حضرت فریدالدین طویلہ بخش اور ان کا خانوادہ

بہار میں جن خانوادوں سے تصوف کو فروغ ملا ان میں حضرت فریدالدین طویلہ بخش اور ان کا خانوادہ نمایاں کردار ادا کرتا ہے، انہوں نے یہاں روحانیت اور اس کی عظمت کا ایسا سلسلہ قائم کیا جس کی چمک تقریباً تین صدیوں پر محیط ہے، کسے پتا تھا کہ بہار شریف میں ملّا چاند کی آباد کردہ سرزمین پر صوفیانہ رنگ چڑھنے والاہے، خدمتِ خلق کے جذبے سے سرشار حضرت فریدالدین طویلہ بخش کا خاندان بدایوں سے مگربی بنگال اور مغربی بنگال سے بہار شریف میں آباد ہوا، تاریخ کی قدیم کتابیں اس بات کی شاہد ہیں کہ بہار میں سلسلۂ چشتیہ کا فیضان آپ سے خوب ہوا، شاید ہی کوئی خانوادہ ہوگا جنہیں آپ کا فیضان نہ پہنچا ہو، حضرت فریدالدین اور ان کے خانوادہ کے علم و عمل اور زہد و ورع نے عام لوگوں کی زندگی سنوارنے میں بڑی اہم خدمات انجام دی ہے، دولت و جاہ کے نشے میں سرشار انسان ان کی خاموش اور پرسکون زندگی سے اثر قبول کیے بغیر نہ رہ سکتے تھے، ان کی تعلیم و تبلیغ سے لوگ اپنی لغزشوں سے تائب ہونے پر مجبور ہوجاتے تھے۔

آپ مغربی بنگال کے شہرِ مالدہ میں نویں صدی ہجری کے اوائل میں حضرت سیّد ابراہیم بن سیّد جمال الدین کے یہاں پیدا ہوائے، رشتۂ خاندانی کے لحاظ سے حضرت بدرِ عالم زاہدی کے بھانجہ اور حضرت نور قطبِ عالم پنڈوی کے خالہ زاد بھائی ہوتے ہیں۔

سیّد ابراہیم بن سیّد جمال الدین اپنے والد کے زمانۂ حیات میں نہایت کم سن تھے، خورد سال ہی میں آپ کے والد نے رحلت فرمائی، حضرت نظام الدین اؤلیا نے پرورش کی اور اپنے زیرِ نگرانی رکھا، جب حضرت اخی سراج کو بنگال جانے کا حکم ہوا تو محبوبِ الہٰی نے سیّد ابراہیم کو بھی ان کے ساتھ کر دیا، اخی سراج اپنے ساتھ لکھنوتی (مالدہ) لے گئے اور ان کی تعلیم و تربیت کی، جب جوان ہوئے تو آپ کا نکاح حضرت فخرالدین زاہدی کی صاحبزادی یعنی حضرت علاؤالحق پنڈوی کی زوجِ ہمشیرہ سے کردیا، یہ بی بی حضرت بدرِ عالم زاہدی کی حقیقی ہمشیرہ ہوتی ہیں، جن سے حضرت فریدالدین پیدا ہوئے۔

اس کی وضاحت کریم الدین احمد بہاری یوں کرتے ہیں کہ

’’و می گویند کہ حضرت شیخ نور قطبِ عالم پنڈوی و حضرت فرید طویلہ بخش ہردو ہمشیرۂ زادگان حضرت پیر بدرِ عالم زاہدی قدس سرہٗ اند‘‘

(مخزن الانساب، ص؍۱۷۲)

حضرت شاہ عطا حسین فانیؔ نے ’’کنزالانساب‘‘، کریم الدین احمد بہاری نے ”مخزن الانساب“ اور شاہ محمد واجد ابوالعُلائی نے ’’تذکرۃ الابرار‘‘ میں آپ کو حضرت نظام الدین اؤلیا کا ہمجد لکھا ہے اور وہ اس طرح کہ حضرت نظام الدین اؤلیا کے والد دو بھائی تھے، سیّد احمد اور سیّد محمد، سیّد احمد کے صاحبزادے حضرت نظام الدین اؤلیا اور سیّد محمد کے صاحبزادے سیّد جمال الدین، یہ محبوبِ الہٰی کے مرید و خلیفہ ہوئے، ان کے صاحبزادے سیّد ابراہیم تھے۔

حضرت شاہ عطا حسین فانیؔ رقمطراز ہیں کہ

’’سیّد محمد بدایونی را یک فرزند حضرت جمال اؤلیا کہ مرید و خلیفہ حضرت محبوبِ الہٰی برادر عمزاد بودند فرزند رتبۂ بلند ایشاں سیّد شاہ ابراہیم ایشاں را تربیتِ ظاہری و باطنی از پدرِ بزرگوار خود بود‘‘

(کنزالانساب، ص؍ ۸۷)

’’مخزن الانساب‘‘ میں ایک جگہ محبوبِ الہٰی اور سیّد جمال الدین کو حقیقی بھائی لکھا گیاہے لیکن حاشیہ پر ایک دوسری روایت یہ بھی لکھی ہے کہ چچا زاد بھائی تھے، اس روایت سے ’’کنزالانساب‘‘ کی تائید ہوتی ہے، یہ حیدرآباد کے قریب کسی علاقہ میں رہے اور وہیں اُن کا مزار ہے، کریم الدین احمد بہاری لکھتے ہیں کہ

’’گویند کہ قبل از تشریف آوردن و قیام فرمودن حضرت شیخ المشائخ بدہلی یک برادرِ حقیقی آنحضرت کہ جمال الدین نام داشت بقصبہ پسرے خورد سال را گذاشتہ رحلت فرمودہ بود، مرقد پاکش ہماں جا۔۔نام آں پسر سیّد ابراہیم است‘‘

(مخزن الانساب، ص؍ ۱۷۲)

مزید حاشیے میں رقمطراز ہیں کہ

’’بعضے بر آنند کہ سیّد جمال الدین کہ مزارش قریب حیدرآباد دکن واقع است، برادر عمزاد حضرت سلطان المشائخ نظام الدین بدایونی بود و حضرت مخدوم فرید طویلہ بخش بہاری از اولاد ہمیں بزرگ است‘‘

(ص؍ ۱۷۲)

یہ تحقیق طلب موضوع ہے کہ سیّد جمال الدین کا مزار حیدرآباد کے قریب میں کیوں کر واقع ہے اور اگر وہ محبوبِ الٰہی کے مرید و خلیفہ ہوئے تو کسی کتاب میں اس تعلق کے ساتھ ذکر کیوں نہیں؟ ہاں البتہ شیخ عبدالرحمٰن لکھنوی نے ’’مراۃ الاسرار‘‘ میں مولانا جمال الدین نامی خلیفہ کا ذکر کیا ہے اور یہ بھی بتایا ہے کہ آپ کا وصال محبوبِ الٰہی کی زندگی میں ہوا، ممکن ہوکہ ان بزرگ کی طرف ہی اشارہ ہو مگر خاندانی طور پر بہار کے علاوہ دوسری ریاست یا چشتیہ تذکرے کی قدیم کتب میں اس طرح کے واقعات کا کہیں کوئی ذکر نہیں ملتا مگر اس بات سے بھی انکار نہیں کیا جا سکتا ہے کہ آپ اور محبوبِ الٰہی کے ہمجد دونوں ایک نہیں ہیں۔

کریم الدین احمد بہاری ’’مخزن الانساب‘‘ میں نسب نامۂ پدری یوں لکھتے ہیں۔

فریدالدین بن ابراہیم بن جمال الدین بن احمد بن علی بن عبداللہ بن حسن بن علی بن احمد بن عبداللہ بن علی اصغر مدنی بن جعفر ثانی بن امام محمد نقی بن امام محمد تقی بن امام علی رضا بن امام موسیٰ کاظم بن امام جعفر صادق بن امام محمد باقر بن امام زین العابدین بن امام حسین بن علی مرتضیٰ بن ابی طالب۔ (ص؍ ۱۷۳)

اسی طرح حضرت داؤد قریشی کے خاندانی سفائن میں بھی نام لکھے ہیں اور انہیں محبوبِ الٰہی کا ہمجد تسلیم کیا گیا ہے، حضرت یحییٰ علی نوآبادینے بھی آپ کو محبوبِ الٰہی کا ہمجد تسلیم کیا ہے، شاہ محمد واجد ابوالعُلائی لکھتے ہیں کہ

’’اور آپ والدۂ ماجدہ کی طرف سے حضرت سلطان الاؤلیا حضرت نظام الدین اؤلیا چشتی قدس سرہٗ سے لے کر حضرت علی موسیٰ رضا اور دیگر ائمہ بالا رضوان اللہ علیہم تک جا ملتا ہے‘‘

(تذکرۃ الابرار)

حکیم شعیب احمد پھلواروی لکھتے ہیں کہ

’’حضرت فریدالدین طویلہ بخش نے لکھنوتی پنڈوہ میں نشو و نما پائی، علومِ ظاہری و باطنی میں کمال پیدا کرکے اپنے خالہ زاد بھائی حضرت نور قطبِ عالم پنڈوی سے بیعت ہوکر ان کی زیرِ نگرانی ریاضات و مجاہدات میں محنتِ شاقہ اور سعی بلیغ کرتے رہے‘‘

(تجلیاتِ انوار، جلد اول)

بروایتِ ’’تجلیاتِ انوار‘‘ حضرت علاؤالحق پنڈوی کی خانقاہ میں نفس کشی پر خاص توجہ رہتی تھی، جب تک ذرا بھی نفس کا شائبہ ہوتا، ترقیات مسدود رہتی تھیں، سالہا سال حضرت علاؤالحق کے صاحبزادے حضرت نور قطبِ عالم نے خانقاہ کی غلاظت صاف کی ہے، غلام نبی خاں فردوسی منیری لکھتے ہیں کہ

’’ایک روز حسبِ معمول پائخانہ صاف کر رہے تھے، کسی فقیر پائخانہ پھرا کہ وہ سب آپ کے کپڑوں پر پڑا اور آپ بالکل اس نجاست سے بھر گئے، والد ماجد آپ کے اتفاقاً اسی طرف سے آ نکلے، فرمایا حق خدمت ادا ہوا، اب دوسری خدمت کرو۔۔۔‘‘

(مراۃ الکونین، ص؍ ۳۶۵)

حضرت نور قطبِ عالم نے بھی اپنے مرید حضرت فریدالدین طویلہ بخش سے ایسی ہی کڑی محنت لی، آپ کو حکم تھا کہ شاہراہ پر زیرِ سایہ درخت بیٹھ کر مسافروں کے کپڑے سئیں، چنانچہ آپ نے اپنا یہ معمول بنا لیا کہ روزانہ شاہراہ پر زیرِ درخت بیٹھ کر خیاطی کا کام کرتے، یہ معمول سردی، گرمی، برسات ہر موسم میں رہا کرتا، سلائی کی کوئی اُجرت متعین نہیں تھی، اگر کسی نے کچھ دے دیا تو عطیۂ الہٰی سمجھ کر لے لیا، اگر نہ دیا تو طلب بھی نہیں کرتے، اسی طرح شدید ریاضات و مجاہدات اور نفس کشی کی بدولت ولایت کے اعلیٰ رتبہ پر پہنچے اور صاحبِ معرفت و کرامات ہوکر اپنے شیخ کی طرف سے خرقۂ خلافت و اجازت سے بہرۂ مسند ہوئے۔ (تجلیاتِ انوار، جلد اول)

’’طویلہ بخش‘‘ مشہور ہونے کی وجہ تسمیہ صاحبِ ’’تجلیاتِ انوار‘‘ کچھ یوں لکھتے ہیں کہ

’’ایک روز حسبِ معمول شاہراہ پر زیرِ درخت کپڑے سی رہے تھے، گھوڑے سوار سودا گروں کا ایک قافلہ وہاں پہنچا، ان میں سے ایک شخص آپ کے پاس آیا اور اپنے کپڑے سینے کے لیے دیئے، آپ نے کپڑے لے لیے اور محض واقفیت حاصل کرنے کے خیال سے اس سے پوچھا کہ یہ گھوڑے کہاں سے آتے ہیں اور کہاں جائیں گے، اس نے کہا تم اپنا کام کرو! تمہیں اس سے کیا بحث، یہ گھوڑے کہاں سے آتے ہیں اور کہاں جائیں گے، جئیں گے یا مریں گے، آپ نے فرمایا جئیں یا مریں مجھ کو کیا؟ شام کے وقت آپ اپنی قیام گاہ پر تشریف لائے اور سودا گر اپنے قافلے میں گیا، جب صبح ہوئی تو سودا گروں کے بہت سے گھوڑے مردہ پائے گئے، اس واقعہ سے سب کو حیرانی و پریشانی ہوئی کہ بیک دفع کل گھوڑے کیوں مر گئے؟ وہی شخص جس نے گذشتہ دن آپ سے تلخی سے گفتگو کی تھی، اس کو اپنی بات یاد آئی، اس وقت اس نے خیال کیا کہ یہ خیاط نہ تھا بلکہ کوئی صاحبِ دل تھا، جس کی بد دعا کا یہ ثمرہ ہے، تحقیقات سے معلوم ہوا کہ وہ حضرت علاؤالحق پنڈوی کے داماد اور حضرت نور قطبِ عالم کے مرید و مسترشد ہیں، جنہوں نے سترِ حال اور نفس کشی کے لیے خیاطی کا کام اختیار کر رکھا ہے، تمام سودا گر حیران و پریشان حضرت کی خدمت میں حاضر ہوئے اور کل ماجرا بیان کیا، حضرت نے آپ کو طلب فرما کر ارشاد فرمایا کہ

جوانی کے غصہ کو قابو میں رکھنا جواں مردی ہے، کل تمہارے غضب آمیز جملے نے غریب سودا گروں کے گھوڑوں کا کام تمام کر دیا۔

حضرت فریدالدین نے اپنے اسی جملہ کو الٹ کر عرض کیا کہ ’’حضور! مجھ کو کیا گھوڑے مرتے ہو یا جیتے ہوں‘‘ ادھر آپ کی زبان سے یہ جملہ نکلا ادھر سب گھوڑے زندہ کھڑے ہوگئے، حضرت نے سودا گروں سے فرمایا کہ ’’اب جاؤ! گھوڑے زندہ ملیں گے‘‘ جب سودا گر وہاں سے واپس آئے سب گھوڑے زندہ کھڑے تھے، اس ظہورِ کرامت کے بعد آپ کا لقب ’’طویلہ بخش‘‘ مشہور ہوگیا‘‘۔ (جلد اول)

آپ کے عقد و بیعت کے تعلق سے کریم الدین احمد بہاری لکھتے ہیں کہ

’’۔۔۔۔از دختر حضرت شیخ علاؤالحق پنڈوی منسوب (فریدالدین طویلہ بخش) گشتند و صاحبِ اولاد شدند، آنحضرت را بیعت و خلافت از برادرِ خالائی و نسبتی خود شیخ نور قطبِ عالم پنڈوی حاصل گردید‘‘

(ص؍۱۷۲)

واضح ہوکہ حضرت علاؤالحق کے دوسرے داماد حضرت مولانا تاج الدین اسبیجانی تھے، جنہیں شیخ عبدالحق محدث دہلوی نے

’’سمجھدار عالم کہا ہے‘‘

(اخبارالاخیار، تذکرۂ شیخ سخائی)

مولانا شاہ حسین الدین احمد منعمی لکھتے ہیں کہ

’’بہر حال! سیّد ابراہیم حضرت محبوبِ الٰہی کی خدمت ہی میں تھے کہ مخدوم سراج الدین کو بنگالہ جانے کا حکم ہوا اور سیّد ابراہیم بھی ہمراہ ہوئے، پنڈوہ میں کچھ دنوں رہنے کے بعد مولانا علاؤالحق نے اپنی سالی سے ان کی شادی کر دی‘‘

(پنڈوہ، ص؍ ۲۸)

شاہ حسین الدین احمد منعمی نے حضرت علاؤالحق کی اہلیہ کا نام حافظہ بی بی جمال بتایا ہے مگر اس کی صحت پر شک و شبہات بھی ظاہر کئے ہیں، لکھتے ہیں کہ

’’حضرت مخدوم علاؤالحق کی اہلیہ محترمہ حافظہ بی بی جمال تھیں، کہا جاتا ہے کہ یہ حضرت مخدوم سیّد بدرالدین پیر بدر عالم کی بہن تھیں مگر کسی کتاب سے اس کا ثبوت نہ مل سکا، ان کا مزار حضرت مخدوم کے پائیں میں احاطہ سے نیچے زینہ سے پچھم واقع ہے‘‘

(پنڈوہ، ص؍ ۲۰)

بہت حد تک ممکن ہے کہ قدیم سفائن میں اس کا تذکرہ موجود ہو جیسا کہ صاحبانِ کنزالانساب و مخزن الانساب نے تحریر کیا ہے، حضرت علاؤالحق کے گیارہ صاحبزادے اور چار صاحبزادیاں تھیں، چاروں صاحبزادیوں کی قبریں بھی آپ کے مزار سے متصل پورب طرف واقع ہیں۔ (پنڈوہ، ص؍ ۲۰)

شاہ حسین الدین احمدمنعمی کی اس تحریر سے اس بات کی نشاندہی ہوتی ہے کہ آپ کی زوجۂ اولیٰ کا انتقال پنڈوہ میں ہی ہوا جس کے بعد آپ نے دوسرا عقد کیا، حضرت فریدالدین کے دوسرے عقد کا تذکرہ صاحبِ مخزن میں یوں ہے۔

’’باید دانست کہ حضرت میر سیّد محمد سہروردی مذکور را از محل دوم کہ بخاندان حضرت مخدوم شیخ فرید طویلہ بخش چشتی النظامی منسوب بود یک پسر میر سیّد صدر عالم بوجود آمدند‘‘

(ص؍۱۴۱)

حضرت فریدالدین خرقۂ خلافت حاصل کرنے کے بعد حسبِ ارشاد پیر و مرشد بہار شریف تشریف لائے اور محلہ چاند پورہ میں سجادۂ رشد و ہدایت قائم کیا، اطراف صوبۂ بہار میں بہت کم خاندان ایسے ہوں گے جہاں آپ کا سلسلہ نہ پہنچا ہو۔(پنڈوہ، ص؍ ۲۹)

صاحبِ ’’کنزالانساب‘‘ رقمطراز ہیں کہ

’’سیّد فرید طویلہ بخش در بہار حسبِ ولایت چشتیاں اقامت پذیر شدند بمحلہ چاند پورہ‘‘

(ص؍ ۸۷)

اسی طرح کی تحریر صاحبِ مخزن نے بھی صفحہ ۱۷۲ ؍پر درج کیا ہے، صفحہ ۲۰۰ ؍ پر چاند پورہ کے تعلق سے لکھتے ہیں کہ

’’بمحلہ چاند پورہ چند مکانات فرزندانِ حضرت مخدوم فرید طویلہ بخش رحمۃ اللہ علیہ موجودہ اند و چند مکانات از اقوامِ اراذل ہم واقع اند حالاصاحبِ سجادۂ درگاہ شریف جناب برادرم سیّد شاہ محمد عسکری اند کہ از فرزندانِ حضرت مخدوم علیہ الرحمۃ اند‘‘

حضرت فرید الدین کی آمد سے چاند پورہ کی تاریخ میں زریں باب کا اضافہ ہوتا ہے، ان کی خانقاہ سے تعلیمات کی نشو و نما ہوئی، جس سے بہار شریف ہی نہیں بلکہ صوبۂ بہار کے اکثر خانوادے فیضیاب ہوئے، ان کے عہد میں کیا تعلیم دی جاتی رہی، کس طرح مسترشدین کی تربیت ہوئی، خانقاہی رسم و رواج کیسے رہے اس کا اندازہ ان کے اک مکتوب سے لگائیے، مکتوب کا چند حصہ خانقاہ چشتیہ مودویہ، چھوٹا شیخ پورہ میں محفوظ ہے جس کے کاتب شاہ مراداللہ فردوسی ہیں، یہ تحقیق کا نازک مسئلہ ہے جس کی بازیافت ہونی چاہیے لیکن افسوس کہ اس کا قدیم نسخہ اب نایاب ہے۔

حضرت فرید الدین کی شخصیت کے بعد ان کے صاحبزادگان بھی انہیں اوصاف و کمالات کے حامل ہوئے، صاحبِ ’’کنزالانساب‘‘ لکھتے ہیں کہ

’’اولاد ایں بزرگ کہ بسرایر ۔۔۔ مشائخِ کبار فرزند رتبۂ بلند آنحضرت سیّد معین الدین بہاری‘‘

(ص؍۸۷)

صاحبِ مخزن لکھتے ہیں کہ

’’و از زبان اکثرے ازیں جا بارہا بسماع آمد کہ ہرکہ از قوم شان را وز فرزندان مخدوم بتافت بہر در کہ شد ہیچ عزت نیافت۔۔۔بعضے خود را از نسل خلیفۂ آنحضرت کہ بنام ملا چاند شہرت دارند و قبرستان نزد خطیرۂ حضرت مخدوم فرید طویلہ بخش قدس سرہٗ واقع است بے شمارند‘‘

( ص؍ ۱۷۹)

صاحبِ مخزن رقمطراز ہیں کہ

برصغیر میں علم فقہ اور منطق کے مشہور عالم ملا محب اللہ بہاری آپ ہی کے خاندان میں مرید ہوئے اور آستانہ حضرت طویلہ بخش، چاند پورہ کے احاطہ میں آسودۂ خاک ہیں۔ (ص؍ ۲۰۰)

آپ کا انتقال ۶ ؍جمادی الثانی ۸۹۷ھ میں ہوا، مزار چاند پورہ میں مرجعِ خلائق ہے۔ (پنڈوہ، ص؍ ۲۹)

حضرت سیّد معین الدین چشتی اپنے والد حضرت فریدالدین کے مرید و خلیفہ و جانشیں تھے، راقم کی تحقیق کے مطابق آپ کی پیدائش پنڈوہ میں ہوئی اور اپنے نانا و ماموں کی صحبت بھی پائی، حکیم شعیب احمد پھلواروی لکھتے ہیں کہ

’’سلسلۂ چشتیہ فریدیہ کو آپ سے بہت فروغ ہوا اور صدہا تشنگان وادیٔ طلب آپ کے چشمۂ فیض سے مستفیض ہوئے، سنۂ وفات ۹۱۲ھ ہے، آپ کے صاحبزادے مخدوم سیّد نصیرالدین چشتی تھے، ان سے بھی بے انتہا اشاعت ہوئی، ۹۳۰ھ میں رحلت فرمائی‘‘

(تجلیاتِ انوار، جلد اول)

حضرت نصیرالدین چشتی کے دو صاحبزادے ہوئے، پہلے حضرت سیّد سلطان چشتی اور چھوٹے حضرت سیّد بہاؤالدین چشتی، یہ دونوں بزرگ اپنے والد کے مرید و خلیفہ تھے، ثانی الذکر بزرگ بہار شریف کے تکیہ خورد میں جابسے، آپ کے صاحبزادے دیوان شاہ جمال الحق چشتی ہوئے، ان کے صاحبزادے دیوان شاہ شعیب الحق چشتی ہوئے، ان کے صاحبزادے دیوان شاہ عبیداللہ چشتی ہوئے اور ان کے صاحبزادے حضرت دیوان شاہ عبدالوہاب چشتی ہوئے، یہ اپنے عہد کے نامور بزرگ گزرے ہیں، تکیہ خورد میں آپ کا دیوان خانہ آباد تھا جس کے سجادہ نشیں آپ کے پرپوتے شاہ عطا حسین چشتی بن محمد اسحٰق چشتی بن محمد آفاق بن علیم الدین بن منوراللہ بن غلام محمد بن کمال الدین بن جمال الدین بن دیوان عبدالوہاب تھے۔ (مخزن الانساب، ص؍ ۱۷۹)

صاحبِ مخزن لکھتے ہیں کہ

’’زیارت گاہ حضرت دیوان بہ تکیہ خورد معروف است و ہمہ شیخ زادگان دوازدہ مواضعات کہ بہ بارہ گانواں شہرت دارند و بہ ہردو جانب مغرب و مشرق بہار آباد اند، معتقد خاندان و فرزندانِ حضرت مخدوم شیخ فرید طویلہ بخش چشتی النظامی اند‘‘

(ص؍ ۱۷۹)

اس خانوادہ میں بڑے بڑے مشائخ اور یادگارِ روزگار اشخاص ہوئے ہیں جن سے ایک زمانہ فیضیاب ہوا ہے، ہمارے کرم فرما برادرم سیّد شاہ محمد عطا منعم کا نسبِ پدری بھی آپ ہی سے جا ملتا ہے اور وہ اس طرح ہے۔

سیّد محمد عطا منعم بن محبوب جاوید اصغر بن علی اصغر بن عبدالعزیز بن عبدالکریم بن عنایت کریم بن رحیم بخش بن امام بخش بن بزرگ بن محمد منعم بن محمد شریف بن عبدالطیف بن دیوان عبدالوہاب چشتی۔

جاننا چاہیے کہ حضرت شاہ محمد شریف چشتی کے دو صاحبزادے ہوئے، شاہ محمد منعم اور شاہ غلام مجتبیٰ، آپ کی نسل میں ایک بزرگ حضرت شاہ عبدالکریم عرف دمڑی بہار شریف کے اطراف میں بڑے رئیس اور کامیاب بزرگ گزرے ہیں، شاہ محمد واجد ابوالعُلائی نوآبادی نے تذکرۃ الابرار میں کئی جگہ آپ کا تذکرہ کیا ہے، آپ شاہ امین احمد بہاری کے خالہ زاد بھائی ہوتے ہیں، حضرت مخدوم حسن علی کا روضہ آپ نے ہی تعمیر کرایا، آپ کا نسب چند واسطہ سے شاہ غلام مجتبیٰ سے جا ملتا ہے اور وہ اس طرح ہے۔

شاہ عبدالکریم بن محمد امام بن اظہر علی بن ذکی الدین بن غلام مجتبیٰ۔

حضرت شاہ محمد اکبر ابوالعُلائی داناپوری رقمطراز ہیں کہ

’’آپ کو بیعت جناب مولانا سیّد شاہ اشرف علی خلف الرشید جناب حضرت شاہ یحییٰ علی قدس سرہٗ سے ہے اور تعلیم و ارشاد و خلافت جناب حضرت سیّد شاہ ولایت علی قدس سرہٗ سے ہے، آپ بہار کے ایک معزز رئیس اور بالنسب روشن درویش ہیں اپنے پیر و مرشدکے عاشق، زاداللہ عشقہٗ‘‘

(نذرِ محبوب، ص؍۴۸)

آپ کے خانوادہ پٹنہ کے افرادبی، ایم، داس روڈ میں آباد ہیں۔

حضرت سلطان چشتی کے تعلق سے حکیم شعیب احمد پھلواروی رقمطراز ہیں کہ

’’صاحبِ تصرفات و کرامات بزرگ گزرے ہیں، اپنے والد کے بعد مسند ارشاد پر جلوہ افروز ہوئے اور انوارِ چشتیہ کو صوبۂ بہار میں نور پاشی کی، ۹۵۰ھ میں رحلت فرمائی‘‘

(تجلیاتِ انوار، جلد اول)

آپ کے اجل خلفا میں ایک صاحبزادے حضرت سیّد مظفر چشتی اور دوسرے حضرت احمد چشتی نوآبادی تھے، ان سے اس سلسلے کا خوب اجرا ہوا، بہار میں آپ کا سلسلہ انہیں بزرگ سے جاری ہوا، اس کی اجازت و خلافت خانقاہ سجادیہ ابوالعُلائیہ، داناپور میں رائج ہے، صاحبِ مخزن لکھتے ہیں کہ

’’اسم شریف ایشاں حضرت مخدوم سلطان چشتی است ایں حضرت پیر و مرشد حضرت مخدوم شیخ احمد چشتی تاج فقیہی نوآبادیست کہ صاحبِ مزار نوآباد خورد و کلاں است‘‘

(ص؍ ۱۹۹)

حضرت احمد چشتی اور حضرت اخی سراج کے درمیان چھ واسطہ ہے، تعجب ہے کہ شاہ محمد کبیر ابوالعُلائی داناپوری نے صرف چار واسطوں کا ذکر کیا ہے، وہ لکھتے ہیں کہ

’’آپ کو بیعت خلافت چار واسطہ کی درمیانگی سے حضرت اخی سراج سے تھی‘‘

(تذکرۃ الکرام، ص؍۶۴۸)

ممکن ہے کہ حضرت طویلہ بخش کو اجازت حضرت علاؤالحق پنڈوی سے ہو، یہاں تک کہ حضرت سلطان چشتی کو بھی اپنے دادا حضرت معین الدین چشتی سے اجازت و خلافت حاصل ہو۔

تعجب ہے کہ حضرت شاہ قطب الدین احمد منیری کے مرید غلام نبی فردوسی نے ’’مرآۃ الکونین‘‘ نامی اتنی ضخیم کتاب تصنیف کر ڈالی مگر حضرت فریدالدین یا پھر ان کے خانوادے میں سے کسی کا کوئی ذکر نہیں کیا۔

قصہ مختصر یہ کہ حضرت مظفر چشتی اپنے والد کے مرید و خلیفہ تھے، ۹۹۰ھ میں وفات پائی، پھر آپ کے صاحبزادے حضرت منصور چشتی اپنے والد کے مرید و خلیفہ ہوئے، ۱۰۱۰ھ میں وفات پائی پھر ان کے صاحبزادے حضرت محبوب چشتی اپنے والد کے مرید و خلیفہ ہوئے، ۱۰۲۸ھ میں وفات پائی، پھر ان کے صاحبزادے حضرت مسعود چشتی اپنے والد کے مرید و خلیفہ ہوئے، پھر ان کے صاحبزادے حضرت عنایت اللہ چشتی پھر ان کے صاحبزادے حضرت امیراللہ چشتی اپنے والد کے مرید و خلیفہ ہوئے، آپ کے چار صاحبزادے ہوئے۔

(۱) حضرت صفی اللہ چشتی

(۲) حضرت احسان اللہ چشتی

(۳) حضرت اہل اللہ چشتی

(۴) حضرت فخراللہ فخری چشتی

حضرت شاہ احسان اللہ چشتی : آپ علومِ ظاہری و باطنی کے لحاظ سے اپنے معاصرین میں ممتاز مقام رکھتے تھے، علم و فضل اور زہد و اتقا کی وجہ سے عوام میں بہت محبت اور عقیدت کی نظر سے دیکھے جاتے تھے، خانقاہ معظم، بہار شریف کے سجادہ نشیں حضرت شاہ علیم الدین فردوسی سے آپ کے گہرے اور مخلصانہ مراسم رہے، آپ کی ہستی علومِ ظاہر و باطن میں مغتنماتِ زمانہ سے تھی، کریم الدین احمد بہاری نے آپ کو

’’سر آمدِ اؤلیائے وقت‘‘

جیسے القاب سے یاد کیا ہے۔

خاندانِ فریدیہ میں آپ سب سے بافیض اور کامیاب بزرگ گزرے ہیں جن کی خدمات اور کارنامے عوام و خواص میں جگ ظاہر ہیں، سالِ پیدائش و وفات کا ذکر اب تک کسی کتاب میں نظر سے نہیں گذرا اس لیے قیاسِ اغلب ہے کہ آپ کا زمانہ ۱۱۲۰ھ سے ۱۲۱۰ھ تک رہا ہو، بیعت و خلافت نیز تعلیم و تربیت کل اپنے والد حضرت شاہ امیراللہ چشتی سے حاصل تھی، والد کے بعد خاندانی سجادہ پر رونق افروز ہوئے اور اس خدمت کو تاعمر بخوبی انجام دیا۔

شاہ احسان اللہ فارسی اور اردو دونوں کے قادرالکلام شاعر تھے، آپ کے فارسی کلام تو کچھ مل بھی جاتے ہیں، اردو کلام ابھی تک پردۂ خفا میں ہے، فخری تخلص کیا کرتے، آپ نے حضرت شیخ شرف الدین احمد یحییٰ منیری کی شان میں ایک اردو نظم ۱۱۸۵ھ میں تحریر فرمائی تھی جو حضرت شاہ علیم الدین فردوسی کی نرینہ اولاد کے تولد ہونے کے لیے دعا کے طور پر لکھی تھی، واقعہ یوں ہے کہ حضرت شاہ علیم الدین فردوسی کو پہلی دو بیویوں سے کوئی اولادِ نرینہ نہ ہوئی تو سب لوگوں کو بڑی تشویش اور فکر دامن گیر ہوئی، خود شاہ علیم الدین بھی بہت مغموم رہا کرتے تھے، آخر لوگوں کی رائے ہوئی کہ تیسری شادی کی جائے، چنانچہ تیسری شادی شاہ منور علی کی صاحبزادی بی بی جعفرہ سے کی، کچھ عرصہ تک ان سے بھی اولاد نہ ہوئی تو انہوں نے اپنا داغِ نہانی اپنے قلبی دوست حضرت شاہ احسان اللہ چشتی سے ظاہر کیا، شاہ احسان اللہ بہت زیادہ متاثر ہوئے اور ایک منقبت حضرت مخدومِ جہاں کی شان میں لکھ کر شیرینی اور پھول وغیرہ کے ساتھ آستانۂ مخدوم پر حاضر ہوئے اور فاتحہ کے بعد نہایت رقت سے اپنی منقبت کو پڑھا اور مراد برآری کے لیے دعا مانگی، اللہ پاک نے بہ فیضِ مخدوم آپ کی دعا قبول فرمائی اور کبرِ سنی میں شاہ علیم الدین فردوسی کے نرینہ اولاد پیدا ہوئی اور نام ولی اللہ رکھا گیا، یہ بزرگ شاہ امین احمد فردوسی کے دادا ہیں، اس کی وجہٖ تنظیم حضرت شاہ نجم الدین احمد فردوسی نے ’’حیاتِ ثبات‘‘ میں اس طرح لکھا ہے کہ

”می آرند کہ حضرت شاہ علیم الدین فردوسی را کسے از اولاد ذکور نہ بود، عمرش کثیر چوں فلک پیر و موئش سفید مثال خورشید می دمید، روزے داغ نہانی و غم پنہانی فرزند بقائے نام و نشانی بر شاہ احسان اللہ چشتی آشکارا کرد، ازاں کہ میاں ایں دو بزرگوار مودت و محبت بے نہایت بود، وے حضرت مسند سجادگی صاحب الولایت از خلفِ رشید و اولادِ سعید خالی دیدن نمی تو انست حسرتہا خورد و پس مشورہ قائم کرد، وہم چناں ساز کرد تا روزے حضرت شاہ علیم الدین رابا خوان چادر و شیرینی و گلہا بخورہا از خانقاہ حضرت مخدوم جہاں ہمراہ گرفتہ است و خراماں و اشک ریزاں و ایں منقبت در حال خواناں تا بارگاہ مخدوم جہاں رسیّدہ اند و ما وجب گردانیدہ خود بہ مواجہ مزار شریف مراقب شدہ است و شب در آنجا گزر ایندہ آخر بشارت یافتہ است برائے پسر ذیجاہ و ہم چناں بہ وقوع آمدہ کہ حضرت شاہ ولی اللہ محبوب ترین فرزنداں مخدوم جہاں پناہ چوں ماہ نیمہ ماہ ظاہر شد، الحمدللہ علی ذالک“

( ص؍ ۲۸)

ترجمہ : منقول ہے کہ حضرت شاہ علیم الدین فردوسی کو کوئی اولاد نرینہ نہ تھی، آپ کی عمر زیادہ ہوچکی تھی، پیری کی وجہ سے سب بال سفید ہوگئے تھے، بقائے نام و نشان کے لیے فرزند کی تمنا تھی، جس کے نہ ہونے کی وجہ سے غمگین اور رنجیدہ رہا کرتے تھے، ایک روز آپ نے اس غمِ پنہاں کو حضرت شاہ احسان اللہ چشتی سے ظاہر فرمایا، جن سے غایت محبت اور مودت تھی، یہ سن کر شاہ احسان اللہ کو بڑی حسرت ہوئی کہ اس خانوادۂ مخدوم کی مسندِ خلافت خلفِ رشید نہ ہونے کی وجہ سے خالی رہا چاہتی ہے، آخرکار مشورہ کے بعد ایک روز ایک خوان چادر شیرینی پھول اور عود و لوبان کے ساتھ حضرت شاہ علیم الدین کو ہمراہ لے کر خانقاہ حضرت مخدومِ جہاں سے بچشمِ گریاں بحالِ زار منقبت میں نظم پڑھتے ہوئے روانہ ہوئے اور درگاہ شریف حضرت مخدوم الملک تک پہنچے اور حاضری کے ضروری آداب بجا لائےکے مزار شریف کے مواجہ میں مراقب ہوگئے اور رات اسی جگہ گزاری، آخرکار فرزندِ ذیجاہ کی بشارت پائی اور فی الواقع ایسا ہی ہوا کہ بحمدللہ حضرت شاہ ولی اللہ نہایت خوبصورت چودہویں چاند کی مانند تولد ہوئے جو حضرت شاہ علیم الدین کے محبوب ترین فرزند تھے۔

وہ منقبتیہ نظم جو آپ نے حضرت مخدومِ جہاں کی شانِ اقدس میں تحریر فرمائی ہے، ملاحظہ ہو۔

یا شرف دیں تجھ شرف سے جملہ عالم پُر شرف

جملہ عالم پُر شرف ہے تجھ شرف سے ہر طرف

ظلم کرنا چاہتا ہے حاسد نادان حرف