ذکر کس کا ہو رہا ہے محفل احباب میں

ذکر کس کا ہو رہا ہے محفل احباب میں

ہے حرارت اور ہی کچھ اس دل بے تاب میں

جام ساقی آئینہ ہے محتسب سے خوف کیا

دیکھتے ہیں روئے دلبر ہم شراب ناب میں

حسرت دل در بدر اس کو پھرائے اے عزیز

حضرت یوسف کو دیکھے گر زلیخا خواب میں

بیٹھنا اک دو نفس مل کر غنیمت جانئے

تفرقہ انداز ہے چرخ کہن احباب میں

صحوؔ پردہ ہم سے کیوں تم غیر سمجھے ہو کسے

دیکھتے ہو کس کو بیداری میں کس کو خواب میں