تذکرہ شیخ رفاعی بزبان امام ذھبی

محمد افضال حسین نقشبندی

حضرت شیخ احمد کبیر رفاعی کی ولایت اور عظمت و جلال پر امت کا اتفاق ہے، آپ کی کنیت ابوالعباس اور لقب محی الدین ہے، جد امجد رفاعہ کی مناسبت سے رفاعی کہلائے، آپ حضرت امام حسین کی اولاد میں سے ہونے کی وجہ سے حسینی کہلاتے ہیں، جب کہ فقہی مذہب کے اعتبار سے شافعی ہیں، ١٥ رجب المرجب ٥١٢ھ کو پیدا ہوئے، آپ طریقت کے سلسلۂ رفاعیہ کے بانی ہیں۔

امام شمس الدین ذہبی ان کے متعلق لکھتے ہیں کہ

’’الامام القدوة العابد الزاهد شيخ العارفين‘‘

ترجمہ : آپ بڑے امام، پیشوا، عبادت گزار، زاہد اور عارفین کے شیخ کامل ہیں۔

حافظ ذہبی بیان کرتے ہیں کہ آپ کے تقویٰ، پرہیز گاری اور قناعت کا یہ عالم تھا کہ

’’وكان لا يجمع بين لبس قميصين، ولا يأكل إلا بعد يومين أو ثلاثة اكلة، وإذا غسل ثوبه، ينزل فى الشط كما هو قائم يفركه، ثم يقف فى الشمس حتى ينشف، وإذا ورد ضيف، يدور على بيوت اصحابه يجمع الطعام فى مئزر‘‘

ترجمہ : کبھی اپنے پاس دو قمیصیں نہ رکھتے، دو تین دن بعد ہی کوئی ایک آدھ لقمہ کھاتے تھے، جب کپڑے دھونے ہوتے تو دریا میں اتر کر اس کا میل کچیل دور کرتے اور دھوپ میں کھڑے ہو کر اسے خشک کر لیتے تھے، اگر کوئی مہمان آ جاتا تو مریدوں کے گھر سے اس کے کھانے کا بند و بست فرما دیتے تھے۔

مزید فرمایا کہ

’’وكان كثير الاستغفار، عالى المقدار، رقيق القلب، غزيز الإخلاص‘‘

ترجمہ : آپ کثرت سے استغفار کرنے والے، عالی مقام، نرم دل اور صاحب اخلاص تھے۔

سير اعلام النبلاء، رقم الترجمة : ٥٢٠٤، الرفاعى، جلد : ١٥ ، ص : ٣٠٦ ، ٣٠٨، مطبوعه دار الحديث، القاهرة.

بالآخر ٦٦ سال تک اس دار فانی میں رہ کر مخلوق خدا کی رشد و ہدایت کا کام سر انجام دینے کے بعد بروز جمعرات ٢٢ جمادی الاول ٥٧٨ھ بوقت ظہر آپ نے اس عالمِ فنا سے عالمِ بقا کا سفر اختیار کیا۔