فیض جس کا ہے یہ جاری اسی کی چادر ہے

فیض جس کا ہے یہ جاری اسی کی چادر ہے

ہم سبھی جس کے پجاری اسی کی چادر ہے

کون ہے ایسا زمانے میں دکھاؤ تو سہی

سب میں صورت ہے جو پیاری اسی کی چادر

آسماں چاند ستارے یہ نظارے دنیا

جس کے صدقے بنی ساری اسی کی چادر ہے

ایک میں ہی نہیں وللہ زمانہ دیکھو

جانو دل جس پے ہے واری اسی کی چادر ہے

دل مرا دین مرا جان مری ایماں بھی

ہے سبھی کچھ جہاں ہاری اسی کی چادر ہے

لوک پرلوک کا مالک جو بنا ہے عامرؔ

ہیں سبھی جس کے ابھاری اسی کی چادر ہے