان نےکہا کہ

یہ کون صاحب ہیں ؟

فتح علی خاں نے کہا کہ

’’مولیٰ بخش کا بیٹا اور ہمارا بھائی سلامت علی خان ہے‘‘

یہ بات سن کر جب الٰہی جان نے گانا شروع کیا تو سلامت علی خان اس کی گائیکی کو ہارمونیم کی گرفت میں نہ لا سکے، ہارمونیم بجانا بند کر دیا اور الٰہی جان قہقہہ لگا کر کہنے لگی۔

’’فتح علی خان! یہ مولیٰ بخش کا بیٹا نہیں لگتا‘‘

الٰہی جان کی یہ بات سن کر سب خاموش ہو گئے، سلامت علی خان بہت شرمندہ ہوئے مگر مبارک علی خان نے الٰہی جان سے کہا کہ

’’یہ مولیٰ بخش ہی کا بیٹا ہے، الٰہی جان ! چھ ماہ بعد آؤ گی تو اس کے ساتھ گا نہ سکو گی‘‘

الہٰی جان نے کہا کہ

’’کیوں؟ اسے کون سا تعویذ گھول کر پلاؤ گے‘‘

الٰہی جان نے پان کی گلوری منہ میں رکھ کر کہا کہ ’’محنت اور ریاضت کا تعویذ‘‘

مبارک علی خان نے کہا کہ پھر واقعی ایسا ہی ہوا، سلامت علی خان نے ہارمونیم پر ریاض کی انتہا کر دی، اپنی انگلیوں کو ہارمونیم کی تینوں سبکتوں سے جوڑ دیا، دن رات ایک کر دئیے، انگلیاں ریاض کرتے کرتے تھک جاتیں تو برف کے یخ پانی میں ڈبو دیتا مگر اس نے چھ ماہ انگلیوں کو آرام نہیں کرنے دیا، چھ ماہ بعد جب الٰہی جان آئی تو سلامت علی خان فنی طور پر پختہ ہو چکے تھے، ایک بار پھر محفل جمی، الہٰی جان نے تان اٹھائی، سلامت علی خان نے ہارمونیم چھیڑا، الٰہی جان چند قدم چلی پھر رک گئی، سلامت علی خان کی انگلیوں کو ہارمونیم پر بجلی کی طرح چلتے دیکھ کر حیران رہ گئی اور ہاتھ جوڑ کر کہنے لگی کہ

’’میں بھول گئی تھی سلامت علی خان، تم واقعی مولیٰ بخش کے بیٹے ہو‘‘

اور پھر سلامت علی خان کے ہاتھ چوم لیے۔

نوازش علی خان مولیٰ بخش کا چھوٹے بیٹے تھے، اپنے بھائیوں سے بالکل مختلف، شاعرانہ مزاج رکھتے، کبھی قوالی کے شوق کو نہ اپنایا، بھائیوں نے بھی اسے اس طرف راغب نہیں کیا، بی۔ اے تک تعلیم دلائی، محبوب بنا کر رکھا، ہر خواہش پوری کی، نوازش اچھے شاعر تھے، اپنے بھائی فتح علی خان سے بے حد پیار کرتے تھے، فتح علی بھی ان پر جان نچھاور کرتے ایک بار نوازش کو فتح علی نے نوے ہزار روپیہ دیا کہ کوئی کاروبار کرلو، نوزاش علی نے روپے لیے اور نواز والی چارپائی کے خلا میں روپے رکھ دئیے اور بھول گئے، چھ ماہ بعد نوکر چار پائی کسنے لگے تو نوے ہزار روپے فرش پر آ گرے، نوازش کو نہ روپے پیسے کی خواہش تھی، اسے صرف شاعری کا شوق تھا اور وہ کلاسیکل طرز اسلوب میں اچھے شعر کہتے تھے کہ فتح علی خان کی وفات پر اس کے کہے ہوئے یہ چند شعر اس کی شاعرانہ صلاحیت اور جذبات کی بھر پور عکاسی کرتے ہیں، احمد عقیل روبی کے حوالے سے اسے ان اشعار کو نقل کر دیتا ہوں۔

ناز فن فتح علی خان مکانی ہے تو

بے نیاز خلش عالمِ فانی ہے تو

یہ دعا ہے کہ رہے تجھ پہ خدا کی رحمت

تا ابد تجھ کو میسر ہو نشاط جنت

حشر کے دن ہو رسولِ عربی کا دیدار

روح تیری ہو مئے جلوہ حق سے سرشار

تو نوازشؔ کو اگر حشر کے میداں میں ملے

قلب کے ساز چھڑیں غنچہ خاطر بھی کھلے

مولیٰ بخش کے ان چاروں بیٹوں میں سے فتح علی خان اور مبارک علی خان کی جوڑی بے حد کامیاب رہی اور اس جوڑی میں سے فتح علی خان زیادہ نامور، مقبول اور باوقار شخصیت کے گائیک تسلیم کئے گئے، وہ کئی خوبیوں کے مالک تھے، فتح علی خان نے قوالی میں ایک انقلابی تبدیلی پیدا کی جس کا باقاعدہ ایک پسِ منظر ہے۔

فتح علی خان نے اپنے والد مولیٰ بخش سے کلاسیکی موسیقی کا درس حاصل کیا لیکن ان کی آواز مبارک علی کے مقابلے میں بہت بھاری تھی، ان کے گلے میں قدرتی رمزے اور مرکی نام کی کوئی شئے نہ تھی، یہ کمزوری اور خامی ہی انقلاب کا سبب بن گئی، فتح علی خان نے اپنی گائیکی کے لیے دھرپد رنگ اپنایا، سرگم کے پلٹوں اور نفس مضمون کو بار بار دہرانے سے گائیکی کو سنوارا، راگ اور لے کا خوبصورت امتزاج پیدا کیا، قوالی میں تضمین کا اجرا کر کے قوالی میں ایک نئے انداز کو جنم دیا، چنانچہ یہی انوکھا اور اچھوتا رنگ فتح علی خان کی وجہ شہرت بن گیا، قوالی کے رسیا ان کی منفرد گائیکی کے ایسے قائل ہوئے کہ برصغیر میں چاروں طرف دونوں بھائیوں کا نام گونجنے لگا، ہندوستان کے کونے کونے میں انہوں نے اپنی قوالی پیش کی اور ہر فن کے شائقین سے داد وصول کی، روایتی قوالی میں فتح علی خان کی یہ Inovation ایک انداز اختیار کر گئی اور خواجہ حسن نظامی نے 1935ء میں اپنے سات روزہ روز نامچہ میں فتح علی کے تعلق سے لکھتے ہیں کہ

’’فتح علی خان ہندوستان میں فن قوالی کے مدبر ہیں، ان کی اس اچھوتی صنف نے اس قدر مقبولیت عام و خاص پائی ہے کہ آج فلمی موسیقاروں سے لے کر کلاسیکل گانے والوں تک کے لیے فتح علی خان کانام ایک سند کی حیثیت رکھتا ہے‘‘(روز نامچہ)

فتح علی خان کو حمد، نعت، گیت، غزل، ٹھمری، دادرا، ترانہ خیال، ہلکی پھلکی موسیقی اور کلاسیکل گانے میں پوری مہارت حاصل تھی اور وہ ہر قسم کے سننے والے کے دل پر اپنی استادی کا سکّہ جما لیتے تھے، اسی فن نے انہیں مقبول اور محبوب فنکار بنا دیا تھا، راغب مرادآبادی کہتے ہیں کہ

اک سحر تھا یا نغمہ سرائی تیری

آواز سوئے گوش جب آئی تیری

دل جھوم اٹھا روح کو بھی وجد آیا

اللہ اللہ۔۔۔ خوش ادائی تیری

شاہد احمد دہلوی اپنے ایک مضمون میں ان کی مخصوص گائیکی کو بے حد سراہا ہے اور قوالی کی آبرو بڑھانے میں ان کے انقلابی قدم کو داددی ہے، لکھتے ہیں کہ

’’فتح علی نے نہ صرف قوالی کا ایک مخصوص ڈھنگ اختیار کیا ہے بلکہ قوالی کو چار چاند لگا کر فن کی آبرو بڑھائی ہے، ورنہ قوالی صرف درگاہوں اور خانقاہوں تک محدود ہوگئی تھی اور قوال اپنی روزی کے لیے در بدر بھٹکتے تھے، ان دو بھائیوں کی دیکھا دیکھی بہت سی ٹولیاں ان کی نقل کرنے لگیں اور ان کے نقش قدم پر چل کر منزل مقصود کو پہنچیں‘‘(آہنگ، جون 1946ء)

کہتے ہیں کہ فتح علی اور مبارک علی کا سب سے بڑا کارنامہ یہ تھا کہ انہوں نے علامہ اقبال کے کلام کو ہندوستان کی گلی گلی میں پہنچا دیا تھا، اقبال جو کالجوں اور اسکولوں تک محدود تھے، فتح علی اور مبارک علی نے اسے گلی گلی مقبول کر دیا، یہ فتح علی خان کی گائیکی ہی تھی جس نے غیروں کو بھی کلامِ اقبال کا شیدا بنا دیا تھا، کلام اقبال گانے کا ان کا مخصوص انداز تھا، وہ اقبال کی ایک غزل یا نظم شروع کرتے اور پھر اس میں مزید کلام شامل کر کے دورانیہ بڑھاتے رہتے تھے، شکوہ اور جوابِ شکوہ سنانے میں ان کا ثانی کوئی نہیں تھا، دونوں بھائی جب اس طویل نظم کو قوالی کے انداز میں گاتے تو ایک سماں بندھ جاتا تھا، لوگوں کا یہ کہنا تھا کہ کلامِ اقبال ہم پڑھتے تو ہیں لیکن سمجھ اس وقت آتا ہے جب فتح علی خان گا کر سناتے ہیں، چنانچہ اقبال کے حوالے سے فتح علی اور مبارک علی نے لوگوں کے دلوں میں اس کی حقیقی تڑپ پیدا کر دی۔

فتح علی خاں 1947 کے وقت میں مسلم لیگ کے حمایتی تھے اور اپنی قوالی میں مسلم لیگ کا پرچار بھی کرتے تھے جس کا نتیجہ یہ ہوا کہ بعض جماعت آپ کی دشمن ہوگئی، انہیں جان سے مارنے کی دھمکیاں دی گئیں، 1947ء کا قتل عام شروع ہوا تو انہوں نے کچھ بدمعاشوں کو فتح علی خان کے قتل پر مقرر کیا اور یہ کوشش کی کہ وہ کسی طور پر بھی پاکستان نہ جا سکیں، رائے خورشید تلونڈی ایک کھاتے پیتے زمیندار تھے، انہوں نے فوجی دستوں کی حفاظت میں اپنی عورتوں کو پاکستان بھیجنے کا انتظام کیا، تمام عورتوں کو برقعے پہنا کر باڈر کراس کرایا گیا، ان میں فتح علی کو بھی برقعہ پہنا کر پاکستان بھیجا گیا۔

نصرت کی پیدائش 1948ء میں فیصل آباد میں ہوئی، پیدائش کے وقت وہ صحت مند اور گول مٹول تھے، ان کے پیتا نے ان کا نام پرویز رکھ دیا، پیتا کی خواہش تھی کہ وہ اپنے بیٹے کو ڈاکٹر بنائیں، نصرت نِکر پہن کر، گلے میں بستہ ڈال کر بڑے اعتماد سے اسکول جاتے تھے، اسکول سے فارغ ہو کر گھر آتے تو ماسٹر عبدالعزیز انہیں پڑھاتے، ایک بزرگ حضرت غلام غوث صمدانی سے فتح علی خاں کے گہرے تعلقات تھے، ایک بار وہ تشریف لائے، سب کھانے سے فارغ ہوکر بیٹھے تھے کہ نصرت اندر سے باہر آئے، فتح علی نے اسے آواز دے کر بلایا کہ

’’پرویز ادھر آؤ!‘‘

پرویز کا نام سن کر آپ چونکے اور فتح علی کا شانہ ہلا کر پوچھا کہ ’’کیا نام رکھا ہے تم نے؟‘‘

تم کو معلوم ہونا چاہیے کہ پرویز ایران کا بادشاہ تھا جس نے حضرت محمد پاک کے خط کو پھاڑ دیا تھا، یہ بات سن کر سب چپ ہوگئے، آپ نے کہا کہ کیا اب بھی یہ نام رکھنا چاہتے ہو، نام کا اثر انسان کی شخصیت پر پڑتی، اسی وقت پرویز سے بدل کر نصرت رکھا گیا، اس نام کا اثر تو دنیا نے دیکھ ہی لیا، نصرت کا گھریلو نام پیجی تھا۔

نصرت کا بچپنہ کوئی خاص نہیں تھا، بس ایک گول مٹول بچہ، بستہ گلے میں ڈال کر لوگوں کو نرسری اسکول آتا جاتا نظر آتا تھا،

فتح علی خان نے گھر کو پوری آرائشوں اور سہولتوں سے آراستہ کیا تھا، ہر قسم کی نعمت اپنے بچوں کو دی، نصرت کی چار بہنیں اور ایک بھائی فرخ آرام سے رہ رہے تھے، فتح علی خان نے نصرت کو بار بار احساس دلایا تھا کہ

’’موسیقی تمہارے لیے نہیں ہے، اس فن سے دل نہ لگانا، تمہیں گویّا نہیں ڈاکٹر بنانا چاہتا ہوں‘‘

نصرت چپکے چپکے طبلے اور ہارمونیم پر موسیقی کے ابتدائی سبق دہراتے رہے، فتح علی خان بڑے رعب والے انسان تھے، گھر میں داخل ہوتے تو ہنستے چہرے سنجیدہ ہو جاتے تھے، بچوں پر ان کا بڑا رعب تھا، ان کی موجودگی میں کوئی ہوں تک نہیں کرتا تھا، ایک دن نصرت ہارمونیم پر دل بہلا رہے تھے، سروں میں اتنے مگن تھے کہ انہیں اس بات کا بھی پتہ نہ چل سکا کہ ان کے والد ان کے پیچھے کھڑے سب کچھ سن رہے ہیں، جب کسی نے اشارے سے فتح علی خان کی موجودگی کا احساس دلایا تو نصرت ہار مونیم چھوڑ کر کھڑے ہو گئے، فتح علی خان کے مسکرائے اور ان کے شوق کو سراہا، کبھی کبھی موسیقی سے دل بہلانے کی اجازت دی لیکن یہ بھی یاد دلا دیا کہ ’’میں تمہیں ڈاکٹر بنانا چاہتا ہوں، گویّا نہیں

باپ کی اجازت سے نصرت کے اندر موسیقی کے سوتے پھوٹنے لگے اور وہ فارغ وقت میں موسیقی کا ریاض کرنے لگے، فتح علی خان بیٹے کے اندر چھپے ذوق کو دیکھ کر اسے گاہے گاہے کلاسیکل موسیقی کا سبق دیتے رہے اور پھر نصرت نے جی جان سے موسیقی کی طرف دھیان دینا شروع کر دیا اور اپنے والد کو یقین دلا دیا کہ میں غبی نہیں بلکہ کچھ کرنے کا جذبہ اور حوصلہ رکھتا ہوں اس کا ثبوت دینے کے لیے نصرت کو ایک امتحان سےگزرنا پڑا۔

کلکتے کے ایک مشہور گائیک پنڈت دینا ناتھ پاکستان کے دورے پر آئے ہوئے تھے، سارا پاکستان گھوم کر وہ فیصل آباد آگیے، فتح علی خان سے ان کی شناسائی تھی، ان کے پاس آ کر ٹھہرے، باتوں باتوں میں فتح علی خان نے پنڈت سے پوچھا کہ سنایئے پنڈت جی! کیسا رہا پاکستان کا دورہ۔

پنڈت نے جواب دیا کہ

’’بالکل بیکار، سُر گلے میں تڑپ رہے ہیں، گانے کو ترس گیا ہوں‘‘

کیوں پنڈت جی؟

’’ارے فتح علی خان! کیا گاؤں، کوئی طبلے پر سنگت کی حامی بھرے تو گاؤں، گانا شروع کرتا ہوں تو طبلے والا، طبلے پر ہاتھ رکھ کر بیٹھ جاتا ہے، میں اپنی گائیکی جیسی لایا تھا، واپس کلکتے لے کر جا رہا ہوں‘‘

پنڈت جی یہ کہہ کر سونے چلے گئے، فتح علی خاں سوچ میں پڑ گئے کہ پنڈت کیا کہہ گیے، کیا پاکستان میں کوئی ان کی سنگت کے قابل نہیں، وہ اسی سوچ میں گم تھے کہ نصرت سکول سے واپس آگیے، فتح علی خان نے بیٹے کو دیکھا، چند لمحے اسے غور سے دیکھتے رہے پھر اچانک کسی فیصلے پر یقین کی مہر لگائی اور اشارے سے پاس بلایا، فتح علی خان کو پتہ تھا کہ نصرت ہار مونیم کے ساتھ ساتھ طبلے پر بھی ریاضت کرتا ہے، اسے قریب بٹھایا اور کہنے لگے کہ

’’پنڈت دینا ناتھ کہتے ہیں کہ کوئی طبلے والا ان کے ساتھ سنگت نہیں کر سکتا‘‘

نصرت نے جواب دیا کہ

’’آپ کی اجازت ہو تو میں حاضر ہوں‘‘

فتح علی خان کا سینہ خوشی سے پھول گیا، بیٹے کو دو چار گُر کی باتیں بتلائیں، نصرت نے مشق کر کے انہیں ذہن نشین کر لیا، شام کو پنڈت جی سے گانے کی فرمائش کی گئی، تو انہوں نے کہا کہ

’’طبلے پر سنگت کون کرے گا‘‘؟

فتح علی خان نے نصرت کی طرف اشارہ کیا، پنڈت ہنس کر کہنے لگے کہ

ارے! یہ موٹو نصرت۔

ہاں! ہے موٹو مگر ذہن بہت باریک ہے۔

پنڈت نے یہ سوچ کر گانا شروع کر دیا کہ فتح علی خان کا بیٹا ہے ہاتھ چلا ہی لے گا، گانا شروع ہوا تو پنڈت کو محسوس ہوا کہ وہ سخت الجھن میں ہے، نصرت کی انگلیاں بجلی کی طرح طبلے کے پڑوں پر تھرک رہی تھیں، وہ پنڈت کو یقین دلانا چاہتا تھا کہ میدان میں تمہارے مد مقابل فتح علی خان کا بیٹا ہے، سنبھل کے بول پکڑنا اور پنڈت گانا روک کر حیرت بھری نظروں سے نصرت کو دیکھ رہا تھا، آخر اس نے نصرت کو گلے لگایا، چوما، داد دی اور فتح علی خان سے کہا کہ

’’میں ہارا فتح علی خان ! تیرا یہ چھوٹا سا بیٹا بڑا گنی ہے‘‘

پنڈت دینا ناتھ کے ساتھ طبلے پر سنگیت کر کے نصرت کے دل میں یہ آرزو کروٹیں لینے لگی کہ سُرسنگیت کے سمندر میں ڈوبنا چاہیے کیوں کہ جو اس میں ڈوبے گا وہی پار اترے گا، حضرت شاہ اکبر داناپوری فرماتے ہیں کہ

ڈوب کر بحرِ محبت میں نکلنا کیسا

پار ہونے کی تمنا ہے تو ڈوبے رہنا

اس نے ڈوبنے کا خطرہ مول لینے کا پورا ارادہ کر لیا، ادھر فتح علی خان کو نصرت کی آنکھوں میں سُر کی پرچھائیاں دیکھ کر یقین ہو چکا تھا کہ یہ چیر پھاڑ کرنے والا ڈاکٹر نہیں بن سکتا بلکہ ہجر و فراق اور دلوں پر لگے زخموں کو سُر کی ٹھنڈی مرہم بخش سکتا ہے، چنانچہ اپنی آرزو کو مجبوری کی زمین میں دفن کر کے انہوں نے بیٹے کو سر سنگیت کے راز و اسرار سمجھانے شروع کر دیے، نصرت میٹرک کا امتحان پاس کر چکے تھے، چنانچہ اس نے کتابوں کے دروازے بند کر کے راگ راگنیوں کے دریچے کھولنے شروع کردیے، فتح علی خان نے زندگی بھر کا تجربہ اور ہنر نصرت کے سامنے رکھ دیا، سنگیت کے کٹھن اور مشکل راستوں کے خطرناک موڑ بتلائے مگر اس سفر میں فتح علی خان بیٹے کا ہاتھ پکڑ کر اسے منزل تک نہ پہنچا سکے کہ موت نے دستک دے دی، فتح علی خان کی وفات پورے خاندان کے لیے ناقابل برداشت حادثہ تھی، مبارک علی خان اب تنہا تھا، قوالی ان کے خاندان کی پہچان تھی، اسے یہ روایت ختم ہوتے نظر آرہی تھی، کیوں کہ فتح علی خان ان کے دایاں بازو تھے، مبارک علی اور فتح علی دونوں مل کر قوالی کو LAED کرتے تھے، اکیلے یہ ذمہ داری نبھانا اس کے بس کی بات نہ تھی، اس ساری پریشانی میں اسے نصرت کا بالکل خیال نہ آیا بلکہ اس کے بارے میں سوچ کر اسے فکر ہوتی تھی۔

فتح علی خان کے شاگرد نصرت سے بالکل مایوس ہو چکے تھے، انہیں یقین تھا کہ قوالی کرنا نصرت کے بس کی بات نہیں، کچھ لوگ نصرت کی باریک آواز پر اعتراض کرتے، کچھ کا خیال تھا کہ جو موٹاپے کے ہاتھوں خود نہیں سنبھلتا وہ قوالی کو کیا سنبھالے گا، کچھ شاگردوں نے تو سر پیٹ لیا کہ چھ سالہ قوالی کی روایت فتح علی خان کے گھر سے رخصت ہوئی، ان مختلف آوازوں سے مبارک علی خان اور خود نصرت کو بہت الجھن ہوئی۔

نصرت کے بارے میں فتح علی خان کے شاگردوں اور دوستوں کی مایوس کن باتوں کا مبارک علی خان کے دل پر گہرا اثر ہوا، اسے پہلی بار محسوس ہوا کہ کہیں یہ ان کے گھرانے کے خلاف کوئی سازش تو نہیں، کہیں وقت کا ظالم نصرت کو مایوسی اور ناکامی کی دھند کی طرف تو نہیں لے جا رہا، ان تمام باتوں کو محسوس کر کے مبارک علی خان کے اندر حوصلے اور ارادے کی ایک آواز ابھری، وہ سوگ منانے والے لوگوں کے درمیان بیٹھا تھا، پھر نصرت کا ہاتھ پکڑ کر اسے اپنے ساتھ کھڑا کیا اور بلند آواز میں پکارا، نصرت کو موسیقی کی تربیت میں دوں گا، یہ بات سن کر لوگوں پر مایوسی چھا گئی اور نصرت کے چہرے پر یقین اور اعتماد کا سورج نمودار ہونے لگا۔

فتح علی خان کی وفات اور رسمِ چہلم کے درمیان کا وقت نصرت کے لیے ایک عذاب تھا، چاروں طرف سے ایک صدا ہی تیر بن کر اس کے دل میں اترتی تھی کہ یہ کیا گائے گا? گانا اس کے بس کا روگ نہیں، نصرت کے ساتھ ہر کوئی پریشان تھا، نہ گھر میں چین نہ باہر دل بہلتا، سب کو ایک ہی فکر کہ اب کیا بنے گا، نصرت کی ایک بہن اسے ایک نجومی کے پاس لے گئی جو بڑا کامل ہاتھ پڑھتا تھا، مستقبل کی کہانی کاغذ پر لکھ کر سامنے رکھ دیتا تھا، نصرت کا ہاتھ دیکھ کر کہنے لگا کہ ’’یہ بہت بڑا گویّا بنے گا، اس کے گانے کی چاروں طرف دھوم ہوگی‘‘

نجومی کی یہ پیشن گوئی بھی نصرت کی اداسی کم نہ کر سکی، وہ چند دنوں کے لیے علامہ اقبال کے ساتھ قصور چلا گیا، وہاں سے کوٹ رادھا کشن جہاں ایک میلے میں قوالی کا پروگرام ہو رہا تھا، وہاں بخشی سلامت قوال تھے جو نصرت کے پیتا کے شاگرد تھے، انہوں نے نصرت کو گانے کے لیے کہا مگر نصرت نے انکار کر دیا کہ مجھے گانا نہیں آتا، بخشی سلامت نے کہا کہ

’’تو اگر بادشاہ بھی بن جائے تو تجھے کوئی نہیں پہچانے گا، تیری پہچان فتح علی خان سے ہے جو برصغیر کا بہت بڑا گویّا تھا، تجھے گانا آنا چاہیے، اس کے بغیر تو کچھ نہیں‘‘

یہ بات سن کر نصرت کمرے میں چلے گئے، دروازہ بند کر کے مسلسل روتا رہا اور بڑ بڑاتا رہا کہ اگر میں گا نہیں سکتا تو میری پیدائش فتح علی خان کے گھر کیوں ہوئی اور پھر ایک انہونی بات جو شاید بہت کم لوگوں کے ساتھ ہوتی ہے اور وہ بہت کم لوگ ایسے ہوتے ہیں جن کا نام تاریخ میں کسی نہ کسی فن کے حوالے سے زندہ رہتا ہے، ان لوگوں میں نصرت اور یہو خان اور یونان کے مشہور ڈرامہ نگار سو فیکلیز کا شمار ہوتا ہے، دونوں کو خواب ہی میں بڑا بننے کی بشارت ہوئی، دونوں کے دل میں فن خواب کی سیڑھیوں سے اترا، نصرت کو بھی ایک ایسے ہی خواب سے دو چار ہونا پڑا، ایک رات وہ بے سدھ ہوا تھا، خواب میں فتح علی خان آئے، اس کا ہاتھ پکڑ کر ایک مزار پر لے گئے اور کہا کہ

’’میں اس مزار پر ساری عمر گاتا رہا ہوں، تم بھی گاؤ‘‘

نصرت نے گانا شروع کیا اور پھر فتح علی خان نے اسے سُر کے راستے پر ڈال کر اس کے گلے میں گیتوں کا رس نچوڑ دیا، خواب میں نصرت کو گانا سن کر سارا گھر اس کی چارپائی کے ارد گرد جمع ہوگیا جب نصرت گانا ختم کر چکا تو اسے نیند سے جگایا اور نیند میں گانے کی وجہ پوچھی، نصرت نے خواب کی ساری کہانی دہرا دی، گھر والے نصرت کا گانا اور مزار کا نقشہ سن کر چند لمحوں کے لیے حیران رہ گئے مگر یہ حیرانی تھوڑی دیر کی تھی۔

چہلم پر دستار بندی کی رسم در اصل باپ کے مرنے کے بعد بیٹے کو فنی اور گھریلو ذمہ داریاں سونپنے کی ایک رسم ہے، فتح علی خان کی رسمِ چہلم پر جب نصرت کے سر پر پگڑی باندھی گئی تو شاگردوں نے کہا کہ

’’گانا اسے کہاں آتا ہے، بس پگڑی باندھنے کا شوق پورا کر دو‘‘

ایک بار منگلا جھیل کے پار ایک گاؤں سے انہیں قوالی کا دعوت نامہ آیا، راستہ بڑا خطرناک تھا، ایک لانچ میں بیٹھ کر پہلے منگلا جھیل کراس کرنا تھی، اس کے بعد کچھ میلوں کا پتھریلا راستہ تھا، ساری پارٹی لانچ میں بیٹھی، چاروں طرف پانی دیکھ کر سب لوگ راگ راگنیاں بھول گئے، جھیل کے درمیان جا کر لانچ کا پیٹرول ختم ہوگیا، نصرت بچہ اور موٹا تھا، گھبرا گیا، کسی نہ کسی طریقے سے کنارے تک آئے، آگے راستہ پتھریلا، راستے میں کئی بار گرا کئی بار اٹھا آخر ایک جگہ تھک کر بیٹھ گیا اور زار و قطار رونے لگا، نصرت کے چچا سلامت علی خان نے نصرت کے شانے پر ہاتھ رکھا اور پیار سے کہا کہ

’’بس یہی علاقہ رہ گیا ہے جسے ہمارے خاندان نے فتح نہیں کیا، شاباش اٹھ ہمت کر‘‘

پارٹی کے ایک بزرگ ممبر عبدالستار نے سلامت علی خان سے کہا کہ

’’سبحان اللہ! آسان اور سر سبز علاقے تم بھائیوں نے فتح کر لیے، اس کے لیے یہ خطر ناک علاقہ بچا لیا کہ نصرت پیدا ہوگا تو فتح کرے گا، پہلے اس علاقے پر قبضہ کرلیا ہوتا، نصرت نے چچا کے کہنے پر ہمت باندھی، اٹھا اور پھر چلتا رہا اور مسلسل چلتے چلتے آج اس نے روس چین اور اسرائیل کے علاوہ سب علاقوں میں سلامت علی خان کے خاندان کا نام چمکا دیا ہے، اپنے شروعاتی زمانے میں نصرت کو ایسی ایسی مشکلات کا عملی سامنا کرنا پڑا کہ اگر اس کی جگہ کوئی اور ہوتا تو گانا چھوڑ گیا ہوتا لیکن نصرت نے اپنے چہرے پر کبھی ملال یا مایوسی کی سلوٹ نہیں آنے دی، مبارک علی خان جن کے ذمہ نصرت کی تربیت تھی وہ کبھی کبھی بے حد مایوس ہو جاتے تھے، ایک بار مبارک علی گھر کے باہر چار پائی پر بیٹھے کسی گہری سوچ میں گم تھے، چہرے پر عجیب تفکر کروٹیں لے رہا تھا، ’’عوام اخبار‘‘ فیصل آباد کے رپورٹر بشیر اعجاز آئے سلام کیا اور بیٹھ گئے، مبارک علی خان اسی طرح بیٹھے رہے، بشیر اعجاز نے نے چند لمحوں کے بعد پوچھا کہ

’’خان صاحب! خیریت ہے کس سوچ میں گم ہیں‘‘

مبارک علی نے بشیر اعجاز کو دیکھ کر کہا کہ

’’خیریت ہوتی تو یوں بیٹھتا۔۔ چھ سو سال سے قوالی کو ہمارے بزرگوں نے خون دے دے کر گل و گلزار کیا ہے، ہر عہد میں ہمارا کوئی نہ کوئی بزرگ نامور گائیکوں میں شامل رہا ہے لیکن اب ایسا محسوس ہوتا ہے جیسے قوالی کا یہ باغ مرجھانے والا ہے‘‘

پھر مبارک علی بڑے غصے میں تن کر بیٹھ گیے کہ

’’لیکن ایک بات آپ ضرور یاد رکھیں، میں تو شاید وہ دن دیکھنے کے لیے زندہ نہ رہوں لیکن وہ دن ضرور آئے گا جب نصرت کا موٹا پا ہی اس کی شہرت کی وجہ بن جائے گا، یہ ساری دنیا پر اپنی گائیکی کا سکہ جمائے گا، آج جو اس کا مذاق اڑاتے ہیں کل یہی لوگ نصرت کی شہرت اور مقام دیکھ کر حیران رہ جائیں گے‘‘

خواب میں اجمیر شریف کا مزار دیکھنا اور مزار پر باپ کے حکم پر گانا نصرت کے لیے نیک شگون ثابت ہوا، سننے والوں نے یقین کر لیا کہ نصرت گاسکتا ہے اور قوالی میں آخر دم تک چلنے کا دم خم رکھتا ہے، چنانچہ اسے پارٹی میں باقاعدہ شامل ہونے کی اجازت مل گئی اور پھر وہ لمحہ بھی آگیا جس کا اسے انتظار تھا۔

ریڈیو پاکستان لاہور ہر سال 23 مارچ کو محفلِ موسیقی برپا کرتا تھا اور اسے جشنِ بہاراں کا نام دیا جاتا تھا، اس میں ملک کے نامور کلاسیکل گانے والے حصہ لیتے تھے، 23 مارچ 1965ء کو نصرت اپنی پارٹی کے ساتھ اس میں شامل ہوئے، شکور بیدل پروگرام کے پروڈیوسر تھے، رِہرسل جاری تھی، قوالی کی پارٹی کو نصرت کے چچا نوازش علی خان LEAD کر رہے تھے، پارٹی میں شامل افراد اپنی آوازوں میں اپنے LEADER کا ساتھ دے رہے تھے، رِہرسل دیکھنے والے ایک آواز سن کر ذرا سا چونکے، اس آواز کی اپنی انفرادیت تھی، ریاضت کی جھلک تھی، تربیت کا عُنصر پکار پکار کر کہہ رہا تھا کہ مجھے غور سے سنو۔۔۔ شکور بیدل نے ہاتھ کے اشارے سے رہرسل کو روکا اور سلامت علی خان سے کہا کہ

’’خان صاحب! آپ اس بچے سے قوالی LEAD کیوں نہیں کرواتے‘‘

نوازش علی خان اور دوسرے لوگوں نے ذرا سی ہچکچاہٹ کا اظہار کیا لیکن شکور بیدل کے اصرار پر مان گئے، وہ بچہ پچھلی صف سے نکل کر آگے آ بیٹھا، اپنے خدا کو یاد کیا اور اپنے سارے فن کو سمیٹ کر آواز لگائی، اس کے گلے سے نکلے سُر ہواوں میں چاروں طرف ستارے بن کر چمکنے لگے، اس کے اپنے ساتھوں کے چہرے کھل گئے، محفل میں بیٹھے نامور گانے والے بیگم روشن آرا، سلامت علی، نزاکت علی، امید علی، سردار خان نے ایک نئے اور بڑے فنکار کی پیدائش کی مبارک باد دی، ریڈیو سننے والے ایک نئی آواز سے متعارف ہوئے جن کے کان سُر کی باریکیوں سے آشنا تھے، اس جشنِ بہاراں میں نصرت کو پہلی پہچان ملی۔

نصرت کے خاندان میں قوالی کی روایت تقریباً 600 سالوں سے چلی رہی ہے، شروع میں ان کے پیتا نہیں چاہتے تھے کہ نصرت اس خاندانی پیشے کو اپنائیں، پاکستان میں نصرت کا پہلا تعارف اپنے خاندان کی روایتی رنگ میں گائی ہوئی ان کی ابتدائی قوالیوں سے ہوا، ان کی مشہور قوالی ’’علی مولا علی‘‘ انہی دنوں کی یادگار ہے، بعد میں انہوں نے لوک شاعری اور اپنے سمکالین شعرا کا کلام اپنے مخصوص انداز میں گا کر ملک کے اندر کامیابی کے جھنڈے گاڑے اور اس دور میں ’’سن چرخے مٹھی مٹھی کوک ماہی مینوں یاد آوندا’’ اور ’’سانسوں کی مالا پہ سمروں میں پی کا نام’’ نے بے گناہ شہرت حاصل کی اور یوں نصرت کا دائرہ بڑا ہوتا گیا۔

1964ء میں نصرت نے 16 برس کی عمر میں اپنے پیتا کے چہلم کے موقع پر زندگی میں پہلی بار پرفارمنس دی، پیتا کی وفات کے بعد انہوں نے موسیقی کی تربیت اپنے چچا مبارک علی خاں اور سلامت علی خاں سے حاصل کی، 1971ء اپنے چچا مبارک فتح علی خاں کی وفات کے بعد وہ قوالی پارٹی کے سرپرست بنے۔

فتح علی خان اور مبارک علی خان کی وفات کے بعد اس گھرانے سے قوالی کا سلسلہ بند نہیں ہوا تھا، ان دونوں کے بعد سلامت علی خان قوالی کو LEAD کرتے تھے، نصرت قوالی میں شامل ہوتے تھے لیکن ان کی حیثیت کرکٹ کے بارھویں کھلاڑی جیسی تھی، قوالی کے شروع میں نصرت ایک آدھ SOLO پروگرام کرتے تھے، اس کے بعد ان سے کہا جاتا کہ گاڑی میں جا کر سو جاؤ، قوالی تمہارے بس کا روگ نہیں ہم خود کر لیں گے، نصرت بادل ناخواستہ گاڑی میں جا کر لیٹ جاتا اور جب ساتھیوں کی آواز اس کے کان پڑتی تو دو ایک ہی بات سوچتا کہ ’’میں اس پارٹی کا اہم رکن کب بنوں گا‘‘

نصرت استاد فتح علی خان کے بیٹے ضرور تھے لیکن ان کی شہرت کمانے کے لیے بہت پاپڑ بیلے، بڑا کشٹ کاٹا، بڑے کنوئیں جھانکے، راستوں کی بڑی گرد پھانکی، بڑے دکھ جھیلے، بڑی باتیں سنیں، طنزیہ نگاہوں کے بے شمار تیر سینے پر کھائے تب جا کر پتھر دل موم ہوئے، اس کے لیے نصرت نے بھیک نہیں مانگی انسانوں کے آگے دامن نہیں پھیلایا، اپنے فن کا بازار لگا کر ہنر اور کلا کی نمائش کی، خریدار آئے، مال دیکھا، پسند کیا، خریدا اور اس طرح نصرت ملک میں دور دور تک مشہور ہوتے گیے، نصرت کے آغاز کا زمانہ در اصل غلام فرید صابری کے عروج کا زمانہ تھا، ہر طرف غلام فرید کا نام اور کام داد حاصل کر رہا تھا، ’’تاجدارِ حرم‘‘ کی قوالی خاص و عام کی پسند بن چکی تھی، نصرت کے سامنے یہ بہت بڑا مرحلہ تھا جو انہیں سر کرنا تھا لیکن ان کی سوچ منفی نہیں تھی، وہ فن کے ذریعے برابری کا طلب گار تھے۔

کہتے ہیں کہ نصرت نے انگریزی کا علم واصف علی واصفؔ سے پڑھنے جایا کرتے تھے، گھر کی طرف سے واصف صاحب کو یہ بتلایا گیا تھا کہ نصرت کو قوال پڑھنے پر زیادہ زور دلایا جائے تاکہ وہ اس فن کو بخوبی سیکھ سکیں، واصف صاحب نے شروعاتی دنوں میں نصرت کو حضرت داتا گنج بخش کی شان میں ایک منقبت ’’داتا کے غلاموں کو اب عید منانے دو‘‘ لکھ کر دیا اور کہا کہ اس مرتبہ دتا صاحب کے عرس کے موقع پر یہی پڑھنا، کہتے ہیں کہ نصرت نے جب عرس میں پڑھنا شروع کیا تو محفل لوٹ لیا اور دوسرے دن بوری میں بھر کے پیسے واصف صاحب کے قدموں میں ڈال دیا، واصف صاحب نے اس بوریے سے دو ایک نوٹ نکالے اور سب واپس کر دیئے، اس کے بعد واصف صاحب کا لکھا ’’نعرۂ مستانہ‘‘ اور ’’ہر چہرے میں آتی ہے نظر۔۔۔‘‘اور ’’ہے دل میں عشقِ نبی کا جلوہ، نظر میں داتا سما رہے ہیں‘‘ نے بھی کافی مقبولیت حاصل کی، نصرت نے علامہ اقبال کا شکوہ اور جوابِ شکوہ اپنے پیتا کی طرز پر پڑھ کر اسے ایک نیا موڑ دیا، انہوں نے امیر خسرو، میراں بھیک، بیدم شاہ وارثی، ناطق گلاوٹھی، حسرت موہانی، ظفر علی خاں، جگر مرادآبادی، ہری چند اختر، قمر جلالوی، شکیب جلالی، خادم اجمیری، عالم لکھنوی، ناصر کاظمی، ساغر صدیقی، حفیظ جالندھری، عالم لکھنوی، احسان دانش، صبا اکبرآبادی، طفیل ہوشیار پوری، سیف الدین سیف، اقبال صفی پوری، قیصرالجعفری کے علاوہ پیر نصیرالدین نصیر اور ان کے پیتا پیر غلام معین الدین مشتاقؔ گولڑوی، ناصر کاظمی، ناز خیالوی، راغب مرادآبادی، صائم چشتی، مظفر وارثی، عبدالستار نیازی، محمد علی ظہوری، ساجد چشتی مہروی، خالد محمود نقشبندی، بشیر فاروقی، عبدالحمید عدمؔ، نازاں شولہ پوری، صہبا، انور، بسمل، ابنِ انشا، فیض احمد فیضؔ، سلیم کوثر، احمد فراز، پروین شاکر، ایس، ایم صادق، جاوید اختر وغیرہ کے کلام خوب پڑھے ہیں۔

اسی طرح فارسی کلام میں مولانا جلال الدین رومی، عبدالرحمٰن جامی، بو علی شاہ قلندر، امیر خسرو، شاہ نیاز احمد بریلوی، حکیم نذر اشرف وغیرہ کی غزلیں اور پنجابی کلام میں شاہ حسین، سلطان باہو، بلہے شاہ، پیر مہر علی چشتی، بری نظامی وغیرہ کے کلام بھی کثرت سے پڑھے ہیں، نصرت نے ایران کے مشہور گلوکار ہمایوں شجریان کے ساتھ رومی ایک غزل پڑھی ہے جسے موجودہ وقتوں میں کافی پسند کیا جاتا ہے

اس دوران نصرت کی قوالیوں میں دو ایسے شعرا ہیں جن کی غزلیں نصرت نے شاید سب سے زیادہ پڑھی ہو، وہ فنا بلند شہری اور پرنم الہ آبادی ہیں، بلکہ یہ کہیے کہک فنا نے تو نصرت کے مزاج کا کلام بھی لکھنا شروع کر دیا تھا، فنا سے نصرت کے روحانی تعلقات بھی تھے، اس کی وجہ یہ ہے کہ نصرت اور فنا دونوں شاہ نقیب اللہ جہاں گیری سے عقیدت رکھتے تھے اور پرنم کا تو نصرت کے گھر آنا جانا تھا۔

نصرت کو گولڑہ شریف سے بڑی عقیدت تھی، وہ ہاں برابر جایا کرتے اور قوالی عرس کی محفل میں پڑھا کرتے، گولڑہ کے سجادہ نشیں پیر نصیرالدین نصیر کے کئی کلام انہوں نے پڑھے ہیں جو کافی مقبول ہوئے، اسی طرح معروف صوفی شاعر صائم چشتی کیسنگت اور فیض نے نصرت کو شہرت و عظمت کی بلندیاں عطا فرما دیں۔

نصرت کو بارگاہ مولیٰ علی میں پہنچانے والے صائم چشتی ہی تھے، نصرت خود کہتے تھے کہ میری پہچان حضرت صائم چشتی کا کلام ہے، انہوں نے B.B.C کو انٹرویو دیتے ہوئے کہا کہ حضرت صائم چشتی کی قوالی ’’حق علی علی مولا علی علی‘‘ ہی میری اولین پہچان ہے۔

صائم چشتی نے ہر موقع پر نصرت کی روحانی رہنمائی فرمائی، اس کی بنیادی وجہ یہ تھی کہ مبارک علی خاں جو نصرت کے چچا تھے، انہوں نے اپنی شدید بیماری کے دوران نصرت کا بازو آپ کے ہاتھوں میں دے کر کہاتھا کہ مجھ سے وعدہ فرمائیں میرے بعد آپ نصرت کے بازو کو تھامے رکھیں گے، چنانچہ حضرت صائم چشتی نے نصرت کی ہر موڑ پر روحانی مدد فرمائی۔

نصرت کو ’’شہریارِ موسیقی‘‘ کا لقب اور تاجپوشی آپ ہی نے دھوبی گھاٹ کے گراونڈ میں فرمائی۔

نصرت کا خاندان اور آپ کی پارٹی کے جو اراکین اس وقت زندہ ہیں وہ جانتے ہیں کہ خصوصاً داتا صاحب، بابا صاحب، نوری بوری سرکار اور خواجگانِ چشت میں حاضر ہونے کے وقت نصرت بطور خاص آپ کی خدمت میں حاضر ہوتے اور نیا کلام لکھواتے۔

نصرت نے صائم چشتی کو بتایا کہ جب ہم دورۂ یورپ کے لیے گئے تو قوا لی ’’حق علی علی علی، مولا علی علی‘‘ سن کر انگریز مست ہوگئے اور وہ ہمارے ساتھ ہی علی علی کر نے لگے۔

نصرت یورپ میں قوالی پڑھ رہے تھے کہ اقبال صفی پوری کے ایک مصرعہ پر بحث چھڑ گئی۔

’’عصمت توبہ کو ٹھکرانے کا موسم آگیا‘‘

کو کچھ لوگوں نے یہ کہہ کر پیش کیا کہ نصرت نے شعر یوں پڑھا ہے۔

’’عصمت کعبہ کے ٹھکرانے کا موسم آگیا‘‘

اس بات پر پشاور میں جلوس نکالے گئے، نصرت کو برا بھلا کہا جانے لگا بلکہ ان کو قتل کی دھمکیاں ملنے لگیں، نصرت نے ٹیلیفون پر صورتحال سے صائم چشتی کو آگاہ کیا تو آپ نے فرمایا کہ

’’نصرت! وطن واپس آجائیں علی علی کہنے والوں کو کچھ نہیں ہوتا‘‘

صائم چشتی نے نصرت کی قوالی جس کی وجہ سے لوگوں میں بڑا شور و غوغا تھا، نصرت کا دفاع کیا اور ’’نوائے وقت‘‘ اور دوسرے پیپروں میں مضامین لکھے، آپ کے مضمون کا عنوان تھا۔

’’نصرت فتح علی خان اور عصمتِ توبہ‘‘

آپ نے ہمیشہ نصرت کی نصرت فرمائی، اسی لیے تو ایک مقطع میں صائم چشتی نے فرمایا کہ

یہ نصرت کی نصرت یہ صائمؔ کی عزت

تمہارا ہی فیضان گنجِ شکر ہے

جس روز نصرت کی وفات کی خبر صائم چشتی کو ملی تھی، آپ نے اسی وقت تاریخِ وصال بہ حساب ابجد رقم فرمائی جسے اخبارات و میگزین میں شائع کیا گیا، وہ تاریخ یہ تھی۔

’’ہے ہوگیا غروب موسیقی کا آفتاب‘‘

صائم چشتی کے کئی کلام اردو اور پنجابی میں نصرت نے پڑھے ہیں جسے کافی مقبولیت ملی ہے۔

راقم نے یہ دوعویٰ بالکل نہیں کیا ہے جو کچھ ہے وہ سب یہی ہے بلکہ اس کے علاوہ نصرت نے کئی کلام پڑھے ہیں جو اپنی مثال آپ ہیں، اس میں انہیں کلام کو جگہ دی گئی جن تک رسائی بہت آسانی سے ہوگئی یا پھر یہ کہیے کہ یہ عوام میں زیادہ مقبول ہے، شاید یہ اپنی نوعیت کا پہلا ایسا کام ہوگا جو نصرت کے اوریجنل ٹیسکٹ کو کتابی صورت میں لانے کا کام ہے، بعض قوالیاں لیرکس کے طور پر شامل کی گئی مگر زیادہ تر قوالی اور غزلوں کو اس کی اصل صورت میں شامل کیا گیا نہ کہ نصرت کہ ایکسٹرا بول اور لٹکن کو بھی جگہ دی گئی ہے۔

1958ء کے مارشل لا کے بعد ایوب خان نے حکومت سنبھالی تو بہت سی انتظامی اصلاحات میں محکمہ اوقاف کی تشکیل بھی تھی، اس محکمے نے وجود میں آتے ہی پاکستان کے تمام مشہور درگاہوں کو سرکاری تحویل میں لے لیا، اس سے یہ سے یہ ہوا کہ مزاروں سے ہونے والی تمام آمدنی کا حساب کتاب گورنمنٹ کے ہاتھ میں آگیا، نذرانوں کی صندوقیچیوں پر تالے پڑگئے، جس سے درگاہوں کی پرانی انتظامیہ کے اختیارات محدود ہوگئے، حکومت اور ان کے درمیان کبھی کبھی رنجش اور ناراضگی کی گرہ بھی پڑ جاتی تھی، پاکپٹن میں حضرت بابا فریدالدین گنجِ شکر کی درگاہ برصغیر کے مشہور درگاہوں میں سے ایک ہے، جب اس کو تحویل میں لینے کا مسئلہ پیش آیا تو نصرت کے والد فتح علی خان نے حکومت کا ساتھ دیا، درگاہ کے متولی دیوان صاحب کو یہ بات ناگوار گزری اور فتح علی خان کے ساتھ ان کے تعلقات ذرا سا کشیدہ ہوگئے اور فتح علی خان نے بابا فرید کی درگاہ پر جانا چھوڑ دیا لیکن جب نصرت کی آواز چاروں طرف گونجی تو یہ رنجش ختم ہوگئی اور نصرت پہلی بار دیوان صاحب کی دعوت پر پاکپٹن گئے، پاکپٹن میں پورے ملک کے قوال نذارنۂ عقیدت پیش کرنے کے لیے حاضر ہوتے تھے لیکن وہاں طوطی صرف فرید صابری کا بولتا تھا، ہر قوال پارٹی ان کی شہرت سے تقریباً مایوس تھی، پاکپٹن میں غلام فرید صابری آکر میلہ لوٹ لیتے تھے اور ان کے جانے کے بعد پنڈال خالی ہو جاتا تھا، خوف زدہ ہونے کی اصل وجہ یہ تھی کہ جب وہ قوالی کر کے رخصت ہوتے تو ان کے ساتھ ہی سب لوگ اٹھ کر چلے جاتے تھے، نصرت اس بات سے پوری طرح واقف تھے۔

غلام فرید صابری اپنی پارٹی کے ساتھ آئے، نہایت شان سے قوالی کا سماں پیدا کیا، چاروں طرف سے داد وصول کی اور محفل لوٹ کر رخصت ہوگئے، ان کے ساتھ لوگ بھی اٹھے اور پنڈال میں دور دور جاکر آرام کرنے لگے، غلام فرید صابری کے بعد نصرت کو وقت دیا گیا، ان کے سامنے چند آدمی بیٹھے تھے، قوالی شروع ہوئی، نصرت کی آواز نے آرام کرنے والوں کو بے چین کر دیا، وہ سب پہلو بدل کر اٹھے اور پھر غلام فرید صابری کے ساتھ جانے والے سارے لوگ نصرت فتح علی خان کے سامنے آبیٹھے، اس کی انوکھی گائیکی کے طلسم میں اسیر ہونے کا اعلان کر رہے تھے، اس دن کے بعد سے نصرت کی شہرت کا گراف تیزی کے ساتھ بلندی کی طرف بڑھنا شروع ہوگیا اور وہ اپنے سمکالین فنکاروں سے کہیں آگے نکل گیے۔

نیشنل آرٹ کونسل اسلام آباد کا ’’جشنِ امیر خسرو‘‘ قوالی کا ایک یادگار جلسہ تھا، اس محفل میں قوالی کی 700 سالہ روایت کو تازہ کیا جاتا تھا، یہ بڑی خوبصورت اور پُروقار تقریب تھی، پورے ملک کے نامور قوال اس میں شرکت کر رہے تھے، منظور نیازی، بہاؤالدین اور غلام فرید صابری ان میں آگے آگے تھے، نصرت کو دعوت نامہ ملا مگر ذرا دیر کے ساتھ۔۔۔ یہ اپنی پارٹی کے ساتھ وہاں پہنچے تو عجیب سماں تھا، سب قوال پارٹیاں دو دو تین تین دن پہلے پہنچ چکی تھیں اور اپنے اپنے آئٹم منتخب کر لیے تھے، شرط یہ تھی کہ صرف حضرت امیر خسرو کا کلام پڑھا جائے گا، نصرت جس آئٹم کا نام لیتے، جواب ملتا کہ

یہ منظور نیازی گائیں گے!

نصرت کوئی اور نام لیتے تو جواب آتا کہ

یہ غلام فرید صابری گائیں گے!

ایک ایک کر کے سب آئٹم لوگوں کے حصے میں آگیے، نصرت سوچ میں پڑگئے لیکن گھبرائے نہیں، یہ ان کے لیے امتحان کا موقع تھا، خاندانی قوال تھے، یادداشت کے پنّے پلٹے، خاندانی ورثے کی طرف نظر دوڑائی جو بزرگوں سے سیکھا تھا، اس کا جائزہ لیا، پرانی بندشوں کو یاد کیا اور پھر ایک ایسا گوہرِ نایاب سامنے رکھ دیا جو کسی قوال نے پہلے نہیں دیکھا تھا اور جو صرف نصرت کے خاندان کو یاد تھا، یہ امیر خسرو کا ایک نایاب شاہکار تھا۔

میں تو پیا سے نیناں ملا آئی رے

گر ناری گنواری کہے سو کہے

میں تو پیا سے نیناں ملا آئی رے

اس محفل کے سیکرٹری ملک سجاد حیدر کہتے تھے کہ نصرت نے جو گایا وہ سب لوگوں اور قوال حضرات کے لیے بھی بالکل نئی چیز تھی، اس کے بعد نصرت نے راگ ساز گیری گایا، ہال بے خود ہوگیا، چاروں طرف نصرت نصرت کی صدا تھی، لوگ نصرت کو اسٹیج سے جانے نہیں دے رہے تھے، یہاں نصرت نے ’’حق علی، علی‘‘ کی قوالی شروع کی تو سننے والے بے قابو ہوگئے، ایک روحانی اثر چاروں طرف پھیل گیا، ہال کا ہر آدمی کلام اور گائیکی کے جادو میں بے خود ہونے لگا، فیض احمد فیض، عبدالحفیظ پیرزاده، خالد سعید بٹ، یوسف بچ اور محمد علی وغیرہ اسٹیج پر آگئے ان سب نے مل کر تال دینا شروع کی، پورا ہال ساتھ شامل ہوگیا، حضرت امیر خسرو موسیقی اور نصرت کے انداز نے سب کو گرویدہ بنا لیا۔

نصرت نے قوالی کی مشکل ترین صنف قول قلیانہ جو 5 تالوں میں تقسیم ہوتا ہے اور جو عام قوالوں کے بس کی بات نہیں جیسے صرف خاندانی قوال گا سکتے ہیں کیوں کہ قوالوں کے لیے قوال قلیانہ گانا، پل صراط سے گزرنا ہے، گایا تو لوگ دنگ رہ گئے، اب نصرت اس منزل کے بالکل قریب آگئے تھے جس کی طرف انہوں نے فتح علی خان کے چہلم پر پہلا قدم بڑھایا تھا۔

نصرت کی چار بڑی بہنیں اور ایک چھوٹے بھائی فرخ فتح علی خاں تھے، فرخ ان کے ساتھ گاتے بجاتے تھے، وہ ان دو لوگوں میں سے ایک تھے جو اس تمام عرصہ کے دوران میں پارٹی کے ساتھ رہے، وہ پارٹی کے بنیادی ہارمونیم نواز ہونے کے ساتھ ہمنوائی بھی کیا کرتے تھے، ہارمونیم کی تمام سپتکوں پر مہارت اور چشم زدن میں دھن بدلنے کی صلاحیت کی بنیاد پر انہیں بجا طور پر اپنے پیشے میں بہترین قرار دیا جا سکتا ہے، جب وہ نصرت کے ہمراہ انگلستان کے دورے پر گئے، تب سے انہیں ہر جگہ ہارمونیم راج صاحب کے خطاب سے جانا جانے لگا، ان کی مہارت اور قابلیت بالعموم نصرت کی آواز کے پسِ منظر میں بجانے کی بنا پر ظاہر نہ ہو پاتی، 1989ء میں پاکستان ٹیلی ویژن کے ساتھ انٹرویو میں نصرت نے خلاصہ کیا کہ ان کی گائی گئی اکثر قوالیوں کی موسیقی فرخ ترتیب دیا کرتے تھے، ان کا نام کئی البموں مثلاً ’’شہنشاہ‘‘ میں بطور موسیقار درج کیا گیا۔